დასრულდა ევრო 2024-ის საკვალიფიკაციო ეტაპი – საქართველოს ნაკრებმა A ჯგუფში 8 ქულა მოიპოვა და ბოლოსწინა ადგილი დაიკავა. ჯგუფის უკანასკნელ შეხვედრაში ესპანეთის ქალაქ ვალიადოლიდში ადგილობრივ ნაკრებს დავუპირისპირდით და ანგარიშით 3-1 დავმარცხდით.
ესპანეთი V საქართველო 3-1
საქართველოს ეროვნული ნაკრების მთავარმა მწვრთნელმა, ვილი სანიოლმა ესპანური მატჩისთვის ტრადიციული 3-მცველიანი სათამაშო სქემა (3-4-2-1) და შემდეგი თერთმეტეული შეარჩია:
გიორგი მამარდაშვილი – გურამ კაშია, საბა კვერკველია, ლუკა ლოჩოშვილი – ოთარ კაკაბაძე, ნიკა კვეკვესკირი, გიორგი ქოჩორაშვილი, ირაკლი აზაროვი – გიორგი ჩაკვეტაძე, ხვიჩა კვარაცხელია – გიორგი მიქაუტაძე.
თბილისში, დინამო არენაზე შოტლანდიის ნაკრების წინააღმდეგ გამართული მატჩისგან განსხვავებით, ჩვენი ნაკრების თავკაცმა მარცხენა ფლანგი ლევან შენგელიას ნაცვლად (რომელსაც მცირე ტრავმა აწუხებს) ირაკლი აზაროვი დააყენა, სხვა პოზიციების მხრივ ცვლილება არ ყოფილა.
რაც შეეხება მეტოქის შემადგენლობას, ესპანელთა მთავარი მწვრთნელი, ლუის დე ლა ფუენტე ესპანური ფეხბურთისთვის შეუცვლელ 4-3-3 ტაქტიკას დაეყრდნო და შესაბამისი თერთმეტი ფეხბურთელიც შეარჩია:
უნაი სიმონი – დანი კარვახალი, ლე ნორმანდი, ინიგო მარტინესი, ხოსე გაია – მერინო, გავი, როდრი – ფერან ტორესი, ალვარო მორატა, ნიკო ვილიამსი.
ესპანელთაგან გოლები ცენტრალურმა მცველმა, ლე ნორმანდმა და კატალონიის ბარსელონას ვინგერმა, ფერან ტორესმა გაგვიტანეს (ორივე მათგანმა თავით მოახერხა მამარდას კარის აღება), ბოლო გოლი კი ლუკა ლოჩოშვილმა შემთხვევითი ასხლეტით საკუთარ კარში ჩაჭრა.
მიუხედავად ანგარიშისა და საბოლოო შედეგისა, ამ ურთულეს შეხვედრაშიც გამოსარჩევია რამდენიმე მოთამაშე და რამდენიმე სათამაშო ეპიზოდი – ჩვენი მხრიდან ერთადერთი გოლის ავტორი კვლავ ხვიჩა კვარაცხელიაა. გვახსოვს, რომ კვარამ შოტლანდიას დუბლი შეუსრულა და ახლაც გააგრძელა შედეგიანი თამაში – ყველანაირი უგოლო, უიღბლო მშრალი სერიები წარსულს ჩაბარდა და ვიმედოვნებთ, რომ ეს საგოლე სტატისტიკა და განწყობა მას კლუბშიც გაჰყვება და კიდევ უფრო დახუნძლული დაუბრუნდება ჩვენი შვიდიანი მარტის უმნიშვნელოვანეს თამაშებს.
კვარას გოლი ევროპული გრანდის კარში ცალსახად სასიხარულო ამბავია, თუმცა არანაკლებ სასიხარულო და მნიშვნელოვანი ამბავია გიორგი ჩაკვეტაძის კიდევ ერთი საგოლე გადაცემა – კვლავაც კვარასთვის მიცემული: კვიპროსთან, შოტლანდიასთან და ბოლოს ესპანეთთან თანამედროვე ქართული ფეხბურთისთვის ორი ყველაზე საჭირო გვარი სამ საგოლე კონტრიბუციაში ერთად მოხვდა, რაც დამატებით იმედს გვაძლევს გულშემატკივარს.
საბოლოო ჯამში, თამაშზე იმის თქმა შეიძლება, რომ ესპანეთმა დამაჯერებლად მოახერხა ჩვენი დამარცხება. კვარას გოლის ეპიზოდის გარდა, მეტი დიდად სახიფათო მომენტი არ გვქონია, ფურია როხა ბურთს გაუთავებლად აკონტროლებდა და ეს კონტროლი მატჩის დასრულებამდე ჰქონდა დაწესებული. ჩვენთვის ესპანეთის ნაკრები უკვე ტრადიციულ მეტოქედ ჩამოყალიბდა და ისტორიის განმავლობაში 7 შეხვედრა დაგვიგროვდა მათთან, საიდანაც ექვს ოფიციალურ მატჩში დავმარცხდით, ერთ ამხანაგურ მატჩში კი მოვახერხეთ ევროპული გრანდის დამარცხება, თანაც გასვლაზე.
ჩვენი ჯგუფიდან პირველ და მეორე ადგილებზე ესპანეთისა (21 ქულა) და შოტლანდიის (17 ქულა) ნაკრებები გავიდნენ და მოიპოვეს ევროპის ჩემპიონატზე ასპარეზობის უფლება. ჩვენი ნაკრებისთვის კი სანუკვარ სანაკრებო ტურნირზე თამაშისთვის ბრძოლა არ დასრულებულა და ყველაფერი გაზაფხულზე, ერთა ლიგის მატჩებში გადაწყდება.
საკვალიფიკაციო ეტაპის მატჩებით მთლიანად საფეხბურთო წელი დასრულდა, წინ ერთა ლიგამდე ერთი სანაკრებო შეკრება და ამხანაგური თამაში გველოდება, მერე კი ის, რასაც ამდენი ხანია, ველოდებით. სანაკრებო პაუზებს შორის მძიმე და დატვირთული საკლუბო ფეხბურთი განახლდება, ჩვენი მოთამაშეები კლუბებს, ქვეყნის ჩემპიონატებსა და ევროპულ ტურნირებს დაუბრუნდებიან – ვიმედოვნოთ, რომ თითოეულ მათგანს ყველა ეტაპზე ექნება სათამაშო დრო, წარმატებული მატჩები და, რაც ყველაზე მთავარია, ჯანმრთელობა.
ავტორი: გიორგი ყორღანაშვილი