რა შესაძლებლობებს ქმნის ფულბრაიტის სამაგისტრო პროგრამა — ინტერვიუ სტიპენდიატ გვანცა დოლბაიასთან


განათლების ხელშეწყობა საქართველოს ბანკისთვის ერთ-ერთი პრიორიტეტული მიმართულებაა. სხვადასხვა სასტიპენდიო პროგრამისა და პროექტის ფარგლებში, ფინანსური ინსტიტუტი განათლების შესაძლებლობებს ქმნის მათთვის, ვინც განვითარების გზაზე არ ჩერდება. ამ მიზნით, საქართველოს ბანკი ფულბრაიტის სამაგისტრო პროგრამასთან 2014 წლიდან თანამშრომლობს და მოტივირებულ ახალგაზრდებს ყოველწლიურად აძლევს შესაძლებლობას, რომ სამაგისტრო საფეხურზე სწავლა აშშ-ში სრული დაფინანსებით გააგრძელონ, რაც დამატებით ყოველთვიურ სტიპენდიასაც მოიცავს. 

ფულბრაიტის სამაგისტრო პროგრამაზე საქართველოს ბანკის წლევანდელი გამარჯვებული სტიპენდიატები უკვე გამოვლინდნენ, რომელთა შორის გვანცა დოლბაიაა. სტიპენდიატი პროგრამის შესაძლებლობებისა და სამომავლო გეგმების შესახებ გვიყვება.

ფულბრაიტის სამაგისტრო პროგრამაზე საქართველოს ბანკის სტიპენდიატი გახდით. როგორი იყო შერჩევის ეტაპები?

ფულბრაიტის სამაგისტრო პროგრამა ერთ-ერთი ყველაზე კონკურენტული პროექტია არა მხოლოდ საქართველოში, არამედ ყველა იმ ქვეყანაში, რომელშიც სტუდენტებს ეძლევათ შანსი, აშშ-ის წამყვან უნივერსიტეტებში სწავლა სრული დაფინანსებით გააგრძელონ. სწორედ ამიტომ, შერჩევის ეტაპები კომპლექსური და ხანგრძლივია. გამოვყოფდი შესარჩევი პროცესის პირველ ეტაპს — აპლიკაციის პერიოდს, რომელიც საკვანძო მნიშვნელობისაა. ეს არის ეტაპი, რომელიც თვითრეფლექსიის ფართო მასშტაბებს მოითხოვს: განვლილი კარიერული გზის ლოგიკურ დაკავშირებას აშშ-ის სამაგისტრო პროგრამასთან და რეალური მიზნის დასახვას, თუ როგორ არის შესაძლებელი ფულბრაიტის ფინალისტის მიერ ამერიკის უნივერსიტეტში მიღებული ცოდნისა და გამოცდილების რეალიზება საქართველოში დაბრუნების შემდეგ. აპლიკაციის პერიოდის შემდეგ, რომელიც განსაკუთრებული სიცხადით სწორედ ამ ფაქტორის გამო მახსოვს, გავიარე გასაუბრება ამერიკის საელჩოში და ბოლოს ჩავაბარე ინგლისური ენის TOEFL გამოცდა. ამ ეტაპების წარმატებით გავლის შემდეგ, მარტის ბოლოს, მივიღე პასუხი, თუ რომელ უნივერსიტეტში ვაგრძელებდი სწავლას.

ელოდით თუ არა გამარჯვებას?

წელს პირველად გადავწყვიტე ფულბრაიტის კონკურსში მიმეღო მონაწილეობა და პირველივე მცდელობა, საბედნიეროდ, წარმატებული აღმოჩნდა. რაც შეეხება ველოდი თუ არა გამარჯვებას, არ დავმალავ და ვიტყვი, რომ ველოდი. თავდაჯერება მომცა აპლიკაციის ფორმის გააზრებულად შევსებამ. მჯეროდა, რომ აპლიკაციაში ჩემ მიერ დასახული მიზნები რეალური იყო და სწავლის შემდეგ საქართველოში დაბრუნებისას ამ ყველაფერს ნამდვილად განვახორციელებდი. რა თქმა უნდა, ჩემს მიზნებში არც ახლა მეპარება ეჭვი.

აშშის რომელ უნივერსიტეტში და რომელი მიმართულებით აგრძელებთ სწავლას? როგორია თქვენი კარიერული გეგმები?

სწავლას ვაგრძელებ ნოტრ დამის უნივერსიტეტის სამართლის სკოლაში (Notre Dame University Law School) ადამიანის უფლებების საერთაშორისო სამართლის პროგრამაზე. ჩემი კარიერული გეგმები უკავშირდება სწორედ საერთაშორისო სამართლის სფეროში მუშაობის გაგრძელებას. დღეს საქართველოში ვმუშაობ ადამიანის უფლებების იურისტად და ადამიანის უფლებათა ევროპულ სასამართლოში საქართველო-რუსეთის სახელმწიფოთაშორისო დავაზე მუშაობის შემდეგ, დარწმუნებული ვარ, რომ ადამიანის უფლებების დაცვა ჩემი მოწოდებაა. ამიტომ, შტატებში მაგისტრატურის საფეხურის დასრულების შემდეგ ვგეგმავ საერთაშორისო ორგანიზაციებისა და რეგიონული/საერთაშორისო სასამართლოებში მუშაობისკენ ავიღო გეზი. განსაკუთრებით მაინტერესებს პოსტკონფლიქტურ სიტუაციებსა და მყიფე დემოკრატიის პირობებში ადამიანის უფლებების დაცვის სამართლებრივი ჩარჩოს შემუშავება/გაუმჯობესება და საუკეთესო პრაქტიკების დანერგვა.

რა შესაძლებლობებს ქმნის საქართველოს ბანკის სტიპენდიატობა და როგორ შეცვლის თქვენს ცხოვრებას?

საქართველოს ბანკის სტიპენდიატობამ მომცა უნიკალური შესაძლებლობა, მივიღო უმაღლესი განათლება იმ უნივერსიტეტში, რომელში სწავლაც დიდი პრესტიჟი და პრივილეგიაა. ყველაზე მთავარი კი, ალბათ, ის კავშირებია, რომლებსაც ფულბრაიტის პროგრამის ფარგლებში, საქართველოს ბანკის სტიპენდიატობის დამსახურებით დავამყარებ. რას შეცვლის სტიპენდიატობა ჩემს ცხოვრებაში — ამაზე პასუხს სრულყოფილად მას შემდეგ შევძლებ, რაც შტატებიდან საქართველოში დავბრუნდები. თუმცა მხოლოდ სასიკეთო ცვლილებებს ველოდები — მაგისტრის ხარისხით და საქართველოს ფარგლებს შიგნით და მის გარეთ დამყარებული კავშირებით. საქართველოს ბანკთან მჭიდრო თანამშრომლობით, ვგეგმავ განსაკუთრებული კონტრიბუცია შევიტანო ადამიანის უფლებების საერთაშორისო სამართლის დოქტრინისა და პრაქტიკის განვითარებაში.

დაბოლოს, რას ურჩევდით მათ, ვინც ფულბრაიტის სამაგისტრო პროგრამაში სამომავლოდ აპირებს მონაწილეობას?

უპირველესად, ყველას ვურჩევ კონკურსის თითოეულ ეტაპზე შეიმუშაონ სამოქმედო გეგმა — კარგად დაუფიქრდნენ, თუ რა არის კონკრეტული ეტაპის მიზანი და როგორ შეუძლიათ გამოიყენონ ეს პროცესი თავიანთი შესაძლებლობების საუკეთესოდ წარმოსაჩენად. ასევე, ყველას ვურჩევ, დაუთმონ დრო ესეებს და გადმოსცენ მხოლოდ სიმართლე თავიანთი თავის და სამომავლო მიზნების შესახებ. თანაბარმნიშვნელოვანია თადარიგის დაჭერა რეკომენდატორების არჩევისას და სარეკომენდაციო წერილების ატვირთვისას — ხშირად ეს საკმაოდ ხანგრძლივი პროცესია.

არ გაჩერდე, გააგრძელე კითხვა