კინგსის ოლიმპიადა – სუპერფინალები და სეზონის დასასრული

კინგსის ოლიმპიადის წლევანდელი სეზონი დასასრულს უახლოვდება. საქართველოში ყველაზე მასშტაბური ოლიმპიადის მთავარი მხარდამჭერი წელს საქართველოს ბანკია. საქართველოს ბანკი ცდილობს განათლება რაც შეიძლება მეტი ადამიანისთვის გახადოს ხელმისაწვდომი და ამ მიზნის განსახორციელებლად კომპანია არაერთ პროექტს ახორციელებს. კინგსისა და საქართველოს ბანკის დამეგობრებაც საერთო ხედვამ განაპირობა. კინგსის საორგანიზაციო ჯგუფი ოლიმპიადას უყურებს არა როგორც შეჯიბრსა და შედეგს, არამედ როგორც პროცესს და განვითარების შესაძლებლობას. ოლიმპიადა მოსწავლეებს აძლევს საკუთარი ცოდნის შეფასების საშუალებას და მეტი სწავლის სტიმულს.

კინგსის ოლიმპიადების ორივე ტური სამ საგანში, ინგლისურში, მათემატიკასა და ქართულში უკვე  ჩატარდა. ოლიმპიადებმა საქართველოს 12 დიდი ქალაქი მოიცვა: თბილისი, რუსთავი, ქუთაისი, ბათუმი, ზუგდიდი, გორი, თელავი, ახალციხე, ზესტაფონი,ოზურგეთი, სამტრედია, ფოთი. ფინალში მოსწავლეებმა საკმაოდ მაღალი შეფასებები დაიმსახურეს, ბევრი ერთნაირად მაღალი შედეგის გამო გამარჯვებულების გამოსავლენად ჩატარდება ძალიან დაძაბული და საინტერესო სუპერფინალები.

სამივე ოლიმპიადაში ერთად მონაწილეობა 80 ათასამდე მოსწავლემ მიიღო, მოსწავლეების დაახლოებით 50% რეგიონებიდან არიან. როგორც კინგსის მარკეტინგის მენეჯერი, სოფო სრესელი, გვეუბნება რეგიონების აქტიურობა წლიდან წლამდე სულ უფრო და უფრო იზრდება, რაც განსაკუთრებით სასიხარულოა. რეგიონის სკოლებიც ზუსტად ისევე უნდა იყოს ჩართული საგანმანათლებლო პროექტებში, როგორც დედაქალაქის სკოლები, გეოგრაფიული თუ სოციალური გარემოებების მიუხედავად, ყველა მოსწავლეს ერთნაირი საგანმანათლებლო შესაძლებლობები უნდა ჰქონდეს.

საქართველოს ბანკმა ფინალში მონაწილეობის საფასური სრულიად დაუფინანსა სოციალურად დაუცველ მოსწავლეებს. sCool ბარათის მფლობელ მონაწილეებს კი შეეძლოთ 20%-იანი ფასდაკლებით ესარგებლათ ოლიმპიადის მეორე ტურის საფასურის გადახდისას. კინგსის ოლიმპიადაზე დარეგისტრირებულ ყველა მოსწავლეს  საჩუქრად 1 თვით ლუპის პრემიუმ პაკეტი გადაეცათ.

მათემატიკის მეორე ტური 17 დეკემბერს ჩატარდა.  10 000-ზე მეტ ფინალისტს 1 საათში 15 სააზროვნო ამოცანის შესრულება მოუწია. კინგსის ოლიმპიადის ტესტები ორიენტირებულია მოსწავლეების აზროვნებისა და მსჯელობის უნარების გამოვლენაზე. პირველი ტურის ტესტები მეტწილად ეყრდნობა სასკოლო მასალებს, მეორე ტურის ფინალური ტესტები კი ნაკლებად შაბლონურია და დავალებების შესასრულებლად ფაქტობრივ ცოდნასთან ერთად ამ ცოდნის ინტერპრეტირების უნარებია საჭირო.

როგორც სოფო სრესელი გვეუბნება, ყველაზე ნაკლებად ოლიმპიადაში მე-11, მე-12 კლასის მოსწავლეები არიან ჩართულები, რადგან ეროვნულ გამოცდებზე არიან ფოკუსირებულნი:

,,აბიტურიენტების ოლიმპიადაში ჩართვა ყველაზე დიდი გამოწვევაა ჩვენთვის, ვცდილობთ, მათ ვაჩვენოთ, რომ ოლიმპიადა ეხმარება მათ საგამოცდო სტრესის დაძლევაში, აჩვევს სააზროვნო ამოცანებთან მუშაობასა და დროის მენეჯმენტს“.

სეზონის კულმინაციური ღონისძიება, დაჯილდოების ცერემონია, 10 იანვარს სეუს უნივერსიტეტში გაიმართება. ამ დროისათვის ჩატარებული იქნება სუპერფინალები და გვეცოდინება გამარჯვებულების რაოდენობა. თითოეული  საგნის ყველა საკლასო კატეგორიიდან სამი გამარჯვებული გამოვლინდება, ანუ დაახლოებით 90 მოსწავლე.

დაჯილდოების მეორე დღეს, 11 იანვრიდან,  გამარჯვებულები კინგსის ზღაპრულ ბანაკში გაემგზავრებიან, სადაც საგანმანათლებლო-ინტელექტუალური აქტივობებთან ერთად, წინ უამრავი თავგადასავალი და საინტერესო ამბები ელით.

არ გაჩერდე, გააგრძელე კითხვა