როგორ დავგეგმოთ იაფი და უსაფრთხო მოგზაურობა

მოგზაურობა კალენდარში “გაფრენისა” და “ჩამოფრენის” თარიღებს შორის მოქცეულ დღეებს მოგონებებით გვივსებს. თუმცა, ხშირად ეს ფინანსების გამო მიუწვდომელი ოცნება გვგონია, არადა თანამედროვე სამყაროში უამრავი შესაძლებლობა არსებობს, რომელთა სათანადოდ გამოყენების შემთხვევაში ახალი ქვეყნებისა და კულტურების აღმოჩენა სულაც არ არის ფანტასტიკის სფერო ან ფუფუნება.

ქვემოთ იმ მარტივ ხერხებს გაეცნობი, რომლებიც იაფი, მაგრამ უსაფრთხო მოგზაურობის დაგეგმვაში დაგეხმარება. ეს რჩევები მაშინაც კი შეიძლება გამოგადგეს, თუ უკვე სამშობლოს საზღვრებს გარეთ გიმოგზაურია, მაგრამ ყოველთვის ყველაფრის სწორად გათვლა ვერ შეძელი და ისურვებდი, ნაკლები დანახარჯით უფრო უსაფრთხოდ მიიღო ახალ-ახალი გამოცდილებები.

ინტერნეტში მოძებნე საცხოვრებლის, საჭმლის, ტრანსპორტირების და სხვა საჭირო სერვისებისა და პროდუქტების ფასები. შეადარე ერთმანეთს ქვეყნები, სეზონები, ადგილები; ნახე როდის, სად და რა არის შედარებით იაფი. გვერდი აუარე პოპულარულ ადგილებს და “მიმალული საგანძური” აღმოაჩინე. გახსოვდეს, პოპულარული ტურისტული ადგილების  გვერდით ხშირად ისეთივე ან უკეთესი სივრცეებიცაა, რომელთა ნახვა შედარებით იაფი დაგიჯდება.

თვალი აარიდე რეკლამებს და მოძებნე რეალური ადამიანების შეფასებები. ეს რჩევა ეხება როგორც ფასებს, ასევე უსაფრთხოებას. გადახედე, ფასთან რამდენად შესაფერისი ჰგონია ხალხს შენთვის საინტერესო ადგილი და მიიჩნევენ თუ არა იქაურობას უსაფრთხოდ.

როცა მოგზაურობისას ცოტა ფული გვაქვს, მოულოდნელობები მაქსიმალურად უნდა ავიცილოთ თავიდან. უცხო ქვეყანაში გამოცარიელებული საფულის ან ანგარიშზე 0.00-ის დანახვა არავის გვინდა. ამიტომ, დაგეგმე ბიუჯეტი მოგზაურობამდე, რათა დაახლოებით იცოდე, რომელ დღეს რამდენის დახარჯვა მოგიწევს. გახსოვდეს, ინტერნეტში მართლა ყველაფერია და ლამის თეთრების სიზუსტით შეგიძლია შენი საცხოვრებლის, ტრანსპორტირებისა და კვების ხარჯების დაგეგმვა.

წინასწარ გათვლის მიუხედავად, არასდროს იცი, როდის გამოჩნდება გაუთვალისწინებელი ხარჯები – შეიძლება, მოულოდნელად გეგმაში ახალი აქტივობის დამატება და შესაბამისად, დამატებითი ფინანსები დაგჭირდეს. ამიტომ მოგზაურობისთვის ფულის წინასწარ შეგროვება ყოველთვის კარგი აზრია. ამაში კი საქართველოს ბანკის შეგროვებადი ანაბარი ყველაზე მეტად დაგეხმარება: ნებისმიერ დროს ამატებ იმდენ თანხას, რამდენიც გსურს და დათქმულ ვადაზე ადრე დახარჯვის ცდუნებას შეამცირებ, რითაც მოგზაურობის თარიღს მაქსიმალურად მომზადებული შეხვდები.

5. გაეცანი კანონებს

ეს რჩევა თითქოს არაფერ შუაში არ არის, მაგრამ თუ კანონები არ გეცოდინება, შეიძლება დაჯარიმდე. ჯარიმის ფულის გადახდა კი არავის ეხალისება. კონსტიტუციის წაკითხვა არ არის საჭირო, უბრალოდ მოძებნე ინტერნეტში “წესები და კანონები, რომელიც უნდა ვიცოდეთ X ქვეყანაში მოგზაურობამდე” და აუცილებლად იპოვი რჩევებს იმ ადამიანისგან, რომელმაც ეს კანონები თავის დროზე არ წაიკითხა. გახსოვდეს, “სადაც მიხვალ, იქაური ქუდი უნდა დაიხურო”, ეს პატივისცემაა როგორც ადგილობრივებისადმი, ასევე შენი საფულისადმიც.

შეიძლება დაზღვევის გამოყენება არ დაგჭირდეს და თანხა “ტყუილად” გადაიხადო, მაგრამ თუ დაგჭირდება და გურამიშვილის ფრაზა “თავს  სინანული სჯობია  ბოლოჟამ   დანანებასა” უკონტექსტოდ გაგახსენდება, მერე უკვე გვიანი იქნება. მითუმეტეს, სამოგზაურო დაზღვევა ძვირი საერთოდ არ ღირს.

ნუ დახარჯავ დაძინებაში ბევრს, იაფი მოგზაურობა არის ხეტიალი, ფართოდ გახელილი თვალები და ახალი გამოცდილებები. მხოლოდ იმიტომ, რომ მინიბარი უდგათ, არ ღირს სასტუმროში იმაზე მეტის დახარჯვა, ვიდრე საჭიროა. როცა მცირე ბიუჯეტი გვაქვს, ჰოსტელში ან ბინაშიც ჩინებულად დავიძინებთ, შეიძლება საკარვე ადგილიც კარგი არჩევანი იყოს, გააჩნია სად მიდიხარ. წინასწარ შეგიძლია შეფასებები შეამოწმო და კარგად ნახო, რას წერენ ადამიანები, რომლებიც უკვე შენამდე იყვნენ იქ. ინფორმირებულობა ყველაზე მეტად დაგიცავს.

დღეს სოციალური მედიისა თუ ზოგადად ინტერნეტის დახმარებით ყველანაირ ცოდნაზე ხელი მარტივად მიგვიწვდება, თუმცა ინტერნეტის ინფორმაცია კარგად დასაგეგმად უნდა გამოიყენო და არა – სახლში დასარჩენად; მოგზაურობა არის არა მშრალი ფაქტები, თუ რამსიმაღლეა პირამიდა და სად აქვთ ყველაზე კარგი ყავა, არამედ ემოციები, შეგრძნებები და გულის სასიამოვნო ფრიალი, რომელიც კალენდრის დღეებს მნიშვნელობას შესძენს.