ქართველი ჯუდოკების შედეგები
ავსტრიაში 7-9 მარტს ჩატარებული გრან პრის შემდეგ, რომელშიც ქართველმა ჯუდოკებმა ერთი ოქროსა და ორი ვერცხლის მედლის მოპოვება მოახერხეს, ჯუდოს საერთაშორისო ფედერაციამ, იგივე IJF-მა ჯუდოკების მსოფლიო რეიტინგი განაახლა.
ახალი რეიტინგის მიხედვით, ქართველმა მამაკაცმა ჯუდოკებმა შესაბამის წონებში შემდეგი ადგილები დაიკავეს:
ტატო გრიგალაშვილი (81 კგ.) – I ადგილი
ევროპისა და მსოფლიოს სამ-სამი გზის ჩემპიონი, პარიზის ოლიმპიური თამაშების ვერცხლის მედალოსანი 81 კილოგრამ წონით კატეგორიას 25 წლის ასაკში ერთპიროვნულად ლიდერობს. აღსანიშნავია, რომ ტატომ ბოლო ორი შეჯიბრება 90 კილოგრამ წონით კატეგორიაში იასპარეზა, მიუხედავად ამისა, ის ერთით ქვედა წონაში ლიდერობას არ კარგავს.
ლაშა ბექაური (90 კგ.) – II ადგილი
ორგზის ოლიმპიური ჩემპიონი, 24 წლის ლეგენდარული ქართველი ჯუდოკა რეიტინგის მეორე და მესამე ადგილებს ლუკა მაისურაძესთან იყოფს. წონის ლიდერი კი ამ შემთხვევაშიც იაპონელი სპორტსმენი, სანოშირო მურაოა. მურაო სწორედ ის ჯუდოკაა, რომელიც ლაშამ პარიზის ოლიმპიური თამაშების ფინალში დაამარცხა და ზედიზედ მეორე ოლიმპიური ოქრო დაისაკუთრა.
ლუკა მაისურაძე (90 კგ.) – III ადგილი
როგორც ვთქვით, ლუკა მაისურაძე საკუთარი წონის რეიტინგის მეორე და მესამე ადგილებს იყოფს ლაშა ბექაურთან. ლუკა მსოფლიოსა და ევროპის ჩემპიონატის ოქროს მედალოსანი და არაერთი გრან პრის გამარჯვებულია.
გიორგი სარდალაშვილი (60 კგ.) – III ადგილი
უნიჭიერესი ქართველი ჯუდოკა, რომელმაც შარშან აბუ დაბიში 20 წლის ასაკში შეძლო და მსოფლიო ჩემპიონობა იზეიმა, შარშანწინ კი დოჰაში ბრინჯაოს მედლის მოპოვება შეძლო, ახალი რეიტინგის მიხედვით, 60 კილოგრამ წონით კატეგორიაში მე-3 ადგილს იკავებს. მისი წონის ლიდერია იაპონელი ნაგაიამა.
გურამ თუშიშვილი (100+ კგ.) – III ადგილი
პარიზის ოლიმპიურ თამაშებზე ტედი რინერთან ცნობილი ინციდენტის შემდეგ 6-თვიანი დისკვალიფიკაციიდან დაბრუნებულმა და ჯუდოს მონატრებულმა გურამმა ავსტრიის გრან პრიზე უკვე მოახერხა ოქროს მედლის მოპოვება. სწორედ ამ გრან პრიზე გამარჯვების წყალობით მალევე დაუბრუნა იგი მძიმეწონოსანთა რეიტინგის სამეულს.
ილია სულამანიძე (100 კგ.) – IV ადგილი
23 წლის ჯუდოკა ბოლო ოლიმპიური თამაშების ვერცხლის მედლის მფლობელი, მსოფლიო ჩემპიონატის ბრინჯაოს, ხოლო ევროპის ჩემპიონატზე კი ორგზის ვერცხლის მედალოსანია და იკავებს კიდეც 100 კილოგრამ წონით კატეგორიაში მე-4 ადგილს, თუმცა ქართველმა გულშემატკივარმა კარგად იცის ილიას პოტენციალი და დარწმუნებით შეგვიძლია იმის თქმა, რომ ახლა რეიტინგის სათავეში აზერბაიჯანელი კოცოიევის ყოფნა დროებითია.
ვაჟა მარგველაშვილი (66 კგ.) – VI ადგილი
ევროპის ორგზის ჩემპიონი და 2020 წლის ტოკიოს ოლიმპიური თამაშების ვერცხლის პრიზიორი ამჟამად საკუთარი წონის რეიტინგის მე-6 ადგილზეა. 66 კილოგრამ წონით კატეგორიასაც იაპონელი ჯუდოკა, ჰიფუმი აბე უდგას სათავეში.
რაც შეეხება ქალ ჯუდოკათა რეიტინგს, აუცილებლად აღსანიშნავია 25 წლის ქართველი სპორტსმენი, ეთერ ლიპარტელიანი, რომელიც 57 კილოგრამ წონითი კატეგორიის რეიტინგის საპატიო მე-9 ადგილს იკავებს. ეთერი პირველი ქართველი ქალი ჯუდოკაა, რომელიც ახალგაზრდებში ევროპისა და მსოფლიოს ჩემპიონის ტიტულს დაეუფლა.
უნდა ითქვას, რომ ჯუდოს საერთაშორისო ფედერაციის ეგიდით გასამართი შემდეგი ტურნირი თბილისის გრანდ სლემი იქნება – ტურნირი 21 მარტს აიღებს სტარტს და 23 მარტს იქნება დასკვნითი დღე. შარშანდელ თბილისის გრანდ სლემზე საქართველოს ნაკრები 43 (28 მამაკაცი და 15 ქალი) ჯუდოკათი გამოვიდა და საერთო ჩათვლაში პირველი ადგილიც დაიკავა. ოთხი ოქრო და ერთი ბრინჯაო – ასეთი იყო ჩვენი მონაპოვარი, ვიმედოვნოთ, რომ ამ შესანიშნავ შედეგს წელს კიდევ უფრო გავაუმჯობესებთ. საუკეთესო წინ არის!