სხვადასხვა სასტიპენდიო და საგანმანათლებლო პროგრამასთან ერთად, საქართველოს ბანკი სპორტის მოყვარული მოსწავლეების წახალისებაზეც აქტიურად ზრუნავს. სწორედ ამ მიზნით, მალე სასკოლო ლიგა იწყება, რომლის მონაწილეებიც ერთმანეთს სპორტის სხვადასხვა სახეობაში შეეჯიბრებიან. საქართველოს ბანკის მიზანი ახალგაზრდებში სპორტის პოპულარიზაცია და ადრეული ასაკიდან ჯანსაღი ცხოვრების კულტურის ჩამოყალიბებაა, ამიტომ სასკოლო ლიგის ფარგლებში, ტურნირები სპორტის მრავალ სახეობაში ჩატარდება.
სასკოლო ლიგა გასულ წელს უკვე ჩატარდა და არაერთ მოსწავლეს საკუთარი ნიჭის აღმოჩენის საშუალებაც მისცა. წელს კი პროექტი უფრო მასშტაბური იქნება და სპორტული შეჯიბრებები აჭარაში, იმერეთში, კახეთში, ქვემო ქართლსა და თბილისში გაიმართება. თუ რატომ უნდა მიიღო მონაწილეობა სასკოლო ლიგაში და რა გამოცდილება გელის, ამის შესახებ წინა ნაკადის მონაწილეები შთაბეჭდილებებს გვიზიარებენ.
“სასკოლო ლიგაში მონაწილეობა ჩემთვის ძალიან დიდი გამოწვევა იყო, რადგან მასწავლებელთან ერთად ვალდებულება მეკისრებოდა, რომ ბავშვები ამერჩია, მომემზადებინა და მათთან ერთად გუნდურად მემუშავა. აქედან გამომდინარე, ძალიან დიდი გამოცდილება შევიძინე და ეს ყველაფერი შედეგზეც აისახა. ფრენბურთის სასკოლო ლიგაში ვმონაწილეობდი, ჩვენი სკოლის ისტორიაში კი ეს პირველი შემთხვევა იყო, როცა სპორტის ამ სახეობაში თასი ავიღეთ. აღსანიშნავია, რომ სასკოლო ლიგა პირველად ტარდებოდა და შესაბამისად, ძალიან ბედნიერი და ამაყი ვარ, რომ პირველივე სეზონში ჩვენ გავიმარჯვეთ და შევძელით, თავი ყველასთვის დაგვემახსოვრებინა. ჩემი გამოცდილებიდან ვფიქრობ, რომ სასკოლო ლიგაში მონაწილეობა საინტერესოა, რადგანაც საკმაოდ ბევრი სკოლაა ჩართული და ეს არის დიდი გამოცდილება, რომელიც ყველას აძლევს საშუალებას ახალი ადამიანები გაიცნონ, ისწავლონ ბარიერების გადალახვა და მზად იყვნენ გამარჯვებისთვის”, — ამბობს მარიამ ქაჯაია, თბილისის 180-ე საჯარო სკოლის მე-11 კლასის მოსწავლე.
მინი ფეხბურთი, კალათბურთი, რაგბი, ჭადრაკი, მაგიდის ჩოგბურთი, ფარიკაობა და მშვილდოსნობა — სასკოლო ლიგის სპორტის სახეობების მცირე ჩამონათვალია. სასკოლო ლიგის სპორტის სახეობების მრავალფეროვნებიდან გამომდინარე, მოსწავლეებს შესაძლებლობა ექნებათ, მათთვის საყვარელ სპორტის სახეობაში ჩაერთონ ან საკუთარი თავი სრულიად ახალ სახეობაში გამოცადონ.
“სასკოლო ლიგაში მონაწილეობა ძალიან კარგი გამოცდილება იყო. ბავშვები სკოლის სახელით გამოვედით, ჩვენს მწვრთნელსა და მასწავლებლებს კი დიდი იმედი ჰქონდათ, რომ მოვიგებდით. ხელბურთში მივიღე მონაწილეობა და ჩემი აზრით, სასკოლო ლიგაში ჩართვა კარგი გადაწყვეტილება იყო, რადგან მართლა საუკეთესო მწვრთნელები გვყავდა და გუნდშიც საუკეთესო ბავშვებთან ერთად ვიყავი, ყველაზე მეტად კი თამაშის დროს განცდილი ემოციები მომეწონა. ასევე, საკუთარ თამაშამდე სხვისი თამაშის ყურება, მათ შორის მოწინააღმდეგე გუნდების, ძალიან საინტერესო იყო და ტურნირში გატარებული დროც ძალიან კარგად მახსენდება”, — გვიყვება მარიამ ნიკოლაშვილი, თბილისის 175-ე სკოლის მე-7 კლასი მოსწავლე.
სასკოლო ლიგის ახალი ნაკადი 12 000-ზე მეტ ახალგაზრდას მისცემს საშუალებას, რომ სპორტის სხვადასხვა სახეობაში იასპარეზონ. ასე რომ, სკოლის მოსწავლეებს წინ დიდი აღმოჩენები, გამოწვევები და გამარჯვებები ელოდებათ. ილია ჭიკაიძის ისტორია კი იმაში დაგარწმუნებს, რომ მიზნის მისაღწევად ბოლომდე უნდა იბრძოლო და არ გაჩერდე.
“სასკოლო ლიგაში ჯერ კიდევ მეორე წელს ჩავერთე და მინი ფეხბურთში ვმონაწილეობდი. ტურნირში 3 წლის განმავლობაში ვმონაწილეობდი და ამ პერიოდში ძალიან ბევრი ემოცია განვიცადე როგორც დადებითი, ასევე უარყოფითი. პირველი ორი წელი არ იყო ისეთი, როგორსაც ვისურვებდით, მაგრამ როგორც გუნდი წლიდან წლამდე ვიზრდებოდით, შეცდომებზე ვსწავლობდით და ყველანი ერთი მიზნისკენ — ჩემპიონობისკენ მივიწევდით. ამ პროცესში ძალიან ბევრი რთული მომენტი იყო, რომელთა გადალახვაც მოგვიწია. ერთ-ერთი ასეთი მომენტი 1/4 ფინალიდან ტურნირიდან გამოთიშვა იყო, თუმცა შევძელით და ესეც გადავლახეთ. გასულ წელს რაც შეეხება, გუნდის წევრები ერთმანეთს შევპირდით, რომ მხოლოდ ჩემპიონობისთვის ვითამაშებდით, რადგან ეს იყო ჩვენი ბოლო შანსი სასკოლო ლიგის ჩემპიონები გავმხდარიყავით. ამის მიზეზი ისაა, რომ მე-12 კლასში (აბიტურიენტები) ვიყავით და ჩვენთვის ამ ტურნირზე გამოსვლის ბოლო წელი იყო. საბოლოოდ, ამ მიზანს მივაღწიეთ და რთულია იმის ახსნა, თუ რას გრძნობდა თითოეული ჩვენგანი საფინალო სასტვენის შემდეგ, თუმცა ეს იყო იმ შრომის დაგვირგვინება, რომელიც ამ 3 წლის განმავლობაში გავწიეთ.
მინდა, მადლობა გადავუხადო გუნდის თითოეულ წევრს იმ ყველაფრისთვის, რაც მათ გააკეთეს. მინდა, განსაკუთრებული მადლობა გადავუხადე მთავარ მწვრთნელ ლევან ფაილოძეს, რადგან გუნდად მან ჩამოგვაყალიბა და მის გარეშე ამ შედეგს ვერ მივაღწევდით. წლევანდელი სასკოლო ლიგა კიდევ უფრო მაღალ ეტაპზე ავიდა და ძალიან ბევრი სიახლეა, რომლებიც დარწმუნებული ვარ, მოსწავლეებს მონაწილეობის სურვილს გაუჩენს. ეს პროექტი წლიდან წლამდე ვითარდება და მისი მასშტაბებიც იზრდება. ყველას ვურჩევ, რომ ჩაერთონ ამ პროექტში და ის ემოციები განიცადონ, რომლებიც აქ მონაწილეობას თან ახლავს”, — ასე აფასებს სასკოლო ლიგას 186-ე საჯარო სკოლის კურსდამთავრებული და უკვე სტუდენტი, ილია ჭიკაიძე.
სპორტის მოყვარულ მოსწავლეებს სასკოლო ლიგის კიდევ უფრო მრავალფეროვანი სეზონი ელით წინ. თუ სპორტი შენი ცხოვრების ნაწილია ან რომელიმე სახეობაში თავის გამოცდა გინდა, მაშინ სასკოლო ლიგაში აუცილებლად უნდა ჩაერთო, რისთვისაც 8 დეკემბრამდე სკოლის ადმინისტრაციას ან სპორტი მასწავლებელს უნდა მიმართო.