ბიზნესკურსი: როგორ უნდა დაწერო ეფექტური ტექსტი

თუკი ბიზნესს ფლობ, შენთვის მნიშვნელოვანი ინფორმაცია გვაქვს: ვებსაიტზე ან თუნდაც ფეისბუქგვერდზე დაშვებულმა გრამატიკულმა შეცდომამ შეიძლება ბევრი მომხმარებელი დაგაკარგვინოს. ჰო, აღმოჩნდა, რომ ინტერნეტმომხმარებლების 74 პროცენტი კომპანიების ვებპლატფორმებზე ენობრივ მხარეს დიდ ყურადღებას აქცევს, ხოლო 59 პროცენტი სულაც უარს ამბობს მათი სერვისის ან პროდუქტის შეძენაზე, ვინც თუნდაც მართლწერაში უშვებს შეცდომას.

მოკლედ, ამ ბლოგით მოგიყვებით იმაზე, რა მნიშვნელობა აქვს ეფექტური ტექსტის წერას ციფრულ მარკეტინგში და როგორ შეგიძლია ამ მიმართულებით საკუთარი უნარები განივითარო.

ეფექტური ტექსტის წერას კი, ეგრეთ წოდებულ ქოფირაითინგს, ხშირად უწოდებენ მომავლის პროფესიას, რადგან თანამედროვე ბაზარზე ბრენდის რეპუტაციას დიდწილად სწორედ ის აყალიბებს, თუ როგორ „ესაუბრება“ კომპანია თავის მომხმარებელს.

სწორედ იმისათვის, რომ გაიგო, როგორ ესაუბრო შენს მომხმარებელს, საქართველოს ბანკის საგანმანათლებლო პლატფორმა ბიზნესკურსზე უკვე არსებობს მასტერკლასი — როგორ დავწეროთ ეფექტური ტექსტი.

ეფექტური ტექსტის წერის მასტერკლასს გამოცდილი ქართველი ქოფირაითერის, მარიტა ფილაურის, მომზადებულია. მოკლე სასწავლო კურსის დახმარებით გაიგებ, რა მნიშვნელობა აქვს პროდუქტის გაყიდვებისთვის მიმზიდველი ტექსტის მომზადებას, მომხმარებელთან „დამეგობრებას“ და საინტერესო კონტენტის შექმნას.

მასტერკლასის სამი ძირითადი შესასწავლი საკითხი კი შემდეგია: როგორ გადმოვცეთ სათქმელი ეფექტურად, ქოფირაითინგის ფორმულები და როგორ ვისაუბროთ მომხმარებლის ენაზე.

ასე რომ, მნიშვნელობა არ აქვს, რამხელა და რა მიმართულების ბიზნესი გაქვს, ამ მასტერკლასის მეშვეობით აუცილებლად შეიძენ გამოსადეგ ცოდნასა და უნარებს შენი ბრენდის წარმატებისთვის. შეიტყობ იმასაც, რა გავლენას მოახდენს ეფექტური ტექსტის მომზადება მომხმარებლის გამოცდილების გაუმჯობესებასა და გაყიდვების მაჩვენებლის ზრდაზე.

ქოფირაითინგის არსი „ვეფხისტყაოსნის“ ცნობილი აფორიზმითაც კი შეიძლება განიმარტოს: „გრძელი სიტყვა მოკლედ ითქმის, შაირია ამად კარგი“. აი, თანამედროვე მომხმარებელს რომ „გრძელი სიტყვის“ კითხვა სულაც არ მოსწონს, ამაზე უკვე სტატისტიკაც მეტყველებს — მკითხველები სტატიის გვერდზე, საშუალოდ, 37 წამს ატარებენ, მათგან 73 პროცენტი კი მხოლოდ ძირითადი ადგილების ამოკითხვით შემოიფარგლება. თუკი დღევანდელი ცხოვრების რიტმს გავითვალისწინებთ, ეს მონაცემები გასაკვირი არც უნდა იყოს.

ამდენად, ეფექტურია ტექსტი, რომელსაც სათქმელი მომხმარებლამდე სიტყვების მინიმალური რაოდენობით მიაქვს. თუმცა, ქოფირაითერს სხვა მისიაც აკისრია; პირველ ყოვლისა, ბრენდის პლატფორმებზე გამოქვეყნებული ტექსტი კომპანიის იდენტობას აყალიბებს — როგორ ურთიერთობს ის მომხმარებელთან. ეს კი შემდგომ პირდაპირ აისახება ნდობაზე, რომელიც აუცილებელი პირობაა შეძენილი მომხმარებლის შესანარჩუნებლად და ახლის მისაზიდად.

გასათვალისწინებელია ისიც, რომ ყველა პლატფორმაზე ერთი და იგივე ტექსტის გამოყენება ვერ ამართლებს — იმისათვის, რომ მომხმარებლის ენაზე ისაუბრო, უნდა იცოდე, რა კატეგორიის აუდიტორიას მიმართავ.

საბოლოო ჯამში კი, კარგმა ტექსტმა მომხმარებელი უნდა მიიზიდოს, დააინტერესოს, გაართოს და აგრძნობინოს, რომ ბრენდს მისი საუკეთესოდ ესმის. სწორედ ამის მიღწევაში დაგეხმარება ბიზნესკურსის მასტერკლასი.

საქართველოს ბანკის შექმნილი პლატფორმა ბიზნესკურსი სხვადასხვა თემატიკის ათობით უფასო სასწავლო კურსსა და მასტერკლასს უყრის თავს. მისი საშუალებით  შეიძენ თანამედროვე ბიზნესის სამართავად საჭირო ცოდნასა და უნარებს. ბიზნესკურსი დაგეხმარება, დაგეგმო და განახორციელო ყველა ნაბიჯი ბიზნესის იდეიდან გამართულ მარკეტინგამდე. პლატფორმა მოიცავს სამეწარმეო საქმიანობის თითქმის ყველა ასპექტს: გაყიდვებს, მომსახურების მენეჯმენტს, ბუღალტერიას, რეკლამირებას, ადამიანური რესურსების მართვას და სხვა. საგულდაგულოდ შედგენილ სასწავლო კურსებს კი სხვადასხვა სფეროს წამყვანი სპეციალისტები უძღვებიან.

ბიზნესკურსის შესახებ მეტის გაგებასა და პლატფორმაზე რეგისტრაციას ვებგვერდზე შეძლებ.