ტრიუმფალური მოგების ანალიზი – სომხეთი-საქართველოს მატჩის მიმოხილვა

სომხეთი სამბურთიანი უპირატესობით დამარცხებულია!

წინ განმეორებითი შეხვედრაა!                  

ერთა ლიგის სარელეგაციო პლეი ოფის პირველ შეხვედრაში საქართველოს ეროვნულმა ნაკრებმა გასვლით შეხვედრაზე სომხეთის ნაკრები ანგარიშით 3-0 დაამარცხა. ფრანგი სპეციალისტის, ვილი სანიოლის გაწვრთნილმა გუნმდა პირველივე შეხვედრაში მოიპოვა უდიდესი უპირატესობა და განმეორებითი თბილისუსრი შეხვედრა, ფაქტობრივად, ფორმალობად იქცა.

⚽სომხეთი VS საქართველო 0-3

ქოჩორაშვილი (33’), მიქაუტაძე (37’), მიქაუტაძე (59’).

ვილი სანიოლმა მატჩამდეც დააანონსა, რომ ჩვენი გუნდი ტრადიციული სამცველიანი ტაქტიკით არ ითამაშებდა და სიახლეები იქნებოდა როგორც ტაქტიკურად, ისე შემადგენლობის მხრივ – ამჯერად ვილიმ 4-3-2-1 განლაგება და შემდეგი თერთმეტეული შეარჩია:

მამარდაშვილი – კაკაბაძე, გოგლიჩიძე, ლოჩოშვილი, აზაროვი – კვეკვესკირი, კიტეიშვილი, ქოჩორაშვილი – დავითაშვილი, ჩაკვეტაძე – მიქაუტაძე.

წიტაიშვილი (66’), ზივზივაძე (66’) მექვაბიშვილი (66’), დვალი (70’), გოჩოლეიშვილი (75’)

ყვითელი ბარათების გამო დისკვალიფიცირებულები იყვნენ გუნდის კაპიტანი, გურამ კაშია და გუნდის უდავო ლიდერი, ხვიჩა კვარაცხელია. მიუხედავად ამ მძიმე დანაკლისისა, საქართველომ კარგი სისტემური ფეხბურთი უჩვენა და წინასწარ ჩაფიქრებული ტაქტიკური სვლები შესანიშნავად განახორციელა.

თამაში შედარებით მძიმედ დაიწყო. პირველ წუთებში გართულდა ბურთის გათამაშება, შენარჩუნება და დაცვიდან შეტევაში ასვლა, თუმცა მეტოქესაც ჰქონდა მსგავსი პრობლემები, განსაკუთრებით დაცვის ხაზში ბურთის გათამაშების კუთხით. კარგად გამოვიყენეთ ეს სუსტი წერტილი და შესანიშნავი პრესინგის ფონზე რამდენიმე სახიფათო კონტრიერიშშიც კარგად გავიქეცით. 33-ე წუთზე ქოჩორაშვილმა საუკეთესოდ შეარჩია დრო, გაზარდა ზეწოლა მეტოქის საყრდენ ზონაში, ბურთი კიტეიშვილთან გაითამაშა, აღმოჩნდა მეკარესთან პირისპირ და დაბალ მარცხენა კუთხეში ძლიერად დაურტყა 0-1!

პირველი გოლის მერე აშკარად გამოგვისწორდა ხასიათი და ამჯერად ჩვენი გუნდის მეკარემ, გიორგი მამარდაშვილმა გამოიჩინა თავი და სანაკრებო კარიერაში პირველი საგოლე გადაცემა გაუკეთა წინ მცველების მიერ უმეთვალყურეოდ დატოვებულ გიორგი მიქაუტაძეს, რომელმაც ძალიან მახვილი კუთხიდან ჭკვიანური და უზუსტესი დარტყმით გაიტანა კიდეც გოლი 0-2!

შესვენებაზე უკვე ორბურთიარი უპირატესობით გავედით და სავარაუდო იყო, რომ სომხეთის ნაკრები განახორციელებდა ცვლილებებს, დიდი ძალით გადმოვიდოდა შეტევაზე, რაც ჩვენ დამატებით შანსს გაგვიჩენდა კონტრიერიშებზე და ასეც მოხდა: 59-ე წუთზე ჩვენი საჯარიმოს მისადგომებთან ამჯერადაც ქოჩორას ჩაჭრის წყალობით მოვიპოვეთ ბურთი, მიქაუტაძემ ჩაკვეტაძეს შეაყოლა სივრცეში ბურთი, ჩაკვემ კი ყველაზე სწორ დროს დაუბრუნა ჟორჟს, რომელმაც ცარიელ კარში შეაგორა 0-3!

მესამე გოლის მერე კიდევ გვქონდა რამდენჯერმე გოლის გატანის შანსი, თუმცა არ გაგვიმართლა. რაც შეეხება სომხების შეტევებს, კარისკენ მათ ჯამში 8-ჯერ დაგვირტყეს, კარის ჩარჩოში კი მხოლოდ 2-ჯერ და ორივე შემთხვევაში მოახერხა გიორგი მამარდაშვილმა დამაჯერებლად მოგერიება. მეტოქე თითქმის ყველა ცალკეულ კომპონენტში დავჯაბნეთ გამართული ფეხბურთითა და დაცვის ზონაში მინიმალური შეცდომების ხარჯზე. განსაკუთრებით გამოსარჩევია იტალიური ემპოლის 20 წლის მცველი, საბა გოგლიჩიძე, რომელმაც აბსოლუტურად ყველა ეპიზოდში გამოავლინა თავისი ტალანტი და უშანსოდ დატოვა სომეხი შემტევები. რაც ყველაზე მთავარია, საბა უშეცდომო იყო პოზიციურ თამაშში.

აღსანიშნავია ის ფაქტიც, რომ გიორგი მიქაუტაძემ სომხეთთან შესრულებული დუბლით საქართველოს ნაკრების ყველა დროის ბომბარდირთა სიაში გადაუსწრო თემურ ქეცბაიასა (16 გოლი) და ხვიჩა კვარაცხელიას (17 გოლი) და 18 გოლით ადგილზე გადავიდა. ჩამორჩება ქართული ფეხბურთის ლეგენდას, 26-გოლიან შოთა არველაძეს.

განმეორებითი შეხვედრა თბილისში, დინამო არენაზე 23 მარტს, 18:00 საათზე გაიმართება. თბილისურ შეხვედრაში დაბრუნდებიან გურამ კაშია და ხვიჩა კვარაცხელია. საინტერესოა, ამჯერად რა ტაქტიკურ ცვლილებებს მიმართავს ვილი სანიოლი და როგორი იქნება ჩვენი თერთმეტეული. მიუხედავად დამაჯერებელი უპირატესობისა, საქმე ბოლომდეა მისაყვანი და დარწმუნებულები ვართ, რომ ნაკრები სრული კონცენტრაციითა და მონდომებით ითამაშებს დედაქალაქშიც. ჩვენ ერევანში უკვე ვაჩვენეთ ყველას, რომ საქართველოს ადგილი ერთა ლიგის B დივიზიონშია – ახლა საჭიროა, ეს დიდი უპირატესობა საბოლოო შედეგად ვაქციოთ, საუკეთესო წინ არის!