რაც არ უნდა პათეტიკურად ჟღერდეს, ფულის დაზოგვა არა მხოლოდ პრაქტიკული ჩვევა, არამედ მთელი ფილოსოფიაა. დაზოგვა უნარია, რომელსაც შეუძლია გააძლიეროს ინდივიდი და დაეხმაროს მას მნიშვნელოვანი ფინანსური გადაწყვეტილებების მიღებაში. ეს ფილოსოფია ტრიალებს რესურსების გონივრულად გამოყენების იდეის გარშემო, იდეის, რომელიც ცდილობს უსაფრთხო, დაცული და კომფორტული მომავალი შექმნას.
ფულის დაზოგვის ფილოსოფიის ერთ-ერთი ასპექტი ეკონომიურობაა. შეიძლება ადამიანმა პერიოდულად თავს უფლება მისცეს გაფლანგოს თანხა, თუმცა თუ ეკონომიურობა არ გახასიათებს, ფულის დაზოგვა გაგიჭირდება. თანაც ფულის დაზოგვასთან ერთად ეკონომიურობა რაციონალურ გადაწყვეტილებას უდრის, როცა შეგიძლია შენი სურვილები მართო და იმპულსებს ყოველთვის არ აჰყვე. ასეთი ხალხი თავიდან ირიდებს არასაჭირო ხარჯებს და პრიორიტეტს გრძელვადიან ფინანსურ გეგმებს ანიჭებს. ეკონომიურობაში შეიძლება ივარჯიშო; არ არის საჭირო რთული გზით წასვლა და თქმა, რომ ამიერიდან ეკონომიური იქნები მთელი ცხოვრება. ასე ნაკლებად სავარაუდოა, რომ დასახულ მიზანს მიაღწევ. იარე მოკლე, მაგრამ სტაბილური ნაბიჯებით. მაგალითად, ეცადე იყო ეკონომიური და არ გაფლანგო თანხა შემდეგი 24 საათის განმავლობაში, შემდეგ გაზარდე დრო 36 საათამდე, 2 დღემდე, 1 კვირამდე, თვემდე და ა.შ. სანამ ჩვევაში არ გადაგივა.
ფულის დაზოგვის შემდეგი მნიშვნელოვანი ასპექტი ბიუჯეტირებაა, რომელიც ინდივიდებს საშუალებას აძლევს, თავიანთ შემოსავლებსა და ხარჯებს კარგად იცნობდნენ. ბიუჯეტირება რესურსების სწორად გადანაწილებასა და ყველა თეთრის ეფექტიანად დახარჯვაში გვეხმარება. კარგად სტრუქტურირებული ბიუჯეტი არამხოლოდ ზედმეტ დანახარჯებს გვარიდებს თავიდან, მაგრამ ასევე აჩენს უკეთ დაზოგვის ახალ შესაძლებლობებს.
ფულის დაზოგვა ოცნებების რეალობად ქცევაშიც გვეხმარება. თუკი სამყაროში ზღაპრული რაღაცები იშვიათად ხდება და 3 ნატვრას არც ოქროს თევზი გვისრულებს და არც ლამპრიდან ამოსული ჯინი, ჩვენს თავს სურვილები ჩვენ თვითონ უნდა შევუსრულოთ და ამისთვის – დანაზოგი გვჭირდება.
ინვესტირება ამ ფილოსოფიასთან ახლოს ტრიალებს, რადგან ფულის უბრალოდ შენახვა არ არის გონივრული და სჯობს, დაზოგილი ფულით მეტი ფულის შოვნა ვცადოთ – ანაბრის გახსნით, ობლიგაციების ყიდვით, აქციების შეძენით და ა.შ. გზით.
ასე რომ, თუ გსურს, შენს ცხოვრებაზე სრული კონტროლი აიღო, დროა, ფულის დაზოგვის ფილოსოფიასაც დაუმეგობრდე.