გოლფი – თამაში, როგორც ცხოვრების სტილი

ელეგანტური, დახვეწილი, ჰარმონიული, გრაციოზული – ეს ის ეპითეტებია, რომლითაც ამ თამაშს ხშირად აღწერენ. მართლაც, რთულად თუ მოიძებნება სპორტის რომელიმე სახეობა, რომელიც გოლფს კონკურენციას გაუწევს მაშინ, როცა მშვიდ გარემოში დასვენებისას თერაპიული ეფექტის მქონე აქტივობას ვეძებთ. დიდი ისტორიის, კომპლექსური წესებისა და დამაინტრიგებელი ფაქტების ფონზე, გოლფი მუდმივად ინარჩუნებს თავის უნიკალურ ნიშას და ყველა ასაკის მოთამაშეს აღაფრთოვანებს. სწორედ ამ თამაშზე გიამბობთ ახლა.

შოტლანდიიდან მსოფლიო ფენომენამდე

შუასაუკუნეების შოტლანდიის ოღროჩოღრო ლანდშაფტიდან მოვლილ, ხასხასა მწვანე მოედნამდე გოლფმა დიდი ისტორია განვლო. თამაშს, რომელიც დღეს ბევრისთვის ცხოვრების სტილის განუყოფელ ნაწილად იქცა, “წინაპრები” რომის იმპერიასა  თუ ჩინეთში ჰყავს, მისი თანამედროვე ვერსია კი შოტლანდიაში იღებს სათავეს. ამბობენ, შოტლანდიელი მწყემსები მოხრილი ჯოხით კენჭებს კურდღლების სოროებში აგდებდნენ და ამით ერთობოდნენო. ეს ლეგენდაა, თუმცა თანამედროვე გოლფის შესახებ პირველი წერილობითი წყაროც შოტლანდიას უკავშირდება – 1457 წელს მაშინდელმა მონარქმა, ჯეიმს II-მ თამაში აკრძალა, რადგან გოლფის გამო, სამხედრო წვრთნებს სათანადო დროსა და ყურადღებას აღარ უთმობდნენ. აკრძალვა მოგვიანებით მეფე ჯეიმს IV-მ მოხსნა და, როგორც თამაშის დიდმა მოყვარულმა, 1503–1504 წლებში გოლფის კლუბებიც კი დააარსა.

მე-18-19 საუკუნეებში გოლფი შოტლანდიის საზღვრებს გასცდა: ჯერ ინგლისში, მერე კი ბრიტანეთის იმპერიის სხვადასხვა ნაწილში გახდა პოპულარული, დროთა განმავლობაში კი იგი ელიტური თავშესაქცევის გარდა, თავისუფალი დროის მშვიდად გატარების და უნიკალური სპორტული შეჯიბრებების სიმბოლოდ იქცა.

პრესტიჟული ტურნირების ჩამოყალიბების, მასმედიის გააქტიურების და ტურიზმის გაძლიერების კვალდაკვალ, გოლფი ვიწროდ შოტლანდიურიდან მსოფლიო თამაშად იქცა. განსაკუთრებული პოპულარობა მოიპოვა ტურისტულმა ადგილებმა, რომლებიც დამსვენებლებს გოლფის თამაშის შესაძლებლობას აძლევდა, 112-წლიანი პაუზის შემდეგ, 2016 წელს, ოლიმპიურ თამაშებზე ამ სპორტის დაბრუნებით კი იგი განსაკუთრებული ყურადღების ქვეშ მოექცა.

ეს ტერმინები გამოცდილი მოთამაშეებისთვის უცხო არ არის, თუმცა ბევრმა ჯერ კიდევ არ იცის, რომ გოლფს საკმაოდ კომპლექსური წესები აქვს. ერთი შეხედვით, აქ თითქოს მოხდენილი მოძრაობით ჯოხს ბურთს ურტყამ, ისიც ლამაზ ტრაექტორიას მოხაზავს და ორმოში ჩავარდება, თუმცა, სინამდვილეში, ყველაფერი უფრო რთულადაა – გოლფი მკაცრი ეტიკეტით გამოირჩევა. ეს ის თამაშია, სადაც ყველაზე მცირე დარღვევაც კი წყვეტს გამარჯვებისა თუ დამარცხების საკითხს.

გოლფის თამაშისთვის 14 კავჩოგანი, იგივე ყვანჭია საჭირო. კავჩოგნები სხვადასხვა სიშორის, სიძლიერისა და ტრაექტორიის დარტყმისთვისაა შექმნილი. მარშრუტი, იგივე “გოლფის გზა”, წინასწარაა მონიშნული და ფოსოებია ამოჭრილი, მოთამაშემ ბურთი სათითაოდ, ყველა ფოსოში უნდა ჩააგდოს,  თანაც – რაც შეიძლება ნაკლები დარტყმით.

ოლიმპიურ თამაშებზე გოლფს თავისებური წესები აქვს, აქ ოთხრაუნდიანი ოთხდღიანი ტურნირი იმართება. თითოეულ რაუნდში მოთამაშეებმა 18 ფოსო უნდა აიღონ, ჯამში კი – 72. სხვადასხვა მოედანზე ცალკეული ფოსოსთვის დარტყმების ოპტიმალური რაოდენობა წინასწარაა განსაზღვრული. საბოლოო შედეგსაც ამ ნორმების დაცვა გადაწყვეტს.  საინტერესოა ისიც, რომ გოლფი სპორტის ერთადერთი ოლიმპიური სახეობაა, რომელსაც მსაჯი არ ჰყავს.

გოლფს მიმზიდველობას მასთან დაკავშირებული საინტერესო ამბები, ლეგენდები თუ ჟარგონებიც სძენს. ალბათ მეთვრამეტე საუკუნეში, შოტლანდიის ქალაქ სენტ-ენდრიუში, სადაც პირველი “გოლფის გზა” ჩამოყალიბდა, ვერავინ წარმოიდგენდა, რომ ეს იქნებოდა ერთ-ერთი სპორტი, რომელსაც რამდენიმე საუკუნის შემდეგ მთვარეზე ითამაშებდნენ. მართლაც, 1971 წელს ასტრონავტი ალან შეფარდი პირველი ადამიანი გახდა, რომელმაც გოლფი დედამიწის “გარეთ” ითამაშა. მან აპოლო 14-ის ბორტზე კავჩოგანი და ბურთები შეაპარა და ორი დარტყმა შეასრულა.

საუკუნეების განმავლობაში გოლფი დასვენების გარდა, ცხოვრების დახვეწილი წესის ნაწილი გახდა. მსოფლიოს გარშემო გოლფის მწვანე ფერდობების პირას უამრავი მეგობრობა, საქმიანი კავშირები თუ სასიამოვნო მომენტები შექმნილა. გოლფი თანდათან მაღალი დონის კურორტების თუ ექსკლუზიური მიმართულებების განუყოფელ ნაწილად იქცა. ბევრისთვის დღეს ესაა სპორტი, დასვენება, მოძრაობა, კავშირები, თავის დაღწევა ყოველდღიური ცხოვრების აბეზარი წვრილმანებისგან.

გოლფის სათამაშოდ საუკეთესო დრო ზაფხულია. თუ შაბათ-კვირას ქალაქთან ახლოს თავშესაქცევს ეძებთ, ახალი ჰობის შეძენა და სუფთა ჰაერზე სასიამოვნო გარემოში დროის გატარება საუკეთესო გადაწყვეტილებაა. სიმშვიდის, მოწმენდილი ცისა და სიმწვანის მაძიებლებისთვის SOLO-ს, Tbilisi Hills Golf-თან ერთად, საინტერესო შეთავაზება აქვს. ეწვიეთ Tbilisi Hills Golf-ს, გადაიხადეთ SOLO Visa ბარათით და მიიღეთ 20%-იანი ფასდაკლება გოლფის Green Card კურსზე, 10%-იანი ფასდაკლება კი შაბათის ბრანჩზე Tbilisi Hills Restaurant-ში

Tbilisi Hills Golf-ი 110 ჰექტარზე კეთილმოწყობილი სივრცეა გოლფის მოყვარულთათვის, რომელიც ევროპული სტანდარტის მომსახურებას სრულად ითვალისწინებს.