ნიკა გუჯეჯიანის სახელობის სასტიპენდიო კონკურსი დაიწყო

ნიკა გუჯეჯიანის სახელობის სასტიპენდიო კონკურსი დაიწყო!  სტიპენდიამ 2019 წლიდან დღემდე არაერთი ნიჭიერ, შემოქმედებით ადამიანს მისცა  ბერლინში გამგზავრებისა და კრეატიულ ინდუსტრიაში  ყველაზე პრესტიჟულ Miami Ad School-ში სწავლის შესაძლებლობა სრული დაფინანსებით.

თუ საინტერესო იდეები გაქვს და გიყვარს ამბების მოყოლა სიტყვებით, ფორმებით, თუ ფერებით, მაშინ Miami Ad School საუკეთესო ადგილია წარმატებების მისაღწევად. აუცილებლად გაეცანი ბლოგს და გაიგე მეტი სტიპენდიის შესახებ.

რამდენხნიანია სწავლება და როგორია ფორმატი?

წელს 2-წლიანი პროგრამის ნაცვლად, Miami Ad School სტიპენდიატს ერთწლიან ჰიბრიდულ პროგრამას სთავაზობს Art Direction-ის ან Copywriting-ის მიმართულებით. სასწავლო წელი დაყოფილია 4 ნაწილად: 30 კვირა ეთმობა თეორიულ და პრაქტიკულ სწავლებას, ხოლო ბოლო 10 კვირის განმავლობაში სტუდენტი სტაჟირებას გაივლის ცნობილ სარეკლამო სააგენტოებში და რეალურად გამოიყენებს მიღებულ ცოდნას. სასწავლო წლის ნახევარს სტუდენტი ბერლინში გაატარებს, ხოლო მეორე ნახევარს საქართველოში და ონლაინ დაესწრება ლექციებს.  სტიპენდიატი თავად ირჩევს, წლის რომელ ნაწილებს გაატარებს ბერლინში, თუმცა Miami Ad School მომავალ გამარჯვებულს ურჩევს, სწავლის ბოლო 10 კვირა, ანუ სტაჟირება ბერლინში გაიაროს უკეთესი გამოცდილებისთვის.

რა ხარჯებს ფარავს სტიპენდია?

საქართველოს ბანკის სტიპენდია 100%-ით ფარავს Miami Ad School -ის 1-წლიანი  პროგრამის საფასურს და ამასთან ერთად სრულად დააფინანსებს გამარჯვებულის ცხოვრების ხარჯებს ბერლინში.

რა არის საჭირო კონკურსში  მონაწილეობისთვის?

იმისათვის, რომ მონაწილეობა მიიღო კონკურსში და მოიპოვო ნიკა გუჯეჯიანის სახელობის სტიპენდია, აუცილებელია, იყო საქართველოს მოქალაქე, გაინტერესებდეს კრეატიული ინდუსტრია და გქონდეს პორტფოლიო, რომლითაც შენი ინტერესებისა და შემოქმედებითობის დემონსტრირებას შეძლებ. არ გჭირდება ინგლისური ენის ცოდნის დამადასტურებელი სერტიფიკატი, თუმცა კარგად უნდა იცოდე ინგლისური, რომ სასწავლო მასალის გაგება და გასაუბრებაზე  გამართულად საუბარი შეძლო. არ დაგჭირდება დიპლომი, არც სხვა აკადემიური ხარისხის დამადასტურებელი დოკუმენტი. Miami Ad School-ისთვის მნიშვნელოვანია მხოლოდ კანდიდატის უნარები და შესაძლებლობები. ამიტომ, სათანადო დრო და ყურადღება დაუთმე პორტფოლიოს.

როგორ შევავსო აპლიკაცია ?

კონკურსში მონაწილეობის მისაღებად რეზიუმე და პორტფოლიო ინგლისურ ენაზე უნდა გაგზავნო მეილზე info@miamiadschool.de  ბმულების სახით,  Subject – ში კი მიუთითე NIKA25. გაითვალისწინე, მეილი უნდა შეიცავდეს მხოლოდ ტექსტსა და ბმულებს დამატებითი ფაილების (attachments) გარეშე. აპლიკაციების მიღების დედლაინი 25 ივლისია.

რატომ შეიქმნა ნიკა გუჯეჯიანის სახელობის სტიპენდია?

ნიკა გუჯეჯიანი 2014-2016 წლებში სწავლობდა Miami Ad School-ში, Art Direction-ის მიმართულებით. ნიკა საქართველოს ბანკის კრეატიული დირექტორი იყო და წლების განმავლობაში უამრავი საინტერესო პროექტი შექმნა, რითიც ხელი შეუწყო საქართველოში კრეატიული ინდუსტრიის განვითარებას. მისი საქმის გაგრძელებისთვის  Miami Ad School-მა და საქართველოს ბანკმა ერთობლივად შექმნეს ნიკა გუჯეჯიანის სახელობის სტიპენდია, რომელიც მხარს უჭერს ნიჭიერ და პერსპექტიულ ახალგაზრდებს. პროგრამის მიზანია ხარისხიანი განათლების შესაძლებლობები შექმნას ადამიანებისთვის, რომლებიც ინოვაციური იდეებით გააგრძელებნ ნიკას გზას და შეიტანენ წვლილს ქართული კრეატიული სივრცის განვითარებაში.

როგორც გასული წლების სტიპენდიატები გვიყვებიან, არ სჯეროდათ, რომ კონკურსში გამარჯვებას შეძლებდნენ. თუ შენც ეჭვი გეპარება საკუთარ შესაძლებლობებში, ბევრი არ იფიქრო, არ გაჩერდე განათლების გზაზე და აუცილებლად სცადე!  Miami Ad School არის ადგილი, სადაც შეგიძლია საინტერესო იდეები რეალობად აქციო, გაიცნო შენსავით ნიჭიერი ადამიანები სხვადასხვა ქვეყნიდან, იმუშაო სფეროში ყველაზე წარმატებული პროფესიონალების გვერდით. ასე რომ, გამოიყენე შესაძლებლობა, იქნებ 2025 წლის გამარჯვებული სწორედ შენ ხარ!

დეტალურ ინფორმაციას სტიპენდიისა და პროგრამების შესახებ ამ ბმულზე ნახავ.