საქართველოს ბანკისთვის, ერთი მხრივ, ადგილობრივი მცირე მეწარმეების ხელშეწყობა, ამავდროულად კი ქართული ღვინის კულტურის განვითარება განსაკუთრებულად პრიორიტეტულია. სწორედ ამ მიზნით, ბანკის მხარდაჭერით, 14 ოქტომბერს კახეთში გურჯაანის ღვინის ფესტივალი 2023 გაიმართა.
ფესტივალზე მოსულ ადგილობრივ და უცხოელ სტუმრებს შესაძლებლობა ჰქონდათ, დაეგემოვნებინათ 300-ზე მეტი მეღვინის სხვადასხვა ტიპის, ფერისა და ასაკის ღვინო და ჭაჭა. ამასთანავე, დამსწრე საზოგადოებას შეეძლო მონაწილეობა მიეღო ქართველი შეფების მასტერკლასებში და იქვე გაესინჯა მათ მიერ მომზადებული ავთენტური კერძები, რითაც ღვინისა და შესაფერისი საჭმლის საუკეთესო შეხამებაზე როგორც თეორიულ, ისე პრაქტიკული ცოდნა მიიღეს. გამორჩეულ ღვინოებსა და მადისაღმძვრელ კერძებთან ერთად იდეალურ ატმოსფეროს ქმნიდა სტუმრებისთვის იქვე გამართული კონცერტი.
გურჯაანის ღვინის ფესტივალს 7 წლიანი ისტორია აქვს და ამ პერიოდის განმავლობაში, ყოველი ახალი საფესტივალო წელი დაუვიწყარ ემოციებთან ასოცირდება.
„ეს არის დიდი ერთიანობა, დიდი კავშირი ერთი დღით, როცა ყველას სახეზე ღიმილი და ბედნიერება აქვს და ეს ძალიან გვახარებს. წლიდან წლამდე ადგილობრივი და უცხოელი სტუმრების რაოდენობა მზარდია და ჩვენი პასუხისმგებლობაც, რა თქმა უნდა. ჩვენი გუნდი, ყოველთვის დიდი ენთუზიაზმით მუშაობს იმისთვის, რომ შესაბამისი გარემო შევუქმნათ ახტალის პარკში, ყველა ღვინით შთაგონებულ ადამიანს და ეს ემოციები ძალიან, ძალიან დიდხანს გავაყოლოთ თან.“ – განაცხადა ეკა ცისკარაშვილმა, გურჯაანის ღვინის ფესტივალის ორგანიზატორმა.
გურჯაანის ღვინის ფესტივალი არა მხოლოდ ღვინისა და სასმლის, არამედ ღვინოსთან მისაყოლებელი ქართული გემოების ნამდვილი დღესასწაულია. ფესტივალის ფარგლებში ქართველ მცირე მეწარმეებს საშუალება ეძლევათ, თავიანთი პროდუქტი ყველას გააცნონ და შეაყვარონ.
„გურჯაანის ღვინის ფესტივალზე წელს პირველად მივიღეთ მონაწილეობა. ჩვენი მიზანი მალენტას პროდუქციის შესახებ ცნობადობის გაზრდა იყო და ვფიქრობ, შევძელით კიდეც. კონკრეტულად ეს ფესტივალი საუკეთესო შესაძლებლობაა მომხმარებელთან უშუალო კომუნიკაციის დასამყარებლად, და რაც მთავარია, მათი პირველადი ემოციების გასაგებად“. – სოუსების მწარმოებელი სტარტაპის, „მალენტას“ დამფუძნებელი, მარი კვერნაძე.
შეგახსენებთ, რომ გურჯაანის ღვინის ფესტივალი საერთაშორისო ღვინისა და ალკოჰოლური სასმელების კონკურსის (IWSC) ოფიციალური პარტნიორია. 2022 წელს IWSC-ის კონკურსის ისტორიაში პირველად ის საქართველოში ჩატარდა, ჟიურიმ 500 ქართული ღვინო შეაფასა და რეკორდული რაოდენობის ოქროს მედლებით დააჯილდოვა. ფესტივალი შემდეგ წელს განახლებული ძალებითა და იდეებით დაგვიბრუნდება. მანამდე კი, ვისიამოვნოთ აღმოჩენილი გემოებით.