საქართველოს ბანკმა პარტნიორ უნივერსიტეტებთან ერთად ქართველი სტუდენტებისთვის მასშტაბური სასტიპენდიო პროგრამა დაიწყო. მოტივირებულ და შრომისმოყვარე სტუდენტებს შანსი ეძლევათ, რომ საქართველოს ბანკის სტიპენდიატები გახდნენ და სწავლა დაიფინანსონ. იმას, თუ ვის შეუძლია სასტიპენდიო კონკურსში მონაწილეობა და რა კრიტერიუმებით შეირჩევა გამარჯვებული სტუდენტი, საქართველოს ბანკის პარტნიორი უნივერსიტეტები თავად განსაზღვრავენ, რომელთა სიასაც აქ ნახავ. სასტიპენდიო კონკურსში საქართველოს ბანკის ერთ-ერთი პარტნიორი ქართულ-ამერიკული უნივერსიტეტია. სასტიპენდიო კონკურსის კრიტერიუმებისა და ზოგადად, GAU-ის ღირებულებების შესახებ უნივერსიტეტის განვითარების სამსახურის უფროსს, გია ჩქოფოიას, ვესაუბრეთ, რომელმაც პროგრამით დაინტერესებულ სტუდენტებს არაერთი რჩევაც გაუზიარა.
“ქართულ-ამერიკული უნივერსიტეტის საქმიანობა დასავლურ დემოკრატიულ სივრცეში აღიარებულ ფუნდამენტურ ღირებულებებს ემყარება. უნივერსიტეტს ამ ღირებულებების სიკეთის ღრმად სწამს, ყოველდღიურ საქმიანობაში იყენებს და მათი განუხრელად დაცვისთვის ზრუნავს. დაარსების დღიდან GAU-სთვის მნიშვნელოვანია, რომ ახალგაზრდებთან სრულფასოვანი კომუნიკაცია დაამყაროს, რათა მათ საშუალება მიეცეთ, საქართველოში ამერიკული განათლება მიიღონ, დასავლურ ფასეულობებთან მუდმივ თანხვედრაში იყვნენ და რაც შეიძლება მეტი განვითარებისა და რეალიზების შესაძლებლობა ჰქონდეთ. სწორედ ამიტომ, როდესაც სტიპენდიის პროგრამის შესახებ შევიტყვეთ, თანამშრომლობის შესახებ გადაწყვეტილება მალევე მივიღეთ, რადგან საქართველოს ბანკის სასტიპენდიო პროგრამა სტუდენტებისთვის ის მნიშვნელოვანი საშუალებაა, რომელიც მათ შესაძლებლობებს კიდევ უფრო ზრდის”, — ამბობს გია ჩქოფოია.
სტიპენდიატები ქართულ-ამერიკული უნივერსიტეტისა და საქართველოს ბანკის ერთობლივი გადაწყვეტილებით შეირჩევიან. სასტიპენდიო კონკურსში მონაწილეობის მთავარი მოთხოვნაა, რომ GAU-ის სტუდენტი საქართველოს მოქალაქე იყოს და საბაკალავრო საფეხურზე სწავლობდეს. საქართველოს ბანკის სტიპენდიის მოპოვება ქართულ-ამერიკული უნივერსიტეტის ყველა ფაკულტეტის სტუდენტს შეუძლია. გამარჯვებული სტიპენდიატების გამოსავლენად კონკურსის ორი ეტაპი ჩატარდება: პირველ ეტაპზე სტუდენტს აკადემიური მოსწრებისა და მისი დეკანის რეკომენდაციის წარმოდგენა ევალება. მეორე ეტაპზე გადასულ კონკურსანტებს GAU-ის და საქართველოს ბანკის წარმომადგენლებთან გასაუბრება ელით და საბოლოო გამარჯვებულები სწორედ ამ გზით გამოვლინდება.
“GAU-ის ხუთივე ფაკულტეტი თანაბრად იქნება ჩართული ამ პროექტში და კონკურსში მონაწილეობის შესაძლებლობა ჩვენი ყველა სკოლის სტუდენტს ექნება. ამ შემთხვევაში, პრიორიტეტს არცერთ პროფესიასა და პროგრამას არ ვანიჭებთ, რადგან ეს ჩვენი პრინციპული მიდგომაა. ჩვენთვის მთავარია თითოეული ინდივიდი, მისი პოტენციალის აღმოჩენა და რეალიზება, რადგან როგორც საქართველოს ბანკი იტყვის ხოლმე, “შესაძლებლობები უსაზღვროა”, მთავარია მას მიაგნო, მოირგო და განავითარო. ესაა ჩვენი მისია: თითოეულ სტუდენტს საკუთარი ნიჭის აღმოჩენასა და მის პროფესიად ქცევაში დავეხმაროთ, რათა სამომავლოდ, საკუთარ საქმესა და პროფესიაში ყველა საფეხურზე ეფექტური, სტრატეგიულ შედეგზე ორიენტირებული და რაციონალური გადაწყვეტილებები მიიღონ, რომლებიც მათ ცხოვრებასა და წარმატებას განსაზღვრავს.
საგნები, რომლებსაც სტუდენტები შესაბამისი პროგრამის ფარგლებში გადიან, მათი დარგობრივი კომპეტენციისა და პროფესიული გამბედაობის ჩამოყალიბების გზაზე უაღრესად მნიშვნელოვანია. გამომდინარე იქიდან, რომ სტიპენდიის მიღება არსებითად აკადემიურ მოსწრებაზეა დამოკიდებული, ვფიქრობ, ეს დამატებითი შესაძლებლობა იქნება სტუდენტებს მოვუწოდოთ, რომ ფოკუსირდნენ თითოეულ საგანზე და მეთოდურად/ორგანიზებულად მიუდგნენ ცოდნის მიღების/გაღრმავების პროცესს. ამავე დროს, იყვნენ აქტიურები, პრეზენტაბელურები, იზრუნონ საკუთარ თავში ლიდერული თვისებების განვითარებაზე, რაც სტუდენტებს შესაძლებლობას მისცემს საჭირო რეკომენდაციები მოიპოვონ და გასაუბრების ეტაპზე საკუთარი თავი კარგად წარმოაჩინონ“, — აღნიშნავს გია ჩქოფოია.
საქართველოს ბანკის სტიპენდიით დაინტერესებულ სტუდენტებს გია ჩქოფოია ასეთ რჩევებს აძლევს. სასტიპენდიო კონკურსის აპლიკაციების მიღება თებერვალში დაიწყება, გამარჯვებულების ვინაობა კი მარტში გახდება ცნობილი. გამარჯვებულ სტიპენდიატს სწავლა ერთი წლით დაუფინანსდება და გამომდინარე იქიდან, რომ GAU-ში სწავლის საფასური პროგრამების მიხედვით განსხვავებულია, სტიპენდიის მოცულობა სწორედ ამ ფაქტორზე იქნება დამოკიდებული.
“რასაკვირველია, უნივერსიტეტი მიესალმება საქართველოს ბანკის ინიციატივას — ხელი შეუწყოს მოტივირებულ სტუდენტებს. სასტიპენდიო პროგრამის დაწესება და შესაბამისი კონკურსის გამოცხადება სტუდენტებისთვის ერთგვარ სტიმულს წარმოადგენს, რომ მეტად ფოკუსირდნენ აკადემიურ პროცესსა და იმ ფაქტორებზე, რომლებიც არა მარტო სტიპენდიის მიღების შანსს გაზრდის, არამედ შრომის ბაზარზე მათ უფრო კონკურენტუნარიანებს გახდის. სტუდენტობა ერთგვარი ტრანსფორმაციის გზა, ძიებისა და აღმოჩენების პროცესია. ამ გზაზე მნიშვნელოვანია ისეთი გადაწყვეტილებების მიღება, რომლებიც ძველს ახლით თამამად შეცვლის, ცვლილებებს არ შეუშინდება და შეუქცევად განვითარების პროცესს უზრუნველყოფს. ამიტომ, ბოლო მთავარი რჩევა, რომელსაც სტუდენტებს მივცემდი, ასეთია: იფიქრეთ სტრატეგიულად და მიიღეთ გადაწყვეტილებები, რომლებიც ორიენტირებული იქნება შესაძლებლობების ეფექტურად გამოყენებასა და რაც შეიძლება მეტი რესურსის დაგროვებაზე, რადგან ეს რესურსები და ცოდნა შემდგომ თქვენი წარმატების მთავარი გზამკვლევი იქნება”, — დასძინა გია ჩქოფოიამ.
GAU-ში საქართველოს ბანკის სტიპენდიის მიღების შესახებ დამატებით ინფორმაციას აქ შეგიძლია გაეცნო.