იმისათვის, რომ კიდევ უფრო მეტ სტუდენტს ჰქონდეს სწავლისა და განვითარების მოტივაცია, საქართველოს ბანკმა გასულ წელს წამოიწყო ახალი მასშტაბური სასტიპენდიო პროგრამა, რომელიც პარტნიორ უნივერსიტეტებში წარმატებულ სტუდენტებს შესაძლებლობას აძლევს, სწავლა დაიფინანსონ. სულ ახლახან პროექტს ქუთაისის საერთაშორისო უნივერსიტეტი (KIU) შემოუერთდა!
ქვემოთ გაეცნობი, ვის და როგორ შეუძლია KIU-ს სასტიპენდიო კონკურსში მონაწილეობა:
კონკურსის მონაწილეები
სტიპენდიის მოპოვება შეუძლია ნებისმიერ სტუდენტს, რომელიც სწავლობს საბაკალავრო პროგრამაზე, არის საქართველოს მოქალაქე და აქვს აქტიური სტუდენტის სტატუსი. კონკურსში მონაწილეობის მისაღებად განცხადებით უნდა მიმართო უნივერსიტეტის რექტორს.
დაფინანსების ოდენობა
საქართველოს ბანკის სტიპენდია დაფარავს სწავლის საფასურის 30, 50, 70 ან 100%-ს. იმ შემთხვევაში თუ სახელმწიფო ან სხვა ნაწილობრივი დაფინანსებით უკვე სარგებლობ, ამ სტიპენდიით შეძლებ სწავლის დარჩენილი გადასახადი დაიფინანსო. სტიპენდია ერთი სასწავლო წლის განმავლობაში შეგინარჩუნდება. მომდევნო წლიდან კი მოგიწევს, თავიდან გაუწიო კონკურენცია შენი მიმართულების საუკეთესო სტუდენტებს.
კრიტერიუმები
სტიპენდიის მოსაპოვებლად შენი აკადემიური მოსწრება, GPA, უნდა იყოს მინიმუმ 3.0, ხოლო სასწავლო წლის გასულ სემესტრში შეგროვებული უნდა გქონდეს მინიმუმ 24 კრედიტი. თუ კარგ აკადემიურ მოსწრებასთან ერთად KIU-ს სხვა აქტივობებშიც მონაწილეობ ხოლმე (მოხალისეობრივი აქტივობები, KIU სტუდენტური ელჩების პროგრამა, KIU პოდკასტი, KIU პროექტები, KIU კონფერენციები და ა.შ), უფრო დიდი შანსი გაქვს, გახდე საქართველოს ბანკის სტიპენდიატი.
თითოეული პარტნიორი უნივერსიტეტი პრიორიტეტულ მიმართულებებსა და სასტიპენდიო კონკურსის კრიტერიუმებს თავად განსაზღვრავს, შესაბამისად, ტექნიკური საკითხებისა და მოთხოვნების შესახებ დეტალურ ინფორმაციას შეგიძლია, შენი უნივერსიტეტის სასწავლო გვერდზე გაეცნო.
პარტნიორი უნივერსიტეტების სრული სია ჯერჯერობით ასე გამოიყურება:
- ილიას სახელმწიფო უნივერსიტეტი (ილიაუნი)
- ივანე ჯავახიშვილის სახელმწიფო უნივერსიტეტი (თსუ)
- თავისუფალი უნივერსიტეტი
- საქართველოს აგრარული უნივერსიტეტი
- აპოლონ ქუთათელა ძის სახელობის თბილისის სახელმწიფო სამხატვრო აკადემია ქართულ-ამერიკული უნივერსიტეტი (გაუ)
- საქართველოს ტექნიკური უნივერსიტეტი
- თბილისის სახელმწიფო სამედიცინო უნივერსიტეტი
- საქართველოს ეროვნული უნივერსიტეტი (სეუ)
- სოხუმის სახელმწიფო უნივერსიტეტი
- იაკობ გოგებაშვილის სახელობის თელავის სახელმწიფო უნივერსიტეტი
- ბათუმის სახელმწიფო საზღვაო აკადემია
- ბათუმის შოთა რუსთაველის სახელმწიფო უნივერსიტეტი
- შავი ზღვის საერთაშორისო უნივერსიტეტი (IBSU)
- ქუთაისის საერთაშორისო უნივერსიტეტი (KIU)
ჩამონათვალი საკმაოდ გრძელია, თუმცა საქართველოს ბანკი მომავალშიც არ აპირებს გაჩერებას და კიდევ უფრო მეტ უნივერსიტეტთან თანამშრომლობას გეგმავს.
ასე რომ, თუკი მისაღებ გამოცდებზე საკუთარი შესაძლებლობების გამოვლენა ბოლომდე ვერ შეძელი, გაქვს შანსი, საკუთარი შრომითა და მონდომებით მოიპოვო საქართველოს ბანკის სტიპენდია, ისწავლო საყვარელი სფერო ისე, რომ არ იფიქრო სწავლის გადასახადზე. გახსოვდეს, რომ შენ ირგვლივ უსაზღვრო შესაძლებლობებია, მთავარია, არასოდეს შეწყვიტო ცდა!