საქართველოს ბანკის სტიპენდიატი, რომელიც Fulbright-ის პროგრამით სწავლის შემდეგ Amazon-ში მუშაობს

საქართველოს ბანკი 2014 წლიდან Fulbright-ის სამაგისტრო პროგრამასთან თანამშრომლობს და განათლების შესაძლებლობებს ქმნის მათთვის, ვინ არ ჩერდება. ყოველწლიურად საქართველოს ბანკი Fulbright-ის პროგრამის ერთ ან რამდენიმე გამარჯვებულს აფინანსებს, რომელთაც სტიპენდიის ფარგლებში აშშ-ში უნივერსიტეტში სამაგისტრო საფეხურზე სწავლა და ცხოვრებისეული ხარჯები სრულად უფინანსდებათ.

Fulbright-ის სამაგისტრო პროგრამა მიზანდასახული და შრომისმოყვარე სტუდენტებისთვის სწორედ ის შესაძლებლობაა, რომლის ხელიდან გაშვებაც არ ღირს. ამაში მარიამ კვანტალიანის ისტორიაც დაგარწმუნებთ, რომელიც Fulbright-ის სამაგისტრო პროგრამაში საქართველოს ბანკის გამარჯვებული 2017 წელს გახდა, სწავლა აშშ-ში გააგრძელა, შემდეგ კი მუშაობა Amazon-ში დაიწყო.

გზა Fulbrightის სტიპენდიამდე

“Fulbright-ის სტიპენდიის მოპოვებამდე დელოიტში ფინანსური აუდიტორის პოზიციაზე (2015-2017) ვმუშაობდი. ბაკალავრიატი ბიზნესადმინისტრირების მიმართულებით 2015 წელს საქართველოს უნივერსიტეტში დავამთავრე. უცხოეთში სასწავლებლად წასვლაზე აქტიურად ფიქრი მესამე/მეოთხე კურსზე დავიწყე და შევეცადე, გამოცდებისათვის მზადება და GPA-ის გაუმჯობესება მაშინვე დამეწყო. ინსპირაცია ჩემი უფროსი და იყო, რომელმაც მაგისტრატურა ოქსფორდის უნივერსიტეტში დაამთავრა და 2012 წელს თავის გამოსაშვებ ცერემონიაზე წამიყვანა, მაშინ 19 წლის ვიყავი.

Fulbright-ის აპლიკაცია პირველად 2015 წელს შევავსე (2016 წლის გრანტისთვის), მაგრამ გასაუბრების ეტაპამდეც ვერ მივედი და უარი მივიღე. აღსანიშნავია, რომ იმ წელს MBA მიმართულება არ ფინანსდებოდა და მე აპლიკაცია ფინანსების სამაგისტრო ხარისხზე მქონდა გაგზავნილი. უკვე 2016 წელს გამოცხადდა, რომ MBA მიმართულებაზე დაამატებდნენ 1 კანდიდატს და მაშინვე გადავწყვიტე, ეს შანსი აუცილებლად გამომეყენებინა და ისევ მეცადა აპლიკაციის გაგზავნა, რაც წარმატებული აღმოჩნდა. ჩემთვის ამერიკაში წასვლა პრიორიტეტი იყო, რადგან ამ ქვეყანაში ძალიან ძლიერი MBA პროგრამებია. გარდა ამისა, Fulbright-ის პროგრამა ყველაზე მიმზიდველი იყო ჩემთვის, რადგან სრული დაფინანსების მოპოვება ისეთი პირობებით, როგორიც ამ პროგრამას ჰქონდა, იშვიათად მოიძებნებოდა”.

ახალი შესაძლებლობები Syracuse University-ში

“Syracuse University-მ ჩემს მოლოდინებს გადააჭარბა. ძალიან კმაყოფილი ვარ როგორც უნივერსიტეტის სასწავლო პროცესითა და პროფესორებით, ასევე სკოლაში არსებული მზრუნველი გარემოთი. მთელი ამ პერიოდის განმავლობაში ძალიან დიდი მხარდაჭერა მქონდა ბიზნესის სკოლის რექტორის, პროფესორებისა და მენტორისგან, რომლებთანაც დღემდე მაქვს მიმოწერა. MBA პროგრამა ორი მიმართულებით — ფინანსები და ბიზნეს ანალიტიკა — დავამთავრე. ეს ორი წელი სავსე იყო ბევრი საინტერესო გამოწვევით, შესაძლებლობითა და ცხოვრებისეული გაკვეთილებით. ასევე, მქონდა საშუალება, გამეცნო საინტერესო ადამიანები მსოფლიოს სხვადასხვა ქვეყნიდან და ერთმანეთის კულტურა გაგვეზიარებინა. სტუდენტურ ცხოვრებაშიც აქტიურად ვიყავი ჩართული. სწავლის პარალელურად ორი სტუდენტური კლუბის ბორდის წევრი, ასევე ასისტენტი მასწავლებელი და ბოლო სემესტრში ასისტენტი მკვლევარიც ვიყავი.

ვიტყოდი, რომ კონკრეტულ აკადემიურ გამოცდილებასთან ერთად ამ ორი წლის განმავლობაში გამეზარდა პროფესიული თვალსაწიერი და შევიძინე ე.წ. “soft skills”, რაზეც დროის გასვლასთან ერთად უფრო ვრწმუნდები, რომ კორპორატიულ სფეროში არანაკლებ მნიშვნელოვანია. მაგისტრატურის დამთავრების შემდეგ ჩემი სკოლის მენტორის დახმარებით, ენერგოსექტორში ფინანსური ანალიტიკოსის პოზიციაზე სრულგანაკვეთიანი სამსახური დავიწყე, სადაც რამდენიმე საინტერესო პროექტზე მომიწია მუშაობა. შემდგომში უკვე ეს გამოცდილება დამეხმარა Amazon-ის შესარჩევ ეტაპზე, 9 თვის შემდეგ კი Amazon-ში სამუშაოდ სიეტლში გადავედი”.

Amazon-ში მუშაობის გამოცდილება

“Amazon-ის შესარჩევი ეტაპი საკმაოდ რთული იყო. Fulbright-ის მსგავსად, პირველ ცდაზე Amazon-იდანაც უარი მივიღე. პირველი უარის შემდეგ სხვადასხვა პოზიციაზე CV ისევ გავგზავნე. აქედან რამდენიმე თვის შემდეგ კი, ისევ დაინტერესდნენ და ორი სატელეფონო ინტერვიუს შემდეგ “on-site” ინტერვიუზე დამიბარეს სიეტლში, სადაც ერთი დღის განმავლობაში 5 ინტერვიუ მქონდა (პანელური ინტერვიუ). Amazon-ის ინტერვიუს სპეციფიკური მეთოდი აქვს, კერძოდ, ლიდერობის 14 პრინციპი, რომლებზეც კანდიდატი უნდა დაიტესტოს. თითოეული ინტერვიუერი კონკრეტულ პრინციპებზე ამოწმებს კანდიდატს, შემდეგ ერთად იკრიბებიან და ერთხმად იღებენ გადაწყვეტილებას. ინტერვიუსთვის შეძლებისდაგვარად კარგად მოვამზადე და წარმატებულად ჩაიარა.

2020 წლის 17 თებერვალს მუშაობა სიეტლის ოფისში დავიწყე. ოფისში სულ 2 კვირა მომიწია სიარული, რადგან COVID-19-ის პერიოდი დაემთხვა და დისტანციურ მუშაობაზე მალევე გადავედით. სამწუხაროდ. ამერიკიდან წამოსვლა 6 თვეში მომიწია (Fulbright-ის პირობების გათვალისწინებით, აშშ-ში დარჩენა სტიპენდიატებს მაქსიმუმ 3 წელი შეგვიძლია). ასე რომ, სიეტლში ოფისში გამოცდილება დიდად არ მიმიღია, რადგან უმეტესად დისტანციურად ვმუშაობდი, თუმცა შიდა ტრანსფერის დახმარებით, 2020 წლის შემოდგომაზე ლუქსემბურგის ამაზონის ოფისში გადავედი. ამის შემდეგ ლუქსემბურგის ოფისში ვმუშაობ, რომელიც ევროპის სათავო ოფისია.

 უკვე 4 წელია, რაც Amazon-ში ვარ და ამ პერიოდის განმავლობაში 4 სხვადასხვა როლზე მომიწია მუშაობა ევროპის ტრანსპორტირების ფინანსების დეპარტამენტში. ჩემი ბოლო პოზიცია ევროპის სატრანსპორტო ქსელში მიმწოდებლების სტრატეგიას და სატრანსპორტო ქსელის ოპტიმიზირებას მოიცავდა. ამ წლის თებერვლიდან ახალ როლზე გადავდივარ, რომლის ფარგლებშიც, სახმელეთო ტრანსპორტირების ორგანიზაციის ფინანსური დაგეგმარების, რეპორტინგის და მდგრადობის მიმართულებებს ვუხელმძღვანელებ. მინდა. აღვნიშნო, რომ მდგრადობა ერთ- ერთი ყველაზე საინტერესო მიმართულებაა, რაც მოიაზრებს Amazon-ის ტრანსპორტირების ქსელის დეკარბონიზირებას ელექტრო გადამზიდი მანქანების გამოყენებით. ზოგადად, Amazon არის ძალიან დინამიკური და საინტერესო კომპანია, სადაც მაქვს შესაძლებლობა, ვიმუშაო ბევრ სხვადასხვა გუნდთან ჩემთვის საინტერესო პროექტებზე, ვიყო კრეატიული და სტრატეგიული გადაწყვეტილებები მივიღო. აქ მუშაობა მოსაწყენი არასდროს არ არის და ეს არის ადგილი, სადაც მუდმივად არის საშუალება ისწავლო, განვითარდე და სტრატეგიული ინიციატივები განახორციელო, რაშიც მთელი გუნდი გეხმარება, რასაც ძალიან ვაფასებ”.

პროფესიული განვითარება გრძელდება

“კონკრეტული გრძელვადიანი გეგმები ამ ეტაპზე არ მაქვს. ჯერჯერობით Amazon-დან წამოსვლას არ ვგეგმავ, რადგან ვფიქრობ, აქ ჯერ კიდევ ბევრი რამის სწავლა შემიძლია. ზოგადად, ჩემი გამოცდილებით, რასაც ვგეგმავ, ისე არ გამოდის ხოლმე, ამიტომ უბრალოდ ვცდილობ, ცხოვრების ყველა ეტაპზე ახალი გამოწვევები მაქსიმალურად მივიღო და პროფესიულ/პიროვნულ განვითარებაზე ვკონცენტრირდე. თუმცა, მჯერა, საქართველოში დაბრუნებისას აქ დაგროვილ ცოდნასა და გამოცდილებას გამოვიყენებ”.


განათლების (და არამარტო) რა შესაძლებლობებს ქმნის საქართველოს ბანკი, უფრო ვრცლად და შენზე მორგებული ინტერესების მიხედვით შეგიძლია ახალ პლატფორმაზე — CSR.BOG.GE ნახო.

არ გაჩერდე, გააგრძელე კითხვა