თბილისში წლის შემაჯამებელი ტექნოლოგიური სამიტი TOUCH23 ჩატარდა. ღონისძიება ტრადიციულად, 7 და 8 დეკემბერს რუსთაველის თეატრში გაიმართა. საერთაშორისო სამიტზე, აუდიტორიას საკუთარი ცოდნა და გამოცდილება როგორც უცხოელმა, ასევე ქართველმა სპიკერებმა გაუზიარეს. სიტყვით გამოსვლები, პანელური დისკუსიები თუ ვორქშოფები 5 ძირითად თემას შეეხებოდა: ბიზნესი, მომავალი, დიზაინი, ტექნოლოგიები და სტარტაპები. ამ თემებზე ისეთი კომპანიის წარმომადგენლებმა ისაუბრეს, როგორიცაა Google, Meta, IDEO, NVIDIA, Spotify, Cloudflare, Dutch Digital Design, Veli.store, Quickshipper, Leavingstone, UNIT 9, Spacebit და სხვები.
ბლოგში მოკლედ მოგიყვებით, თუ კონკრეტულად რაზე ისაუბრეს საერთაშორისო და ადგილობრივმა ტექნოლოგიურმა კომპანიებმა სამიტზე და ასევე, გაგაცნობთ TOUCH23-ის ორგანიზებულ Challenge-ში გამარჯვებულ სამ სტარტაპს, რომლებმაც ერთად 1 000 000 დოლარის ოდენობის ინვესტიცია მოიპოვეს.
სამიტი ორიენტირებულ იყო როგორც ბიზნესისა და სტარტაპების წარმომადგენლებზე, ასევე ჩვეულებრივ, ტექნოლოგიური საკითხებით დაინტერესებულ დამსწრეებზეც.
ბიზნესის წარმომადგენლებისთვის, საერთაშორისო კომპანია Cloudflare-ის სტრატეგიისა და სპეციალური პროექტების ხელმძღვანელმა, ალონსო ბუსტამანტემ AI-ზე და მისი გამოყენების პრაქტიკულ მაგალითებზე ისაუბრა. ხოლო Google-ის წარმომადგენელი ჰორია ნიკულესკო AI-ის გამოყენების ეთიკურ საკითხებს შეეხო საკუთარ გამოსვლაში.
საქართველოს ბანკის წარმომადგენელმა გიორგი კობიაშვილმა აუდიტორიას ახალი, ინოვაციური პროდუქტი Ads Manager-ი გააცნო. მისი საშუალებით ბიზნესი ქმნის შეთავაზებებს (ქეშბექი, ფასდაკლება, პლუს ქულები), რომელიც გამოუჩნდება მობილბანკის, sCoolApp-ის და offers.bog.ge-ს 1 300 000-ზე მეტ ციფრულად აქტიურ მომხმარებელს და მათ შორის ყველაზე რელევანტურს.
ბიზნესის მიმართულებით TOUCH23-ზე არაერთი პანელური დისკუსია და ვორქშოპიც გაიმართა.
სამიტზე ასევე განიხილეს თუ რა გავლენა ექნებათ სიახლეებს ციფრულ სამყაროში ჩვენს ყოველდღიურს ცხოვრებაზე მომავალში. საერთაშორისო კომპანია SANDBOX-ის წარმომადგენელმა არსლან კირანმა აუდიტორიას მეტავერსზე (metaverse) და „ციფრული ნაციის“ შექმნის პოტენციალზე ესაუბრა.
საუბარი შეეხო AI-საც – გაზის უნივერსიტეტის ხელოვნური ინტელექტის ცენტრის მრჩეველთა საბჭოს წევრი სულე გიუნერი აუდიტორიას იმ ცვლილებებზე ესაუბრა, რომელიც შესაძლოა AI-მ შემოქმედებით მიმართულებაზე იქონიოს. მან ასევე ისაუბრა გამოწვევებზე, რომელიც AI-ის ფართო მოხმარებასთან ერთად გაჩნდება ინტელექტუალური საკუთრების თვალსაზრისით.
ციფრულ სამყაროში დიზაინი განსაკუთრებულ მნიშვნელობას ატარებს, შესაბამისად, TOUCH23-ზე ამ თემასაც მნიშვნელოვანი ნაწილი ეკავა. „ტილო ხვდება კოდს“ იყო Onephase-ის დამფუძნებლის გუგა მეშვილდიშვილის გამოსვლის მთავარი თემა, სადაც ის დიზაინზე მომუშავე კომპანიებისთვის, შემოქმედებასა და ციფრული კოდის შორის კავშირის მნიშვნელობაზე ისაუბრა. ხოლო, Dutch Digital Design-ის ბორდის წევრმა სებასტიან შირმა დიზაინერების გუნდის სწორ შერჩევაზე ისაუბრა.
ტექნოლოგიური იდეების პროდუქტებად გარდაქმნის საკუთარ გამოცდილებაზე ისაუბრა Veli.store-ის CTO-მ ვაჟიკო ფრანგიშვილმა. ხოლო, Ready Player Me-ის დეველოპერმა სერგან ალტუნდაშმა ახალი ტექნოლოგიების სამომავლო როლზე ისაუბრა სათამაშო ინდუსტრიაში.
სამიტის ერთ-ერთი მთავარი მიზანი სტარტაპების განვითარების ხელშეწყობა და მათთვის ინვესტიციების მოზიდვაა. შესაბამისად გასაკვირი არაა, რომ TOUCH23-ზე სტარტაპებს ცენტრალური როლი ეკავათ. სამიტის ფარგლებში არაერთი გამოსვლა, პანელური თუ AMA (კითხვა-პასუხი) ტიპის შეხვედრა გაიმართა, რომელიც სწორედ სტარტაპერისა და ინვესტორის ურთიერთობებს ეხებოდა.
სამიტის ფარგლებში გათვალისწინებული იყო სტარტაპერების გამოფენაც, სადაც მათ უნიკალური ნეთვორქინგის საშუალება ჰქონდათ პოტენციურ ინვესტორებისთვის საკუთარი იდეების გასაცნობად.
TOUCH23-ის ბოლო დღეს გამოვლინდა სამიტის ფარგლებში ორგანიზებული Challenge-ის გამარჯვებული სამი სტარტაპი – QuickShipper, Wempler და CrossCreators, რომლებმაც ერთად 1 000 000 ევროს ოდენობის ინვესტიციის მიღების შანსი მოიპოვეს და განვითარების სრულიად ახალ ეტაპზე გადავიდნენ.