აზროვნების აკადემია, საქართველოს ბანკის მხარდაჭერით, იწყებს ლექციათა ციკლს – “ბიზნესის თანამედროვე გამოწვევები”, რომელის ფარგლებშიც სტუდენტებს სრულყოფილი წარმოდგენა შეექმნებათ თანამედროვე მენეჯმენტზე – შეისწავლიან ბიზნესის მართვას დღევანდელ არცისე მარტივ სამყაროში და იმ გამოწვევებთან გამკლავებას, რომლებიც ყოველდღიურად შეხვდებათ. მთლიანობაში, კურსის ფარგლებში, 8 ლექციის ჩატარება იგეგმება ბიზნესსა და მარკეტინგის მიმართულებით, რომელთაც მოწვეული პროფესიონალი ლექტორები გაუძღვებიან.
საკუთარი ბიზნესის წამოწყებისა და სტარტაპის იდეა ალბათ ბევრ თქვენგანს გასჩენია, თუმცა ხშირად ეს ფიქრი აუხდენელ ოცნებად რჩება და არასდროს უწერია რეალურად განხორციელება, რადგან პირველი ნაბიჯის გადადგმა ყველაზე რთული და სარისკოა. ამ სალექციო კურსის მთავარი მიზანიც სწორედ ისაა, რომ მოგცეთ საბაზისო ცოდნა და დაგეხმაროთ საკუთრი იდეების განხორციელებაში. ასევე, ერთ-ერთი მნიშვნელოვანი უნარი, რომელსაც ამ კურსის განმავლობაში გამოიმუშავებთ, არის ის, თუ როგორ გარდაქმნათ სხვადასხვა გამოწვევები და პრობლემები თქვენს უპირატესობად.
როდესაც ახალ საქმეს იწყებ, ბევრი იდეა ერთდროულად გიტრიალებს გონებაში, ასეთ დროს, რთულია იმის განსაზღვრა, თუ საიდან უნდა დაიწყო, რაზე გააკეთო აქცენტი ან რომელ ასპექტში ხარ სუსტი, რომ მის გამოსწორებაზე იზრუნო. საბოლოო ჯამში, შეუძლებელია ყველაფერი წინასწარ განსაზღვრო. ნელ-ნელა, დროთა განმავლობაში იჩენს ხოლმე თავს ისეთი გაუთვალისწინებელი პრობლემები, როლებზეც სჯობდა მანამდე გეფიქრა. ასეთ დროს განსაკუთრებით მნიშნელოვანია გამოცდილი, კვალიფიციური ადამიანების რჩევების მოსმენა, რომლებმაც უკვე გაიარეს ის გზა, რომელსაც შენ ახლა ადგახარ და შესაბამისად, გამოვლილი აქვთ ის სავარაუდო წინაღობები, რომელთა გადალახვაც ამ რჩევების გათვალისწინებით ბევრად მარტივი გახდება.
ლექციების ფარგლებში სტუდენტები ისწავლიან, თუ როგორ შექმნან ძლიერი და გამორჩეული ბრენდი, რომელიც თავის მომხმარებელს ბუნებრივად მოიზიდავს და რაც მთავარია, ხანგრძლივადაც შეინარჩუნებს. გაერკვევიან, თუ როგორ დაგეგმონ ბრენდის სტრატეგია, როგორ დაამყარონ სწორი კომუნიკაცია კლიენტებთან და როგორ გამოიყენონ AI-ს შესაძლებლობები სათავისოდ.
განსხვავებული თემატიკის კურსებს სხვადასხვა ლექტორები გაუღძღვებიან. სტარტაპის გამოწვევები, თანამშრომლის შენარჩუნება, ბრენდის სტრატეგია, მულტიჩენელ მარკეტინგი – ეს მხოლოდ მცირე ჩამონათვალია იმ ლექციების, რომელთაც საქართველოს ბანკისა და აზროვნების აკადემიის ერთობლივ კურსზე შეხვდებით. კურსის დასრულების შემდეგ კი, შეძლებთ, მეტად თავდაჯერებულად დაიწყოთ საკუთარი სტარტაპი, რადგან სხვების მაგალითი, როგორც წესი, ყველაზე დიდი მოტივაციაა ხოლმე – ხვდები, რომ ის მიზნები, რომლებიც აქამდე ძალიან რთული და შორეული გეგონა, არც ისე წარმოუდგენელია.
როგორც ერთ-ერთი მოწვეული ლექტორი – ეკა ყიფიანი განმარტავს, ეს კურსი მნიშვნელოვან კითხვებაზე გასცემს პასუხს – პირველ რიგში კი იმაზე, როგორ გახდეს შენი ბიზნესი მეტად საინტერესო და დღევანდელობასთან რელევანტური, განსაკუთრებით მაშინ, როდესაც თანამედროვე სამყაროში ყველაფერი ძალიან სწრაფად იცვლება და შენც სხვა გზა აღარ გრჩება, გარდა იმისა, რომ ამ ტემპს ფეხი აუწყო.
სესიები 17 ივნისს დაიწყება და 12 ივლისამდე გასტანს. კურსის შესახებ დეტალური ინფორმაცია, მათ შორის რეგისტრაციის ფორმა, შეგიძლიათ იხილოთ აქ.