ანანო გაბუნია — გზა MASE-ის სტიპენდიატობიდან კანის ლომებზე გამარჯვებამდე

„ოფიციალურად გახლავართ ანა, მაგრამ ყველა ანანოს მეძახის. ვარ არტ-დირექტორი ფინანსისტის დიპლომით (რომელიც სადღაც შორს, რომელიღაც უჯრაშია ჩაკეტილი)“, — ასე გეცნობა ანანო გაბუნია თავის ვებსაიტზე. ყოფილ მონაცემთა ანალიტიკოსს, ერთ მშვენიერ დღეს „ექსელის“ ფაილები შენახვის გარეშე დაუხურავს და გულის კარნახით, სარეკლამო ინდუსტრიაში აღმოჩენილა.

ანანო ქართველი არტ-დირექტორი, Miami Ad School Europe-ში ნიკა გუჯეჯიანის სტიპენდიის მფლობელი და ახლა უკვე კანის ლომების გამარჯვებულია. ამ უკანასკნელზე — კრეატიული ინდუსტრიის ყველაზე მასშტაბურ და პრესტიჟულ დაჯილდოებაზე — ანონომ, მეწყვილესთან ერთად, Future Lions-ის პრიზი მოიპოვა. ეს კანის ლომებზე ერთადერთი სტუდენტური კატეგორია გახლავთ, რომელშიც, როგორც წესი, ყოველთვის დიდი კონკურენციაა ხოლმე.

ამ ბლოგში ანანოს უკეთ გაგაცნობთ და მოგიყვებით მის მიერ განვლილ გზაზე კრეატიულ ინდუსტრიაში.

შეცვლილი პროფესია და პირველი ნაბიჯები

„პირველი ნაბიჯები კრეატიულ ინდუსტრიაში მოულოდნელად გადავდგი: ESM-ის ფინანსების დიპლომით ხელში, სრულიად სხვა სფეროში ვმუშაობდი და გული ყოველთვის სარეკლამო საქმისკენ მიმიწევდა“, — გვიყვება ანანო, — „Ad Black Sea-ზეც დავდიოდი და კანის ლომების ღონისძიებებსაც ვესწრებოდი. ერთ დღესაც, გადავწყვიტე, რომ დრო იყო, შანსი მიმეცა ჩემი ოცნებისთვის და კარიერა 180 გრადუსით შემომეტრიალებინა. ასე დავიწყე მუშაობა Redberry-ში ჯუნიორად და ჩემს ფინანსების დიპლომსაც გულისწყვეტის გარეშე გამოვემშვიდობე“.

ანანო ამბობს, ყველაზე გარდამტეხი ამბები ჩემს ცხოვრებაში ყოველთვის მაშინ ხდებოდა, როცა გადავწყვეტდი, რომ არა, ახლა სხვა რამე მინდა ვცადოო. ასე აღმოჩნდა კრეატიულ სფეროში, მერე კი, გადაწყვიტა, რომ მიმართულება შეეცვალა და ქოფირაითერობის ნაცვლად კრეატიული სტრატეგი და არტ-დირექტორი გამხდარიყო. მისი თქმით, თუკი ამ ინდუსტრიაში ხარ, რაც შეიძლება ბევრი რამ უნდა ცადო, რომ უკეთესი პროფესიონალი გახდე.

Miami Ad School Europe — გზა, რომ გახდე უკეთესი პროფესიონალი

Miami Ad School მსოფლიოში ყველაზე ცნობილი კრეატიული სკოლაა, რომლის კურსდამთავრებულებიც გლობალურ ბრენდებში აგრძელებენ პროფესიულ ცხოვრებას. უკვე მეხუთე წელია, საქართველოს ბანკი ახორციელებს ნიკა გუჯეჯიანის სახელობის სასტიპენდიო პროგრამას, რომელიც ქართველ ახალგაზრდებს ბერლინში, Miami Ad School Europe-ში (MASE) სრული დაფინანსებით სწავლის საშუალებას აძლევს.

ანანო MASE-ის სტიპენდიანტი 2022 წელს გახდა და ქოფირაითინგის ორწლიან პროგრამაზე ჩაირიცხა. იგი ხაზს უსვამს ამ სკოლის ყველაზე გამორჩეულ თვისებას — თეორიული ცოდნის პრაქტიკულ ჭრილში სწავლებას. თუმცა, ბერლინში მოხვედრილ ანანოს ჯერ კიდევ არ ჰქონდა გადაწყვეტილი, თავისი პროფესიული ჭრილი შეეცვალა.

„საქართველოში ყოფნისას კრეატიული სტრატეგობაც მოვასწარი და ძალიან მომწონდა“, — აღნიშნავს იგი, — „MASE-ში სწავლისას არტდირექტორობა გადაწყვეტილი საერთოდ არ მქონია, უბრალოდ, ყოველდღიურმა მუშაობამ და კრეატიულმა პროცესმა მიმახვედრა, რომ დრო იყო, არტიც მეცადა; მით უფრო, რომ ბავშვობიდანვე ყველაზე მეტად ეს მიზიდავდა: ყოველთვის, როცა იდეაზე ვფიქრობდი, ჯერ ვიზუალს წარმოვიდგენდი ხოლმე. მომწონს, რომ როგორც არტ-დირექტორი, სრულიად ჩართული ხარ კრეატიულ პროცესში და ამასთან, პროექტის ვიზუალური მხარის შექმნაც შენზეა“.

MASE-ში სწავლის ნაწილია სტაჟირების გავლა რომელიმე ცნობილ კომპანიაში. ანანო მილანის სააგენტო LePub-ში აღმოჩნდა და მისი მუშაობის ჩქარ ტემპში გადაეშვა. ამბობს, ასე სწრაფად ალბათ სხვაგან ვერსად გავიზრდებოდიო.

„MASE-მა სრულიად სხვა რეჟიმში ჩამსვა და გლობალური კრეატიული სფეროც სხვანაირად დამანახა“, — ასე აფასებს საუკეთესო კრეატიულ სკოლაში სწავლის გამოცდილებას ანანო,  — „ყველაზე დიდი ცოდნა და გამოცდილება, რაც აქ მივიღე, სწორედ სტაჟირებები იყო. განსაკუთრებით, ვთვლი, რომ LePub-ში ყველაზე მეტად გავიზარდე. ვისწავლე, როგორ ვყოფილიყავი კიდევ უფრო სწრაფი, გადავაფასე იდეები, მათი შექმნის პროცესი და craft-იც გაცილებით დავხვეწე“.

მოულოდნელი გამარჯვება კანის ლომებზე

იცოდით, რომ მსოფლიოში მილიარდზე მეტი ადამიანი სმენის დაზიანების რისკის ქვეშაა? მიზეზი, არც მეტი, არც ნაკლები, მუსიკის მოსმენაა — როგორც აღმოჩნდა, იმაზე მეტს და ხმამაღლა ვუსმენთ, ვიდრე წინათ. სწორედ ეს მიგნებები აღმოჩნდა ამოსავალი წერტილი ანანოსა და მისი მეწყვილისთვის, ქოფირაითერ ჟოაო პარეირასთვის, შეექმნათ Future Lions-ის პრიზიორი ნამუშევარი.

„ჯერ კიდევ არ ვიყავი ამ სფეროში, გამარჯვებულ პროექტებს რომ ვათვარიელებდი ხოლმე“, — გვიყვება ანანო Future Lions-ზე, — „მინდოდა, რაღაც მსგავსი მეც შემექმნა. ეს კონკურსი შედარებით ტექნოლოგიურია და, როგორც წესი, ინოვაციაზეა დაფუძნებული“.

Future Lions კანის ლომებზე საგანგებოდ სტუდენტებისთვის გამოყოფილი სექციაა, რომელშიც 25 წლამდე ახალგაზრდები მონაწილეობენ. აპლიკანტებს ყოველწლიურად სხვადასხვა კომპანიის ბრიფი ეძლევათ სამუშაოდ. წელს ეს გახლდათ მუსიკის უდიდესი სტრიმინგ პლატფორმა Spotify, რომელიც თავად ანანოსა და ჟოაოსაც განსაკუთრებით უყვართ. სწორედ ამიტომ, მომხმარებლის გამოცდილების გასაუმჯობესებლად, გამოიგონეს ფუნქცია EarSafe, რომელიც სმენის შემოწმების საშუალებას იძლევა.

„უამრავი იდეა გვქონდა, მაგრამ განსაკუთრებით არცერთი არ მოგვწონდა, სანამ ეს იდეა სრულიად მოულოდნელად არ დაიბადებოდა“, — იხსენებს ანანო, — „მუშაობის პროცესი, რა თქმა უნდა, სწორხაზოვანი არ იყო. იდეაში ბევრი ცვლილება შევიტანეთ და ნახევრად მზა ქეის-ვიდეოც მთლიანად წავშალეთ და თავიდან დავიწყეთ. თუმცა მთავარი ისაა, რომ ბოლომდე, ღამის თენებისას თუ პრობლემასთან ბრძოლისას, იდეა მაინც გვიყვარდა და პროექტსაც არა გამარჯვების გამო, არამედ, უბრალოდ, ჩვენთვის ვაკეთებდით“.

გამარჯვება კი ნამდვილად მოულოდნელი იყო: უზარმაზარი კონკურენციის ფონზე, მოკლე სიაში მოხვედრაც კი დიდი მიღწევა და ბედნიერება იყო ჩვენთვისო, ამბობს ანანო და ამატებს, გამარჯვებაზე მხოლოდ თუ ვიხუმრებდითო.

თუმცა, საბოლოოდ, გამარჯვება სწორედ ანანოს და ჟოაოს ერგოთ. ეს კი ქართველი არტ-დირექტორისთვის კიდევ უფრო დიდი, წარმატებებით სავსე გზის დასაწყისია.

არ გაჩერდე, გააგრძელე კითხვა