თუკი წიგნები გიყვარს და სხვა ადამიანების რეკომენდაციებსაც სიამოვნებით იღებ ხოლმე, შენთვის საინტერესო ამბავი გვაქვს — სულ მალე, სულაკაურის წიგნის მაღაზიებში იდეათეკის თაროები დაგხვდება. საქართველოს ბანკმა თავისი საგანმანათლებლო პროექტის ფარგლებში მორიგი თანამშრომლობა წამოიწყო და გადაწყვიტა, წიგნთან დამეგობრების საშუალება კიდევ უფრო მეტი ადამიანისათვის მიეცა.
პროექტი იდეათეკა საქართველოს ბანკმა 2019 წელს წამოიწყო. მისი მიზანი იყო, რეგიონებში, განსაკუთრებით კი მაღალმთიან რაიონებსა და საოკუპაციო ხაზთან მდებარე დასახლებებში მცხოვრები ახალგაზრდებისთვის ხელი შეეწყო და შეექმნა განათლების შესაძლებლობა. შედეგად, პროექტმა დღესდღეობით უკვე მოიცვა 6 რეგიონი და 16 სკოლა. ამ სასწავლებლებში თანამედროვე ტექნოლოგიებითა და მრავალფეროვანი ლიტერატურით აღჭურვილი მულტიფუნქციური საგანმანათლებლო სივრცეები მოეწყო. მოსწავლეები სივრცეს აქტიურად იყენებენ სწავლის პროცესში, ამასთან, იდეათეკა მათ კლასგარეშე აქტივობების დაგეგმვისა და განხორციელების საშუალებასაც აძლევს. ამდენად, გარდა იმისა, რომ იდეათეკამ მათ გაუადვილა წვდომა ინტერნეტზე, კომპიუტერზე, პროექტორსა თუ სხვა საჭირო რესურსებზე, ასევე შექმნა სივრცე შეხვედრებისთვის, დისკუსიებისა და პროფესიული ცხოვრების დაგეგმვისთვის. ამ შესაძლებლობით დღეს უკვე 7 ათასამდე ახალგაზრდა სარგებლობს.
ახლა კი, იდეათეკის თარო უკვე სულაკაურის წიგნის მაღაზიებშიც გამოჩნდება. თაროებზე ყოველკვირეულად განთავსდება საინტერესო ადამიანების რეკომენდებული საკითხავი. ამასთან, წარმოდგენილ წიგნებზე პერიოდულად იმოქმედებს ფასდაკლება და განსაკუთრებული შეთავაზებები, რათა ლიტერატურა ყველა მსურველისათვის თანაბრად ხელმისაწვდომი იყოს.
ამასთან, აღსანიშნავია ისიც, რომ საქართველოს ბანკის ბლოგზე დროდადრო ასევე შეხვდები საინტერესო რეკომენდაციებსა და რჩევებს.
იდეათეკა საქართველოს ბანკის ერთ-ერთი გამორჩეული პროექტია. ბანკი, რომლისთვისაც განათლების ხელმისაწვდომობა ყოველთვის ერთ-ერთი მთავარი პრიორიტეტი იყო და არის, არაერთ მასშტაბურ ინიციატივას ახორციელებს ამ მიზნით. მათ შორისაა სტიპენდიები (ჩივნინგის, ფულბრაიტის, ნიკა გუჯეჯიანის სახელობის), ასევე უფასო განათლების უზრუნველყოფა სკოლის მოსწავლეებისა და აბიტურიენტებისთვის. კორპორაციული სოციალური პასუხისმგებლობის ფარგლებში განხორციელებული საგანმანათლებლო პროექტებით საქართველოს ბანკმა სწავლის შესაძლებლობა დღემდე უკვე 100 ათასზე მეტ ახალგაზრდას შეუქმნა.
სამომავლოდ კი, ბანკი, რასაკვირველია, ამ პროექტების განხორციელებასაც განაგრძობს და ქმნის სხვა შესაძლებლობებსაც ახალგაზრდებისთვის ფორმალურ თუ არაფორმალურ განათლებაზე ხელმისაწვდომობის გასაზრდელად.