ცოტა ხნის წინ “გალტ & თაგარტმა” ბიზნესებს საქართველოში ავტომობილების ბიზნესის კვლევა წარუდგინა. აღსანიშნავია, რომ მოცემული კვლევა განიხილავს:
- ავტომობილების ბიზნესის გლობალურ ტენდენციებს
- მიმოიხილავს ადგილობრივ და საექსპორტო ბაზრებს
- ადარებს ბიზნეს სექტორის ძირითად მაჩვენებლებს გლობალურს
- და განსაზღვრავს სამომავლო ხედვას
კვლევა დეტალურად თათია მამრიკიშვილმა წარუდგინა ბიზნესებს. მან თავიდანვე აღნიშნა, რომ 2021-2022 წლები საქართველოს საავტომობილო ბიზნესისთვის ისეთივე გამოწვევებით იყო სავსე, როგორებიც გლობალურ ბაზარზე შეინიშნა. ეს კი იმით იყო განპირობებული, რომ პრეპანდემიური პერიოდის გამო გაიზარდა ავტომობილების ფასები და სატრანსპორტო ხარჯები. სექტორზე ასევე მნიშვნელოვნად იმოქმედა ამავე პერიოდში წარმოქმნილმა ნახევარგამტარების დეფიციტმა და გეოპოლიტიკურმა დაძაბულობამ.
პანდემიურმა პერიოდმა გამოიწვია საწარმოო შეზღუდვებიც, რამაც ახალი ავტომობილების წარმოება შეაფერხა. სწორედ ამიტომ, მეორად ავტომობილებზე მოთხოვნა გაიზარდა და მასთან ერთად – ფასებიც. მიუხედავად ამისა, 2022 წელს ავტომობილების იმპორტი 73.1%-ით გაიზარდა, საერთო რაოდენობა კი 18%-ით. აქვე უნდა გამოვყოთ ელექტრო ავტომობილებიც, რომლებსაც შეზღუდვები ყველაზე ნაკლებად შეეხო.
კვლევის თანახმად, თუკი საქართველოს ახალი და მეორადი ავტომობილების ბაზარს გლობალურს შევადარებთ, ფასების ტრენდი ერთმანეთის მსგავსი გამოდის. საინტერესოა ისიც, რომ ქართული კომპანიები უცხოურ კომპანიებთან შედარებით მაღალი მომგებიანობით გამოირჩევიან. ხოლო ავტომობილებით ვაჭრობისა და ავტო ტექ-მომსახურების კომპანიების ვალიანობის მაჩვენებლით კი, გლობალურ კომპანიებთან შედარებით დაბალი მაჩვენებელი გვაქვს.
კვლევის წარდგენის შემდეგ პანელური დისკუსია გაიმართა, სადაც ავტოინდუსტრიაში მყოფმა სხვადასხვა კომპანიის წარმომადგენლებმა ისაუბრეს ისეთ თემებზე, როგორებიცაა:
- რა განაპირობებს გაზრდილ მოთხოვნას ავტომობილებზე
- რატომ იცვლება ტენდენციები
- როგორია სამომავლო პერსპექტივა
- როგორია ელექტრომობილების მომავალი და ა.შ
საბოლოოდ, შეიძლება ითქვას, რომ, კვლევაზე დაყრდნობით, სამომავლო პერსპექტივაში, აღნიშნული სექტორი 15%-20%-იან ზრდას ელის, საქართველოს ბაზარზე კი, შესაძლოა, ახალი მანქანების ბაზარი განვითარდეს.
თუმცა, ევროპული ბრენდების უმრავლესობა დღესაც განიცდის ნახევარგამტარების დეფიციტს, რაც შეიძლება პირდაპირ აისახოს მიწოდების შეზღუდვაზე 2023 წელს. მსგავსი პრობლემა ნაკლებად შეექმნა კორეულ და იაპონურ ბრენდებს, რომლებიც კარგად უმკლავდებიან ნახევარგამტარების კრიზისს, რაც 2023 წელს დადებით მოლოდინებს ქმნის მიწოდებასთან და ფასებთან დაკავშირებით.
თუმცა, საბოლოო ჯამში, ჯერ კიდევ არ ვიცით, მიწოდებასა და ფასებთან დაკავშირებული რეგულაციები სამომავლოდ რამდენი ხნით გაგრძელდება.