განათლების, დასაქმების თუ ბიზნესის მხარდაჭერის პარალელურად, საქართველო ბანკი დაცული ტერიტორიების სპონსორია. საქართველოს ბანკმა კავკასიის ბუნების ფონდთან პარტნიორობა 2010 წელს დაიწყო, რომლის ფარგლებშიც დაცული ტერიტორიების სპონსორი გახდა. საქართველოს ბანკი და კავკასიის ბუნების ფონდი დაცულ ტერიტორიებზე წარმოდგენილ უნიკალურ ეკოსისტემასა და ბიომრავალფეროვნებაზე დღეს ერთად ზრუნავენ, რასაც ჩვენი ყოველდღიურობისთვის იმაზე მეტი მნიშვნელობა აქვს, ვიდრე ერთი შეხედვით ჩანს.
“დაცული ტერიტორიები ბიომრავალფეროვნების მხრივ უნიკალური ადგილებია, საქართველო კი ამ მხრივ ერთ-ერთი გამორჩეული ადგილია, სადაც ხელუხლებელი პირველყოფილი ბუნება — პირველყოფილი ლანდშაფტი, ფლორა და ფაუნა— გვხვდება. საქართველოში ისევ ვხვდებით სახეობებს, რომლებიც ბევრ ქვეყანასა თუ რეგიონში გადაშენებულია. მსოფლიო მასშტაბით კი, კავკასიის რეგიონი ბიომრავალფეროვნების 36 ცხელ წერტილს შორისაა”, — აღნიშნავს თეა ბარბაქაძე, კავკასიის ბუნების ფონდის ეროვნული დირექტორი.
უნიკალურ ბუნებასთან ერთად, დაცულ ტერიტორიებს წყალშემკრები ფუნქციაც აქვს, რომელსაც შენარჩუნება და გაფრთხილება სჭირდება. სუფთა ჰაერი, ნაკლები ირიგაციული პრობლემები, კარგი მოსავალი და სხვა — პირდაპირ თუ ირიბად სწორედ დაცულ ტერიტორიებს უკავშირდება, რადგან მთლიან ეკოსისტემაში იქ წარმოდგენილი ბიომრავალფეროვნება დიდ როლს თამაშობს. აქედან გამომდინარე, დაცული ტერიტორიების შენარჩუნება საქართველოს ბანკისთვის პრიორიტეტული საკითხია, ეს პროცესი კი კავკასიის ბუნების ფონდთან თანამშრომლობით ბორჯომ-ხარაგაულის ეროვნული პარკიდან დაიწყო.
2010 წელს კავკასიის ბუნების ფონდმა ბორჯომ-ხარაგაულის ეროვნულ პარკთან დაიწყო თანამშრომლობა, საქართველოს ბანკი კი პირველი კორპორაციული შემომწირველი იყო, რომლის დონაციაც ბორჯომ-ხარაგაულის ადმინისტრაციული შენობის რეაბილიტაციას მოხმარდა. ერთი ეროვნული პარკიდან დაწყებული სპონსორობა დღეს უკვე 16 დაცული ტერიტორიის ადმინისტრაციის მხარდაჭერას ითვლის. ეს დაცული ტერიტორიებია ბორჯომ-ხარაგაულის, ლაგოდეხის, თუშეთის, ვაშლოვანის, მტირალას, ჯავახეთის, ყაზბეგის, ალგეთის, კინტრიშის, მაჭახელას, ფშავ-ხევსურეთის, ხოლო 2023 წლიდან ბაწარა-ბაბანეურის, არაგვისა და თრუსოს დაცული ლანდშაფტები და რაჭის ახალშექმნილი ეროვნული პარკი.
საქართველოს ბანკის სპონსორობა გულისხმობს იმას, რომ მიღებული თანხით დაცული ტერიტორიების ადმინისტრაციული თუ ინფრასტრუქტურული ხარჯები იფარება. სპონსორობა ასევე მოიცავს როგორც დასაქმებული, ისე ადგილობრივი მოსახლეობის დახმარებასა და მათი ცხოვრების გაუმჯობესებას. მაგალითად, საქართველოს ბანკის მხარდაჭერით, რეინჯერებისთვის მაღალი ხარისხის უნიფორმების შეიძინეს, რამაც მათი საქმიანობა და ყოველდღიურობა სასიკეთოდ შეცვალა. კავკასიის ბუნების ფონდი კი თავის მხრივ, კომუნიკაციის გაუმჯობესებისა და ცნობიერების ამაღლების კომპონენტზე მუდმივად ზრუნავს. ამასთანავე, დაცული ტერიტორიების შენარჩუნება და მათ განვითარებაზე ზრუნვა ეკოტურიზმზე დიდ გავლენას ახდენს, რაც საბოლოოდ ქვეყნის ეკონომიკაზეც დადებითად აისახება.
“ხაზგასმით უნდა აღვნიშნო საქართველოს ბანკის წვლილი გარემოს დაცვის სფეროში სოციალური პასუხისმგებლობის ფარგლებში. როგორც საქართველოში ერთ-ერთი წარმატებული ბიზნესი, ის საკმაოდ გულისყურით მოეკიდა გარემოს დაცვის საკითხებს. ჩვენ 2010 წლიდან ვთანამშრომლობთ და საქართველოს ბანკი ნამდვილად არის კავკასიის ბუნების ფონდის ერთ-ერთი ყველაზე ერთგული, სტაბილური, გრძელვადიანი დონორი, პარტნიორი და მეგობარი და საქართველოში დაცული ტერიტორიების მხარდამჭერი. ჩვენ საქართველოს ბანკს განვიხილავთ არა როგორც სპონსორს, არამედ როგორც პარტნიორს და მეგობარს, რომელსაც აბსოლუტურად გათვითცნობიერებული აქვს ის, რასაც გარემოსდაცვის ჭრილში აკეთებს და ამ საკითხს ნამდვილად პასუხისმგებლობიანად უდგება”, — ამბობს თეა ბარბაქაძე.
აღსანიშნავია, რომ გასულ წელს გარემოს დაცვისა და ზოგადად, დაცული ტერიტორიების შენარჩუნებისა და განვითარების მიზნით ჩატარდა ღონისძიება, რომელშიც საქართველოს ბანკმა დიდი წვლილი შეიტანა. საქართველოს ბანკის მხარდაჭერითა და საერთაშორისო ორგანიზაციების ჩართულობით, 2023 წელს საქართველოში დაცული ტერიტორიების პირველი საერთაშორისო სამიტი გაიმართა. ბორჯომში ჩატარებული სამიტი საქართველოს დაცული ტერიტორიების ისტორიაში პირველი პრეცედენტი იყო, როცა მსოფლიოს წამყვანი ეროვნული პარკებისა თუ საერთაშორისო გარემოსდაცვითი ორგანიზაციების წარმომადგენლებმა ქართველ კოლეგებს გამოცდილება გაუზიარეს, სხვადასხვა საკითხი განიხილეს და მათი მუშაობის პრაქტიკა გააცნეს. მსოფლიოს ეროვნული პარკების წარმომადგენლები საქართველოს აშშ-დან, გერმანიიდან, შვედეთიდან, რუმინეთიდან, მაკედონიიდან, სომხეთიდან, აზერბაიჯანიდან, უკრაინიდან, თურქეთიდან და კორეის რესპუბლიკიდან ეწვივნენ. სამიტის ფარგლებში დაიგეგმა არაერთი ახალი პროექტი, რომელთა განხორციელებაც 2024 წლიდან დაიწყება.
საქართველოს ბანკი დაცული ტერიტორიების მხარდაჭერას კვლავ განაგრძობს და სამომავლოდ კიდევ უფრო მეტი ღონისძიება და პროექტის განხორციელებაც იგეგმება. თანამედროვე გამოწვევების ფონზე კი, რომელთა შორისაც ყველაზე მნიშვნელოვანი კლიმატის ცვლილებაა, უნდა გვახსოვდეს, რომ ამ პროცესის შესწავლა და დაკვირვება მეცნიერებისთვის ყველაზე კარგად სწორედ დაცული ტერიტორიების ხელუხლებელ ბუნებაში არის შესაძლებელი. ასე რომ, გარემოს დაცვის მიმართულებით სოციალური პასუხისმგებლობის გაზიარება ყველა კომპანიისთვის მნიშვნელოვანი პრიორიტეტი უნდა იყოს.