ნიჭიერი ადამიანების აღმოჩენა და განათლების მხარდაჭერა საქართველოს ბანკის ერთ-ერთი მთავარი პრიორიტეტია. სწავლა საუკეთესო გზაა, აღმოჩნდე ერთი ნაბიჯით წინ, ვიდრე გუშინ იყავი, სწორედ ამიტომ, საქართველოს ბანკი მომავალი თაობის განათლებაზე უწყვეტად ზრუნავს, რომ არ გავჩერდეთ.
თუ სწავლის სამაგისტრო პროგრამაზე გაგრძელებას გეგმავ, ალბათ Fullbright-ის პროგრამის შესახებ უკვე გსმენია. ალბათ ისიც იცი, რომ ამ სტიპენდიის მოსაპოვებლად გრძელი, მაგრამ საინტერესო გზის გავლა მოგიწევს. ყველაფერი, რაც ერთი შეხედვით რთული გეჩვენება, სწორად დახარჯული რესურსის შემდეგ საუკეთესო გამოცდილებად იქცევა ხოლმე.
შეიძლება, ბევრს ამ სტიპენდიის მიღება შეუძლებელი ეჩვენებოდეს ან იქამდე გასავლელი გზა ზედმეტად რთული ეგონოს. ასეთ დროს არაფერი სჯობს იმ ადამიანის გამოცდილების გაზიარებას, რომელმაც უკვე მიაღწია წარმატებას და რჩევებიც შეუძლია გაუზიაროს დაინტერესებულ პირებს.
სწორედ ამიტომ, ამ სტატიაში Fullbright-ის 2020 წლის სტიპენდიანტ გუგა ბურდულს გაგაცნობთ, რომელიც საქართველოს ბანკის სრული დაფინანსებით ფილადელფიაში Temple university-ში მონაცემთა მეცნიერებას (Data science) სწავლობდა.
სანამ ფულბრაიტის პროგრამაზე მოხვდებოდა, თავისუფალი უნივერსიტეტის ელექტრო და კომპიუტერული ინჟინერიის ფაკულტეტზე სწავლობდა. მალევე პროფესიული საქმიანობა თავისუფალ უნივერსიტეტშივე გააგრძელა და საგნის – „შესავალი ციფრულ ტექნოლოგიებში“ მოწვეული ლექტორი გახდა. გუგა არც აქ გაჩერებულა და სწავლის გაგრძელება Data Science მიმართულებით გადაწყვიტა. სწორედ აქ გამოჩნდა Fullbright მის ცხოვრებაში პირველად: 2019 წლის გაზაფხულზე მეგობარმა ფულბრაითისთვის ერთად მომზადება შესთავაზა და ასე დაიწყო მისი გრძელი, მაგრამ ნაყოფიერი თავგადასავალი.
„განაცხადის შევსება საკმაოდ ხანგრძლივი და შრომატევადია, ამიტომ მეგობრებმა გადავწყვიტეთ, ერთად გაგვევლო ეს პროცესი, ამან ბევრად გაამარტივა და უფრო სახალისო გახადა ეს თავგადასავალი. აპლიკაციის შევსების პარალელურად დავიწყეთ ჯიარის გამოცდისთვის მზადება, ჩემი პლიუსი მათემატიკური ნაწილი იყო და სხვებს ამაში ვეხმარებოდი, ჩემი მეგობრები კი ვერბალურ ნაწილსა და ესეების ნაწილში მეხმარებოდნენ. საბოლოო ჯამში კარგი ტანდემი გამოვიდა.“
გუგას თქმით, განსაკუთრებული მზადება აპლიკაციის შევსებისთანავე უნდა დაიწყო, რადგან ამ დროს უამრავი მნიშვნელოვანი მონაცემი შეგყავს. რაც მთავარია, წერ ესეს და შენთვის სრულიად უცხო ადამიანებს უხსნი, სად და რატომ გინდა სწავლის გაგრძელება, რაში გამოგადგება მიღებული ცოდნა და როგორ გამოიყენებ მას მომავალში – მთავარია, ზუსტად იცოდე, რა გამოძრავებს, რა არის შენი მოტივაცია.
“ფულბრაიტის სტიპენდიის მიღება, რეალურად, ერთწლიანი მარათონია, სწორედ ამიტომ, გამარჯვებისთვის მნიშვნელოვანია, სწორი მოლოდინების შექმნა და მზაობა გრძელვადიანი მზადებისთვის.”
თუკი, აპლიკაციის შევსებას აპირებ, გუგა გირჩევს, მზადება რაც შეიძლება ადრე დაიწყო. მნიშვნელოვანია საკუთარი თავის რწმენა გქონდეს და გჯეროდეს, სამივე ეტაპს წარმატებით გაივლი.
სწორედ ასე მოხვდა გუგა ფილადელფიის Temple University-ში Computational Data Science-ის ორწლიან სამაგისტრო პროგრამაზე
„ცხადია, ვიცოდი, რომ სწავლა იქ ბევრად რთული იყო, მაგრამ ამ მხრივ მაინც გაოცებული დავრჩი. სულ სხვანაირი მიდგომებია, უფრო მეტი რამეა ინდივიდუალიზმზე დამოკიდებული, რასაც აქ მიჩვეული არ ვიყავი. იმდენად სწრაფ ტემპში და რეჟიმში ცხოვრობ, ამ 2 წლის განმავლობაში შეგრძნება მაქვს, თითქოს 6 წელი ვიცხოვრე.“
ალბათ, გეცოდინება, რომ ფულბრაიტის აპლიკაცია 3 ეტაპს მოიცავს და გუგაც თითოეულის შესახებ გვიყვება:
„პირველი ეტაპი აპლიკაციის შევსებაა, სადაც აპლიკაციის შევსების გარდა გიწევს ესეების დაწერა, რეკომენდერების მოძიება. მეორე ეტაპი გასაუბრებაა, ჩემთვის ალბათ ყველაზე საინტერესო და მგონი ყველაზე მარტივი ეტაპიც ეგ გამოდგა. მესამე ეტაპი კი ყველაზე რთულია, გამოცდები: GRE და TOEFL, ჩემი რჩევა იქნება, რომ მინიმუმ აპლიკაციის შევსების დაწყებისთანავე დაიწყოთ მზადება გამოცდებისთვის.“
თუკი სამივე ეტაპს წარმატებით გაივლი, მნიშვნელოვანია გახსოვდეს, რომ გამოწვევები ამით არ სრულდება.
„მიუხედავად იმისა, რომ აქ კარგ სტუდენტად ვითვლებოდი, პირველ სემესტრში სწავლა ძალიან გამიჭირდა. დონე და მოლოდინები ძალიან განსხვავებულია. თან კოვიდი დამემთხვა, ონლაინ მომიწია სწავლა და ეს კიდევ უფრო ართულებდა პროცესს. მაგრამ პირველ სემესტრშივე მოვახერხე ადაპტაცია და მოვერგე იქაურ რიტმს. საკმაოდ შრომატევადი ორი წელი იყო, მაგრამ სწორედ ეგ გხდის უკეთესს და გავითარებს, როგორც პროფესიონალს, ასევე როგორც ადამიანს.“
მიღებულ ცოდნასთან ერთად Fullbright ცხოვრების უნიკალურ გამოცდილებასაც სთავაზობს ყველა სტუდენტს:
„უცხო ქვეყანაში მარტო ცხოვრების გამოცდილება არის ალბათ ყველაზე მთავარი, რაც ამ სტიპენდიამ მომცა. ჩემი აზრით, პროფესიულ განვითარებასთან ერთად განვივითარე სხვა ცხოვრებისეული უნარ-ჩვევები, რაც ბევრად ნიშვნელოვანი ნაწილი იყო ჩემი ამერიკული ცხოვრების.
ინდივიდუალიზმზე ბევრი რამ არის დამოკიდებული, შენი თავის გარდა ბევრი არავის იმედი უნდა გქონდეს, რაც საქართველოში ცალსახად პირიქითაა.
სამაგიეროდ გაქვს უსაზღვრო შესაძლებლობები, ალბათ არ არსებობს ამერიკაში შრომისმოყვარე ადამიანი, ვინც კარგად არ ცხოვრობს. ნებისმიერი მიმართულებით შეგიძლია მიაღწიო წარმატებას, თუ არ მოეშვები.“
Fullbright-ის სტიპენდია, რა თქმა უნდა, პიროვნულთან ერთად კარიერული განვითარების საწინდარიცაა:
„სტიპენდიამნუდიდესი გამოცდილება და თვითრწმენა მომცა, რაც მეხმარება გასაუბრებების მარტივად გავლაში. ასევე ახალი პროფესია შევისწავლე, რომლითაც ახლაც ვმუშაობ და 1 წელიწადში შევძელი საქართველოს ბანკის უფროსი მონაცემთა მეცნიერი გავმხდარიყავი“.
საქართველოს ბანკი ფულბრაიტის სამაგისტრო პროგრამას ამერიკის საელჩოსთან თანამშრომლობით 2014 წლიდან აფინანსებს. პროექტის ფარგლებში, ყოველწლიურად 1 გამორჩეულ სტუდენტს მთლიანად უფინანსდება 2 წლიანი სამაგისტრო პროგრამის სწავლისა და ცხოვრების ხარჯები. ჩვენი მხარდაჭერით სასწავლებლად უკვე 8 საუკეთესო სტუდენტი გაემგზავრა! პროექტის ყოველწლიური დაფინანსება კი 100 000 $-ია.
ვინ შეიძლება გახდეს სტიპენდიის კანდიდატი?
ყველას, ვისაც ბაკალავრიატის საფეხური დამთავრებული აქვს და სწავლის გაგრძელებას ნებისმიერი, მათ შორის MBA და STEM მიმართულებით აპირებს.
რა თარიღებს უნდა მიაქციო ყურადღება, თუკი სტიპენდიაზე განაცხადის შემოტანას აპირებ?
მომავალი სასწავლო წლისათვის აპლიკაცია 1 მაისიდან 1 აგვისტოს ჩათვლით მიიღება. აგვისტო-სექტემბრის პერიოდში აპლიკაციების მიღებასა და კითხვას ეთმობა დრო, სექტემბერში კი შორთლისტში მოხვედრილ კანდიდატებთან გასაუბრება გაიმართება. გამარჯვებული შემდეგი წლის ივნისის ბოლოს გამოვლინდება, გამარჯვების შემთხვევაში კი აგვისტოს ბოლოს გაემგზავრები აშშ-ში.
კონკურსში მონაწილეობის მსურველებს დაწვრილებითი ინფორმაციის მიღება ამერიკის საელჩოს ვებგვერდზე.