როგორ უნდა იპოვო შენი უსაზღვრო შესაძლებლობები კრეატიულ სფეროში — ინტერვიუ ეკა ყიფიანთან

კრეატიული ინდუსტრია დღეს სწორედ ის სფეროა, რომელიც ყოველწლიურად უფრო და უფრო მოთხოვნადი ხდება. თუ ახალ-ახალი იდეები მოსვენებას არ გაძლევს და შემოქმედებითობით აქამდეც ბევრი ადამიანი გაგიოცებია, დიდი შანსია, რომ შენი ადგილი სწორედ კრეატიულ ინდუსტრიაში იყოს.

როგორია კრეატიული ინდუსტრია საქართველოსა და ევროპაში, ვის შეუძლია ამ სფეროში თავისი თავი იპოვოს და ზუსტად რას ნიშნავს Art Direction-ისა და Copywriting-ის მიმართულებით მუშაობა, ამის შესახებ სააგენტო JWT Metro-ის კრეატიული დირექტორი, ეკა ყიფიანი, გვესაუბრა.

როგორ განსაზღვრავდით კრეატიულობას და როგორ ფიქრობთ, ვის აქვს შესაძლებლობა ამ სფეროში თავისი თავი იპოვოს?

ჩვენ ყველას გვაქვს თანდაყოლილი წარმოსახვის უნარი და ფანტაზია. მათი გამოყენებით ჩვენ შეგვიძლია შევქმნათ ისეთ რამე, რაც ახალი, უჩვეულო, სახეცვლილი, მოულოდნელი — ანუ კრეატიულია. ეს კრეატიული რამე (რაც შეიძლება იყოს ნახატი, ფილმი, მუსიკა, შენობა, პროდუქტი, ბიზნესი, ახალი ტექნოლოგია) კი ან არსებულ პრობლემებს წყვეტს, ან გარემოსთვის ახალ შესაძლებლობებს ქმნის. ეს სფერო არანაირად არაა სელექციური და იქ ყველას შეუძლია თავის პოვნა, თუ თან გაიყოლებს ცნობისმოყვარეობას, ფანტაზიას, სითამამეს, ახალი იდეების პოვნის და რაც მთავარია, მათი კეთების ძალიან დიდ სურვილს.

როგორ შეაფასებდით კრეატიულ ინდუსტრიას საქართველოსა და ევროპაში? როგორი იყო განვითარების გზა და როგორია ეს ინდუსტრია დღეს ჩვენს ქვეყანაში?

ევროპული კრეატიული ინდუსტრია სულ იყო და ახლაც ძალიან საინტერესო ადგილია. იქიდან ძალიან ბევრი ახალი და თამამი იდეა მოდის. შესაბამისად, ეს ტალანტებს იზიდავს და კიდევ უფრო აძლიერებს მის შემოქმედებით არსენალს. კრეატიული ინდუსტრია სრულად ტალანტებზე დგას. რაც შეეხება საქართველოს, შემოქმედებითი ინდუსტრია ჩვენთან მართლა კარგად არის განვითარებული, მაგრამ ვისურვებდი, რომ ბევრად უფრო სწრაფად მივდიოდეთ წინ, მაგალითად, როგორც ეს რამდენიმე წლის წინ იყო. 1-2 ბრენდს და რამდენიმე კოლექტივს თუ არ ჩავთვლით, პატარა შენელება შეინიშნება. თუმცა ეს დინამიკა ისტორიულად განმეორებადია თუ გავიხსენებთ მაგთის და ჯეოსელის ლეგენდარულ ეპოქას, შემდგომ უკვე სარკის მიერ განპირობებულ ძალიან დიდ ნახტომს და ბოლოს, რამდენიმე წლის წინანდელ სარეკლამო აფეთქებას, რომელსაც ბევრი ჯილდო და რეგიონისადმი დიდი ყურადღებაც მოყვა. შესაბამისად, გულით მჯერა, მალე ახალი დიდი ტალღა წამოვა, რომელიც ერთეული მოთამაშეების მიღმა მთელ სფეროს აიყოლიებს.

რას ნიშნავს დღეს Art Direction-ისა და Copywriting-ის მიმართულებით მუშაობა? რით განსხვავდება ისინი სხვა პროფესიებისგან?

ორივე ფიქრობს შემოქმედებითად, ორივე ფიქრობს იდეებზე — არტ დირექტორი ვიზუალებით, კოპირაიტერი კი სიტყვებით. ერთმა გამოსახულებების შექმნა უნდა უზრუნველყოს, მეორემ კი — ვერბალური კონცეფტების. ორივეს ნაფიქრი კი, უმეტეს შემთხვევაში, ერთ იდეაში უნდა გაერთიანდეს, რომ შექმნას ეფექტური და რაც მთავარია, დასამახსოვრებელი კომუნიკაცია. თუ თქვენ აზრებს ვიზუალებით გადმოსცემთ, არტ დირექტორი ხართ, თუ სიტყვებით, მაშინ — კოპირაიტერი. მიუხედავად იმისა, რომ არტ დირექტორს სიტყვა “დირექტორი” ურევია, ორივე პროფესია ერთნაირად მნიშვნელოვანია, ორივე აბსოლუტურად თანასწორია. მეტსაც გეტყვით, კონცეფტების საწყისი ჩანასახი ძალიან ხშირად კოპირაიტერის თავდაპირველი ნაფიქრიდან მოდის ხოლმე.

რა შესაძლებლობებს ქმნის ნიკა გუჯეჯიანის სახელობის სტიპენდია?

ნიკას სტიპენდია აკეთებს იმას, რაც ნიკას უნდოდა — შემოქმედებითობის განვითარება ჩვენი ქვეყნის ახალ თაობაში. ეს სტიპენდია მართლა დიდი ფუფუნებაა —შეგეძლოს წახვიდე და ისწავლო მსოფლიოს ერთ-ერთ საუკეთესო სარეკლამო სკოლაში სრული დაფინანსებით, შემდგომ გაიარო სტაჟირება საუკეთესო შემოქმედებით გუნდებთან და ძალიან უცებ შეიღო კარი დიდ კრეატიულ ინდუსტრიაში.

როგორია Miami Ad School Europe-ში სწავლის პერსპექტივა? რა უნარებს შეიძენს სტიპენდიატი და როგორ აისახება იქ მიღებული გამოცდილება სამომავლოდ?

პირველ რიგში, ძალიან მნიშვნელოვანია, სტიპენდიატს ესმოდეს, რომ ის სარეკლამო ინდუსტრიის პროფესიულ სასწავლებელშია. თუ მას ნამდვილად სურს ამ სფეროში მუშაობა, მაშინ Miami Ad School Europe იდეალური შესაძლებლობაა თავისი უკვე არსებული შემოქმედებითი უნარები განავითაროს და რაც მთავარია, დაეუფლოს საუკეთესო იდეების გამომუშავების პრაქტიკას. ფასდაუდებელი შესაძლებლობაა სტაჟირების გავლა და ასევე კრეატიულ კონკურსებში მონაწილეობების მიღება. რაც ყველაზე მნიშვნელოვანია, სტიპენდიატი სკოლას დატოვებს საკუთარი ნამუშევრების პორტფოლიოთი ხელში, რაც ამ ინდუსტრიის ყველაზე მნიშვნელოვანი ქონებაა. არავის აინტერესებს CV, ყველას აინტერესებს, რა გაგიკეთებია.

გვიამბეთ თქვენ შესახებ, როგორი იყო გზა JWT Metro-მდე და როგორ გრძელდება ახლა?

სარეკლამო სააგენტოში მოვხვდი შემთხვევით — სტაჟირების პროგრამით. ამ სააგენტოს მაკენ ერიქსონი ერქვა, მან ერთი, რომ ეს სფერო შემაყვარა და მეორე, ისეთი მეგობრები შემძინა, მთელი ცხოვრება რომ მეყოლება. შემდგომ სარეკლამო სააგენტო სარკეში გავაგრძელე გამოცდილების დაგროვება — უდიდესი ადგილი, ძალიან დინამიკური ყოველდღიურობით და წარმოუდგენლად მდიდარი ადამიანური ინტელექტით. ამის მერე იყო დრო, როდესაც ძალიან პატარა სააგენტოს თანადამფუძნებელიც ვიყავი. იქ ყველა შეცდომა დავუშვი და შემიძლია ვთქვა, რომ შესაბამისად, ყველაზე მეტიც ვისწავლე. შემდგომ კი მეტროს ჯერი მოვიდა. მანამდე კლიენტ სერვისის და სტრატეგიის დეპარტამენტში მუშაობის გამოცდილება მქონდა, აქ კი ძალიან შემთხვევითი მიზეზების თანწყობით მომიწია შემოქმედებითი მხარის დროებით ჩაბარება. ეს დროებითობა მუდმივობით შეიცვალა. ამის მერე 15 წელი გავიდა. ამ დროში ძალიან ბევრი რამე მოხდა, ზოგი კარგი, ზოგი კიდევ უფრო კარგი. დღეს მეტროში ახალი თაობაა, რომელიც საქართველოს კრეატიული ინდუსტრიის ძალიან გამორჩეულ ძალას წარმოადგენს და მათთან ერთად, იმედია, ძალიან ბევრი რამის გაკეთების საშუალება მექნება, ისეთი რაღაცების, რაც აქამდე არასდროს გაგვიკეთებია.

დაბოლოს, რა რჩევას მისცემდით Miami Ad School Europe-ში სწავლით დაინტერესებულ სტუდენტებს?

ამ სკოლაში ჩაბარებას არ სჭირდება სამუშაო პრაქტიკა, ან რაიმეს სწავლის პრერეკვიზიტი. მხოლოდ ერთი რამეა საჭირო — შემოქმედებითობაში ყოფნის ძალიან დიდი სურვილი, რომელიც იმდენად არ გასვენებთ, რომ სულ ახალ რაღაცას გაკეთებინებთ

უკვე 5 წელია, საქართველოს ბანკმა ნიკა გუჯეჯიანის სახელობის სტიპენდია შექმნა, რომელიც კრეატიულ და ნიჭიერ ახალგაზრდებს Miami Ad School Europe-ში Art Direction-ის და Copywriting-ის მიმართულებით სწავლას უფინანსებს. Miami Ad School Europe მსოფლიოში კრეატიული ინდუსტრიის მიმართულებით ყველაზე გავლენიანი სკოლაა, რომელიც კონკურენტუნარიან კადრებს ამზადებს და მათ დასაქმებაზეც აქტიურად ზრუნავს.

ნიკა გუჯეჯიანის სახელობის სასტიპენდიო პროგრამაზე მიღება უკვე დაიწყო და ის 12 მაისს დასრულდება. კონკურსში მონაწილეობისთვის გასავლელი ეტაპებს შესახებ ინფორმაციას აქ ნახავ.