სლოვენიის ქალაქ მარიბორში 23 ივლისს საზეიმოდ გაიხსნა ევროპის ახალგაზრდული ოლიმპიური ფესტივალი. „მარიბორი 2023“ რიგით XVII ფესტივალია და მასში მონაწილეობას კონტინენტის 48 ქვეყნიდან ჩასული 14-დან 18 წლამდე სპორტსმენები (სულ 2419) იღებენ. ეს სწორედ ის სპორტული ღონისძიებაა, 2015 წელს საქართველოში, თბილისში რომ გაიმართა.
მარიბორში ახალგაზრდა ქართველი სპორტსმენებიც ჩავიდნენ – 31 თინეიჯერი ცხრა სპორტულ სახეობაში იასპარეზებს: ჯუდო, მძლეოსნობა, ცურვა, ტანვარჯიში, სკეიტბორდი, ჩოგბურთი, კალათბურთი 3X3, ველოსპორტი – საგზატკეცილო და ველოსპორტი – სამთო.
ქართული დელეგაციის წარმომადგენლობამ ამ ოლიმპიურ ფესტივალზე ყველაზე დიდი წარმატების მიღწევა ჯერჯერობით ჯუდოს კატეგორიაში მოახერხა: უკვე მოვასწარით უმაღლესი სინჯის მედლების მოპოვება. თუმცა, ეს ის სპორტული ასაკია, როცა ნებისმიერი სპორტის სახეობაში მსგავს ტურნირში მონაწილეობა გულისხმობს უდიდეს გამოცდილებას და, შესაბამისად, ტურნირის შემდგომი წარმატებული სპორტული კარიერის ალბათობაც იზრდება.
ჯერჯერობით უნდა ითქვას, რომ ტურნირი ძალიან კარგადაა ორგანიზებული, თანაც ეს სლოვენიისთვის პირველი ფართომასშტაბიანი მულტიდისციპლინური სპორტული ღონისძიებაა, რომლის მასპინძლობაც მათ უწევთ. გარდა ინფრასტრუქტურული და პრაგმატული უპირატესობებისა, ამ ტურნირის მთავარი ძალა და ინერცია ახალგაზრდა სპორტსმენებში მრავალფეროვანი და აქამდე აღმოუჩენელი სპორტული სახეობების პოპულარიზაციაა. ჩვენც 2015 წლის ზაფხულში სწორედ ეს გამოცდილება მივიღეთ და მნიშვნელოვნად დაგვეხმარა შემდგომი განვითარებისთვის.
როგორც უკვე ვთქვით, ქართველმა ჯუდოკებმა მოახერხეს მედლების მოპოვება:
🥇 შოთა ბაჩოშვილი (-50 კგ)
შოთა ტურნირის პირველივე დღეს ჩაერთო გათამაშებაში. საკმაოდ დაძაბული დაპირისპირება გამოდგა ნახევარფინალში აზერბაიჯანელი მიმიშოვის წინააღმდეგ, რომელთანაც ქართველი ჯუდოკა ორჯერ მარცხდებოდა ვაზარით, თუმცა ორივეჯერ ნე-ვაზაში ბრწყინვალედ იმოქმედა – შოთამ მეტოქე ჯერ შებოჭვაზე დაიჭირა და ასე გაათანაბრა ანგარიში, მერე კი მახრჩობელა ილეთით ფინალშიც გავიდა, სადაც ბელგიელი ისაევი დახვდა და ადვილადაც დაამარცხა. ასე ავიღეთ პირველი ოქრო.
🥇 მერაბ სამადაშვილი (-55 კგ)
შოთას მსგავსად, მერაბიც პირველივე დღეს ასპარეზობდა, ისიც მსუბუქ წონაში და ამჯერადაც ნახევარფინალურ ეტაპზე მეტოქედ აზერბაიჯანელი ჯუდოკა გამოვიდა – აიხან მირზაზადის იპონით დამარცხების შემდეგ ქართველი ფინალში იტალიელ ლატანცის შეხვდა და ამჯერადაც იპონი, თანაც სულ რაღაც 19 წამში. რამდენიმეწამიანი ფინალი და მეორე ოქრო საქართველოს!
🥇 მათე გველესიანი (-66 კგ)
მათემ ფინალში გასვლამდე 4 მეტოქეს სძლია – ორ შემთხვევაში იპონი, ორჯერაც ორი ვაზარი და დამაჯერებელი გამარჯვებები ფინალის გზაზე. ფინალში კი მისი მეტოქე უნდა ყოფილიყო ხორვატი ჯუდოკა, ლუკა კატიჩი, რომელმაც ნახევარფინალში იმდენად მძიმე ტრავმა მიიღო, ფინალში ასპარეზობა ვეღარ მოახერხა, შესაბამისად, ოქროს მედალიც ავტომატურად გადაეცა ჩვენს სპორტსმენს და ესეც მესამე ოქროს ამბავი.
🥈 გიორგი ბენდელიანი (-81)
ჯერჯერობით ტურნირზე ერთადერთი ვერცხლის პრიზიორი გახდა გიორგი და მიუხედავად ფინალში დასანანი მარცხისა, მან ძალიან სანახაობრივი და რისკიანი ჭიდაობის სტილით დაგვამახსოვრა თავი.
ამ დროის მონაცემებით, საქართველოს ნაკრებს ევროპის ახალგაზრდულ ოლიმპიურ თამაშებზე სულ 4 მედალი აქვს – 3 ოქრო და 1 ვერცხლი. 48-ქვეყნიან ტურნირის საერთო ჩათვლაში ძალიან მაღალ, მე-11 ადგილზე ვიმყოფებით, თანაც რამდენიმე დასანანი მარცხი ვიწვნიეთ ჯუდოს სხვა წონებში, თორემ უფრო მაღალი ადგილის დაკავების რეალური შანსი არსებობდა. თუმცა, როგორც უკვე აღინიშნა, ეს ტურნირი თავიდან ბოლომდე გამოცდილების დაგროვებაზეა და სწორედ ეს შესაძლებლობაა მთავარი სინჯის მედალიც.
ერთი საინტერესო და აღსანიშნავი ფაქტი დაფიქსირდა ჩვენი ოქროსმედალოსანი მათე გველესიანის დაჯილდოების ცერემონიისას: როგორც უკვე იცით, მძიმე ტრავმის გამო მისმა მეტოქემ ფინალში ჭიდაობა ვერ შეძლო, მათემ კი იგი კვარცხლბეკზე თავად მიაცილა – ტრავმირებულ ლუკა კატიჩს დაეხმარა, რადგან ხორვატს სიარულიც კი უჭირდა. ეს კადრები უყურადღებოდ არ დარჩა არც მაყურებელს და არც ჯუდოს ევროპის კავშირს, რომლის შეფასებაც საუკეთესოდ აჯამებს ამ ტურნირს და ამ ტურნირზე ქართველი სპორტსმენების ასპარეზობას:
„[…] ჯუდო ნამდვილად მეტია, ვიდრე უბრალოდ სპორტი და როცა ჯუდოში ასეთი ათლეტები გვყავს, ნათელ მომავალზე არ უნდა ვიდარდოთ.“
წლევანდელი ევროპის ახალგაზრდული ოლიმპიური ფესტივალი მარიბორში 29 ივლისს დასრულდება და შესაბამისად, ვაგრძელებთ იმ ქართველი სპორტსმენების გულშემატკივრობას, რომლებსაც ასპარეზობის შესაძლებლობა ჯერ წინ აქვთ. როგორც ამ ფესტივალზე, ისე ზოგადად, საქართველოს ოლიმპიური ნაკრების გენერალური სპონსორი საქართველოს ბანკია.