როგორ ემზადებიან გუნდები STEM ოლიმპიადის ფინალისთვის – გორის მე-9 საჯარო სკოლა

საქართველოს ბანკის ერთ-ერთი ყველაზე მასშტაბური საგანმანათლებლო პროექტის, STEM ოლიმპიადის, ფინალისტები აქტიურად ემზადებიან ყველაზე დაძაბული და საინტერესო ფინალისთვის.

ოლიმპიადაში სულ 200-მდე სკოლა ჩაერთო. გორის N9 საჯარო სკოლის გუნდი ერთ-ერთია, რომელმაც რთულ კონკურენციას გაუძლო და საუკეთესო ათეულში მოხვდა.  გუნდის მენტორი და ფიზიკის მასწავლებელი, დავით ქრისტესიაშვილი, გვიყვება საფინალო სამზადისისა და მიღწეული შედეგების შესახებ.

როგორც დავითი ამბობს, პროექტში მონაწილეობისას გუნდის მთავარი მოტივაცია ახალი გამოცდილების მიღება იყო, რადგან ქართულ საგანმანათლებლო სივრცეში STEM მიმართულებით არც თუ ისე ბევრი შესაძლებლობაა:

 ,,STEM განათლება მოსწავლეებს უვითარებს კრეატიულობასა და ინოვაციურობას. ასევე, კვლევის, კრიტიკული აზროვნების, სამეწარმეო და სხვა მრავალ ისეთ უნარს, რომლებიც აუცილებელია 21-ე საუკუნის ადამიანისთვის. მნიშვნელოვანია სასწავლო პროცესის ტრადიციული საკლასო ოთახის გარეთ გადატანა და პრაქტიკული მუშაობის წილის ზრდა. ოლიმპიადის სტრუქტურა მოსწავლეებს საშუალებას აძლევს განივითარონ როგორც ინდივიდუალური, ისე გუნდური მუშაობის უნარები. ჩვენი პროექტში მონაწილეობის მიღების სურვილიც ამ ყველაფერმა განაპირობა. ვიცოდით, რომ ეს იქნებოდა ერთ-ერთი საუკეთესო გამოცდილება. თავისთავად, მოლოდინი გამართლდა.”

გორის მე-9 საჯარო სკოლის გუნდი ათეულში მოხვედრამდე ინტენსიურად ემზადებოდა პირველი ტურისთვის:

,,ოლიმპიადაში მონაწილეობის მიღების გადაწყვეტილების დღიდანვე დავიწყეთ მზადება. მოსწავლეების შერჩევის პროცესში სრულად ვითვალისწინებდით ორგანიზატორების რჩევებსა და რეკომენდაციებს, ფიზიკასა და პროგრამირებაში მეცადინეობებს მე ვატარებდი, თუმცა, საგნებში მომზადების გარდა, ხშირად ვსაუბრობდით ჩვენს ისეთ გამოცდილებებზე, რომლებიც დაგვეხმარებოდა წარმატების მიღწევაში. ვმსჯელობდით სხვადასხვა გაუთვალისწინებელი შემთხვევის მართვაზე, როგორ არ უნდა შეეშალა ხელი მსგავს გარემოებებს ოლიმპიადის მიმდინარეობისას. საბოლოოდ, ერთიანი ძალისხმევით, მოვედით აქამდე“

STEM ოლიმპიადა  მასწავლებლების პროფესიულ ზრდასაც უწყობს ხელს, როგორც დავითი გვეუბნება, თავად დამწყები მასწავლებელია და მენტორობის გამოცდილება აქამდე არ ჰქონია, მისთვის ეს გამოწვევა საინტერესო და ახალია:

,,ვფიქრობ, მასწავლებელს, მენტორს ცოდნის გადაცემაზე გაცილებით მეტი ვალდებულება აქვს მოსწავლის წინაშე. უმთავრესი გუნდის წევრების შთაგონება და მათთან ერთად ახალი შესაძლებლობების აღმოჩენაა. მომზადებისას პრაქტიკასთან ერთად, დროის გარკვეულ ნაწილს საუბარსაც ვუთმობდით. ვცდილობდი მათი მოტივაციის გაზრდასა და ხელშეწყობას”

საუკეთესო ათეულში მოხვედრა უკვე დიდი წარმატებაა გუნდისთვის, თუმცა წინ ფინალია, რომელიც განსხვავებული ფორმატისაა, ფინალისტ გუნდებს მოუწევთ თავი გაართვან ინჟინერიის პრაქტიკულ ამოცანებს. ამისთვის მათ ექნებათ 6 საათი და ყველა საჭირო რესურსით უზრუნველყოფილი ოთახი. გორის სკოლის გუნდი აქტიურად ემზადება ფინალში ასპარეზობისთვის. ფინალისტი გუნდები გადიან საქართველოს ბანკისა და კომაროვის სამთვიან უფასო  კურსს, რომელიც მათ ყველა მოსალოდნელი გამოწვევისა და ამოცანისთვის ამზადებს.

დავით ქრისტესიაშვილი ამბობს, რომ ფინალისთვის მოსწავლეებს დიდი მოლოდინები აქვთ:

,,ოპტიმისტურად ვართ განწყობილნი და ველოდებით 9 ივნისს. თუმცა გუნდი არ არის ორიენტირებული მხოლოდ გამარჯვებაზე. ვცდილობთ, მაქსიმალურად გამოვიყენოთ ყველანაირი შესაძლებლობა. ვისწავლოთ მეტი და გავიზარდოთ”

STEM ოლიმპიადის გამარჯვებულებს სულ რამდენიმე კვირაში გავიცნობთ, პირველადგილოსან გუნდს ელოდება საგანმანათლებლო საგზური ჟენევაში, CERN-ის (ბირთვული კვლევების ევროპული ორგანიზაცია) კვლევით ცენტრში. მათი სკოლის შენობაში კი მოეწყობა საგანმანათლებლო სივრცე STEM კუთხით. მეორე- და მესამეადგილოსანი გუნდები ტექნიკითა და სერტიფიკატებით დაჯილდოვდებიან.

არ გაჩერდე, გააგრძელე კითხვა