ციფრული სამყარო დღითიდღე ფართოვდება, ამ სივრცეში კი მნიშვნელოვანი შიდა ინფორმაციის დაცვა ყველა ზომის ბიზნესისთვის სასიცოცხლოდ მნიშვნელოვანი ხდება. იზრდება ტექნოლოგიური შესაძლებლობები, მასთან ერთად კი — რისკები, რომლებიც ინფორმაციის უსაფრთხოებას ახლავს. ამ პრობლემაზე საპასუხოდ, საქართველოს ბანკმა კომპანიებს ახალი ბიზნესკურსი, “კიბერუსაფრთხოება” შესთავაზა. კიბერუსაფრთხოება საქართველოს ბანკის საგანმანათლებლო პლატფორმა ბიზნესკურსზე სრულიად უფასოდაა ხელმისაწვდომი და სტარტაპერებს, მეწარმეებსა თუ პროფესიონალებს საინფორმაციო აქტივების დაცვისთვის საჭირო უნარებსა და ცოდნას გადასცემს.
კურსი 10 მოდულისგან შედგება და მას ანზორ მეხრიშვილი, BDO-ს კიბერ და ინფორმაციული უსაფრთხოების მიმართულების ხელმძღვანელი უძღვება.
რას ისწავლით კიბერუსაფრთხოების ბიზნესკურსზე?
“ინფორმაცია ყველაზე მნიშვნელოვანი აქტივია ერთი მხრივ, კომპანიებისათვის, ხოლო მეორე მხრივ, კიბერ დამნაშავეებისთვის. ამ კურსზე მოისმენთ პრაქტიკულ რჩევებს, თუ როგორ უზრუნველყოთ თქვენთვის მნიშვნელოვანი ინფორმაციული აქტივების უსაფრთხოება, გაიგებთ იმ უფლებების შესახებ, რომელიც გაქვთ პერსონალური მონაცემების დაცვის თვალსაზრისით და მოისმენთ პრაქტიკულ რჩევებს, თუ როგორ უზრუნველყოთ თქვენი ბიზნესპროცესების უწყვეტობა,” — ამბობს ანზორ მეხრიშვილი.
ჩვენ უფრო ვრცლად გიამბობთ, რა გზას გაივლით და რა ინფორმაციას მიიღებთ კიბერუსაფრთხოების ბიზნესკურსზე “შესავლიდან” “ქვიზამდე”.
შესავლის მოდული, პრაქტიკულად, მოსამზადებელი ეტაპია კიბერუსაფრთხოების დინამიკურ სამყაროში შესაბიჯებლად. ამ ეტაპზე გაეცნობით ლექტორს, მის პრაქტიკულ საქმიანობასა და გამოცდილებას, ასევე გაიგებთ, როგორ შეიძლება ამ კურსმა შეცვალოს თქვენი წარმოდგენა ინფორმაციულ უსაფრთხოებაზე.
ინფორმაციული აქტივის შესახებ გაკვეთილზე, სულ რაღაც, 4 წუთში გაიგებთ, რამდენად მნიშვნელოვანი და ღირებულია ბეჭდური ინფორმაცია, მონაცემთა ბაზები, ელექტრონული დოკუმენტები, ბიზნესაპლიკაციები თუ IT ინფრასტრუქტურა. ამავე მოდულში შეიტყობთ, რას მოიცავს ინფორმაციული უსაფრთხოების მართვის პრინციპები და რა ზიანი შეიძლება მიადგეს კომპანიას, თუ ამ აქტივებს დაკარგავს.
გავრცელებული კიბერშეტევების მოდული კარგი გზამკვლევია საინფორმაციო სამყაროში არსებული საფრთხეების შესახებ. ამ გაკვეთილზე გაეცნობით ისეთ ცნებებს, როგორებიცაა სოციალური ინჟინერია: ფიშინგი, სმიშინგი, ვიშინგი; გაიგებთ, როგორ მუშაობს კიბერშეტევის ერთ-ერთი ფორმა — რანსომვეარი. ასევე, მოისმენთ პრაქტიკულ რჩევებს უსაფრთხოებაზე.
ინფორმაციული უსაფრთხოების რისკების მართვის ეტაპზე გაიგებთ, თუ რა სტრატეგიები გამოიყენოს კომპანიამ შესაძლო საფრთხეების შესამცირებლად და კომპანიის საინფორმაციო აქტივების დასაცავად.
უსაფრთხოების დაცვის მინიმალური საშუალებების გაკვეთილი მიმოიხილავს იმას, თუ რა არის და რა ტიპის კიბერდანაშაული არსებობს, ვინ არიან კიბერ-თავდამსხმელები, რა მოტივაცია ამოძრავებთ და როგორ დავიყვანოთ კიბერშეტევების რისკები მინიმუმამდე.
პერსონალური მონაცემების დაცვის შესახებ 10-წუთიან ვიდეოგაკვეთილზე დეტალურადაა განხილული, თუ რა არის პერსონალური მონაცემები, რა მნიშვნელობა ენიჭება მათ ბიზნესპროცესებში, რას ნიშნავს პერსონალური მონაცემის სუბიექტის უფლებები და რა ვალდებულებები აქვთ დამსაქმებლებს.
ინტერნეტბანკის უსაფრთხოების მოდულზე ანზორ მეხრიშვილი რამდენიმე რჩევას გაგიზიარებთ ინტერნეტ და მობილბანკის დაცვისთვის, გაიგებთ, როგორ შეადგინოთ დაცული პაროლი, დააყენოთ ორმაგი ავტორიზაცია და გამოიყენოთ სხვა ხერხები უსაფრთხოებისთვის გასაძლიერებლად.
WiFi-სთან დაკავშირებული რეკომენდაციები 4-წუთიანი ვიდეოგაკვეთილია, სადაც სიღრმისეულადაა მიმოხილული უკაბელო ინტერნეტთან დაკავშირებული კიბერსაფრთხეები.
კიბერუსაფრთხოების ბიზნესკურსის მერვე გაკვეთილზე მეტს გაიგებთ სამუშაო გარემოს უსაფრთხოებაზე — შეიტყობთ ე.წ “სუფთა მაგიდისა და ეკრანის პოლიტიკაზე” და თუ რა სირთულეებთანაა დაკავშირებული სენსიტიური ინფორმაციის დაცვა.
რაც მთავარია, ვიდეოგაკვეთილების ნახვის შემდეგ შეგიძლიათ ცოდნა 12-კითხვიანი ქვიზით შეამოწმოთ.
გაიარეთ ბიზნესკურსი კიბერუსაფრთხოებაზე და გაიგეთ მნიშვნელოვანი თემები თქვენი ბიზნესისთვის. მეტი ინფორმაციის მისაღებად და რეგისტრაციისთვის ეწვიეთ ბიზნესკურსის საგანმანათლებლო პლატფორმას.