Wempler ქართული პლატფორმაა, რომელიც დამსაქმებელსა და დასაქმების მსურველს ერთმანეთის აღმოჩენაში ეხმარება. პლატფორმაზე დარეგისტრირებულები არიან ვერიფიცირებული კადრები, საიდანაც დამსაქმებელს შეუძლია, სასურველი ვარიანტი შეარჩიოს და ნებისმიერი სამუშაო გადააბაროს მას.
პლატფორმა ერთგვარად საშუალებას აძლევს დამსაქმებლებს, გაიმარტივონ საქმე, ხოლო კადრებს კი თავიანთი უნარებითა და შრომით დამატებითი შემოსავალი გამოიმუშაონ.
Wempler-ის იდეა 2020 წლის ზამთარში დაიბადა, როცა მისი ერთ-ერთი დამფუძნებელი, ალექსანდრე თავხელიძე დიდი რაოდენობით საქმის წინაშე აღმოჩნდა, რომელიც სულ რამდენიმე საათში უნდა შეესრულებინა.
„მივხვდი, რომ დახმარება მჭირდებოდა. ხოლო, როდესაც დამხმარის ძებნა დავიწყე, არათუ ვერ ვიპოვე, ვერც კი მივხვდი, სად უნდა მეძებნა. სწორედ ამ მომენტში მომივიდა იდეა, რომ უნდა შემექმნა რაღაც, რაც ამის საშუალებას მომცემდა.“
