მოტივირებული და შრომისმოყვარე ახალგაზრდებისთვის საქართველოს ბანკი სხვადასხვა საგანმანათლებლო პროექტით სწავლის დაფინანსებას განაგრძობს. ჩივნინგის, ფულბრაიტისა თუ სხვა სასტიპენდიო პროგრამების ფარგლებში, საქართველოს ბანკის მხარდაჭერით, არაერთი ქართველი სტუდენტი საზღვარგარეთ სრული დაფინანსებით სამაგისტრო საფეხურზე უკვე სწავლობს. ამჯერად კი საქართველოს ბანკი სტიპენდიების ახალ მასშტაბურ პროექტს იწყებს იმ ახალგაზრდებისთვის, რომლებიც სწავლას საქართველოს უნივერსიტეტებში აგრძელებენ.
პარტნიორ უნივერსიტეტებთან ერთად, საქართველოს ბანკი მოტივირებულ და ლიდერობის უნარებით დაჯილდოებულ სტუდენტებს სწავლის დაფინანსების შესაძლებლობას სთავაზობს. ახალი საგანმანათლებლო პროექტის ფარგლებში, სტუდენტები სხვადასხვა ტიპის სტიპენდიის მოპოვებას შეძლებენ, რაც იმ მიმართულებაზეა დამოკიდებული, რომლის სწავლაც სურთ. მათ შორის კი, ერთ-ერთი გიორგი ჩახავას სახელობის სტიპენდიაა, რომლის მოპოვებაც არქიტექტურის სტუდენტებს შეეძლებათ.
ახალი საგანმანათლებლო პროექტის ფარგლებში, გამორჩეული ქართველი არქიტექტორის, გიორგი ჩახავას, სახელობის სასტიპენდიო პროგრამა საქართველოს ბანკის ინიციატივით შეიქმნა. სასტიპენდიო პროგრამა იმ სტუდენტებს, რომლებიც არქიტექტურის ფაკულტეტზე ოთხ პარტნიორ უნივერსიტეტში (თავისუფალი უნივერსიტეტი, საქართველოს ტექნიკური უნივერსიტეტი, სამხატვრო აკადემია, ბათუმის შოთა რუსთაველის სახელმწიფო უნივერსიტეტი) ჩაირიცხებიან, სწავლის 100%-ით ან ნაწილობრივ დაფინანსების შანსს აძლევს. საქართველოს ბანკის ჩახავას სასტიპენდიო პროგრამის გამარჯვებულებს პარტნიორი უნივერსიტეტები თავად შეარჩევენ, რაც თითოეულის მიერ შემუშავებულ კრიტერიუმებსა და პრიორიტეტულ მიმართულებებზეა დამოკიდებული. სტიპენდიის მოპოვების მსურველები დეტალურ ინფორმაციას უნივერსიტეტის ვებგვერდის მეშვეობით ან ადმინისტრაციის დახმარებით მიიღებენ.
სტიპენდია, რომელიც მომავალი წარმატებული არქიტექტორების აღმოჩენის შანსს გვაძლევს, სწორედ იმ არქიტექტორის სახელობისაა, რომლის ხედვებიც დროს უსწრებდა. გიორგი ჩახავას ეკუთვნის არაერთი ეპოქალური პროექტის იდეა, რომლებიც საქართველოს ფარგლებსაც სცდება. საქართველოს, უკრაინას, უზბეკეთს, ტაჯიკეთს, ლიბანს და სხვა ქვეყნებს დღემდე ამშვენებს გიორგი ჩახავას მიერ შექმნილი არქიტექტურა. ჩახავას უნიკალური ხელწერის ერთ-ერთი თვალსაჩინო მაგალითი კი, საქართველოს ბანკის სათავო ოფისის შენობაა. რეკონსტრუქციის შემდეგაც საქართველოს ბანკის სათავო ოფისის შენობა ქართული არქიტექტურის თვალსაჩინო ნიმუშად რჩება. აღსანიშნავია ისიც, რომ ნაგებობას საქართველოს მთავრობის მიერ უძრავი ძეგლის სტატუსიც აქვს მინიჭებული.
“სიმბოლურია, რომ საქართველოს ბანკის სათავო ოფისი გიორგი ჩახავას მიერ შექმნილ, მსოფლიოში ცნობილ შენობაშია განთავსებული. საქართველოს ბანკის გუნდისთვის განათლება ერთ-ერთ მთავარ პრიორიტეტს წარმოადგენს. ამასთან, ჩვენ ხელს ვუწყობთ კულტურული და ისტორიული მნიშვნელობის ძეგლების, გამორჩეული ქართველი ხელოვანების შესახებ ცნობიერებისა და ინტერესის ამაღლებას, რაც ჩვენ მიერ განხორციელებულ პროექტებში გამოიხატება”, — აღნიშნავს საქართველოს ბანკის CSR მიმართულების ხელმძღვანელი, ანა ლომთაძე.
საქართველოს ბანკის სტიპენდია ერთ-ერთია იმ მრავალი შესაძლებლობიდან, რომელსაც საქართველოს ბანკი სტუდენტებს ახალი საგანმანათლებლო პროექტის ფარგლებში სთავაზობს. მნიშვნელოვანია ისიც, რომ პროექტი ერთჯერადი არ არის და სტუდენტებს ყოველ წელს ექნებათ შესაძლებლობა, სტიპენდია მონდომებითა და შრომისმოყვარეობით მოიპოვონ. სტიპენდია მოიცავს როგორც სწავლის ერთწლიან, ასევე სრულ ან ნაწილობრივ დაფინანსებას. სასტიპენდიო კონკურსში მონაწილეობისათვის აუცილებელია, რომ აპლიკანტი საქართველოს მოქალაქე იყოს, ჰქონდეს ლიდერობის უნარები და დაინტერესებული იყოს საბანკო საქმიანობის, ბიზნესის, ტექნოლოგიების ან თავისი უნივერსიტეტის სხვა პრიორიტეტული მიმართულებით. თითოეული უნივერსიტეტი პრიორიტეტულ მიმართულებებსა და სტიპენდიატის შერჩევის კრიტერიუმებს თავად განსაზღვრავს, რის შესახებაც ინფორმაცია უმაღლესი საგანმანათლებლო დაწესებულებების ვებგვერდებზე განთავსდება.
დეტალური ინფორმაცია საქართველოს ბანკის ახალი სასტიპენდიო პროგრამის შესახებ შეგიძლია გაიგო აქ.