კვარას ბრწყინვალე პერფორმანსი ჩემპიონთა ლიგის ფინალში
ხვიჩა კვარაცხელია ჩემპიონთა ლიგის გამარჯვებულია! 2025 წლის 31 მაისი ქართული ფეხბურთის ისტორიაში ახალი ოქროს თარიღია – პარი სენ-ჟერმენმა მიუნხენში, ალიანს არენაზე გამართულ საფინალო მატჩში იტალიურ ინტერს ფეერიული ფეხბურთით სძლია:
პარი სენ-ჟერმენი VS ინტერი 5-0
ჰაკიმი [12’]; დუე [20’]; დუე [63’]; კვარაცხელია [72’]; მაიულუ [86’].
ესპანელმა სპეციალისტმა, ლუის ენრიკემ სეზონის უმთავრეს მატჩში კარგად ნაცადი ტაქტიკა (4-3-3) და თერთმეტეული გამოიყვანა. რა თქმა უნდა, ძირითად შემადგენლობაში იყო გუნდის შვიდიანი და ერთ-ერთი ლიდერი – ხვიჩა კვარაცხელია:
პარი სენ–ჟერმენი: დონარუმა – ჰაკიმი, მარკინიოსი, პაჩო, მენდეში – ნევეში, ვიტინია, ფაბიან რუისი – დუე, დემბელე, კვარაცხელია.
თამაში ზუსტად ისე დაძაბულად დაიწყო, როგორც კონტინენტის უდიდეს საკლუბო ჩემპიონატს შეეფერება. პარიზულმა კლუბმა სტარტზევე დიდი სათამაშო უპირატესობა მოიპოვა. ლუის ენრიკეს ყველა ჩანაფიქრისა და განზრახვის საუკეთესო მაგალითი გამოდგა მატჩის პირველი გოლი – მე-12 წუთზე ბრწყინვალე კომბინაცია, უზუსტესი სწრაფი პასები და ცარიელი კარის წინ აღმოჩენილი აშრაფ ჰაკიმი და 1-0! სწრაფი გოლიდან მალევე, მე-20 წუთზე კვარას საკვანძო გადაცემის შემდეგ დემბელე საჯარიმოს მისადგომებთან ახლოს აღმოჩნდა, დუეს უპასა და 2-0! მთელი პირველი ტაიმის განმავლობაში ეს იყო წარმოუდგენელი ინტენსივობისა და დინამიკის ფეხბურთი, რომელსაც პარიზელები სთავაზობდნენ მეტოქეს როგორც დაცვაში, ისე – შეტევაში და ხვიჩა კვარაცხელია შეუცდომელი იყო როგორც დაცვაში, ისე – შეტევაში.
მეორე ტაიმში სიმონე ინძაგის გუნდმა თამაში შედარებით გამოასწორა, შეტევაშიც უფრო აქტიურად მიდიოდა, რაც დამატებით შესაძლებლობებს უქმნიდა პსჟ-ს სწრაფ გარემარბებს. მეორე ტაიმის პირველ ათ წუთში კვარასაც ჰქონდა გოლის გატანის რამდენიმე შესაძლებლობა და მიზნამდე სულ ცოტა აკლდებოდა. 63-ე წუთზე სწორედ კონტრშეტევაზე მოახერხა პსჟ-მ მესამე გოლის გატანა – კვლავაც შესანიშნავად გათამაშებული ბურთი, მეკარესთან პირისპირ დარჩენილი დუე, ფრანგის დუბლი და 3-0!
2025 წლის ჩემპიონთა ლიგის ფინალის 72-ე წუთი კი ქართული ფეხბურთის ისტორიაში სამუდამოდ ჩაიწერა – ოსმან დემბელეს გამჭოლი გადაცემა და მეკარესთან პირისპირ დარჩენილი ხვიჩა კვარაცხელია, მოტყუებული მეკარე და ახლო კუთხეში მოჭრილი ბურთი და 4-0! ხვიჩა კვარაცხელია გახდა პირველი ქართველი ფეხბურთელი, რომელმაც გოლი გაიტანა ჩემპიონთა ლიგის ფინალში!
პსჟ-მ ფინალში ბოლო მეხუთე გოლი ძირითადი დროის დასრულებამდე 3 წუთით ადრე შეაგდო – შეცვლაზე შემოსულმა მაიულუმ ბარკოლას შესანიშნავი გადაცემით ისარგებლა და მეკარისგან ახლო კუთხეში კიდევ ერთი ლამაზი გოლი გაიტანა და 5-0!
თამამად შეიძლება იმის თქმა, რომ ნაპოლიდან პსჟ-ში ხვიჩა კვარაცხელიას გადასვლა ზამთრის სატრანსფერო ფანჯრის ისტორიაში ყველა დროის ერთ-ერთი გამორჩეული ტრანსფერია – ნახევარი სეზონის გავლის შემდეგ მართალია, პსჟ საფრანგეთის ჩემპიონატს დამაჯერებლად ლიდერობდა, თუმცა უკვე დიდი ხანია, რაც პარიზული კლუბის მიმართ თამასა ბევრად უფრო მაღლაა აწეული და ყოველ წელს არსებობს იმის მოლოდინი, რომ მათ მთავარი საკლუბო ჩემპიონატის ტიტულისთვის უნდა იბრძოლონ.
ახალი ფორმატით ჩატარებულ ჩემპიონთა ლიგაზე პლეი ოფში ძლივს გასულ გუნდში მოდის ქართველი შემტევი და გუნდს ახალი სუნთქვა ეხსნება – ხვიჩას გუნდში მისვლა ცვლის გუნდის საერთო ტაქტიკურ მახასიათებელს, კატასტროფულად ზრდის კონკურენციას შეტევის წინა ხაზში და რაც ყველაზე მთავარია, ხვიჩა კვარაცხელია ხვდება ალბათ მისთვის ყველაზე შესაფერის საფეხბურთო ტაქტიკოსს – ლუის ენრიკეს, რომელიც კლუბის ახალ სიცოცხლის, ახალგაზრდული პროექტის ერთ-ერთ მთავარ საყრდენად ხვიჩა კვარაცხელიას მოიაზრებს და თავად კვარაც ავითარებს საკუთარ სათამაშო შესაძლებლობებს.
ლივერპული, ასტონ ვილა, არსენალი – ფინალამდე სამი ინგლისური კლუბი დამარცხებულია, თამაშიდან თამაშამდე კვარა უმატებდა და კლუბის იმდენად ორგანული ნაწილი ხდებოდა, თითქოს არათუ რამდენიმე თვის მოსული, არამედ წლების განმავლობაში, ჯერ კიდევ აკადემიიდან მოყოლებული ყოფილიყო ფრანგული გრანდის შემტევი.
თავის დროზე ხვიჩა კვარაცხელიას ნეაპოლურმა მოგზაურობამ საქართველოში ფეხბურთის დიდი ხნის გულშემატკივრებს დიდი ხნით დაკარგული იმედი დაუბრუნა და რაც კიდევ უფრო მნიშვნელოვანია, გააჩინა ფეხბურთის ახალი მაყურებელი. ხვიჩას წლევანდელი გზა კიდევ უფრო განსხვავებულ და სწრაფ ემოციებს აღძრავდა ქართველებში – ზამთრის ტრანსფერი, პარიზულ გრანდში თავის დამკვიდრება, საფრანგეთის ჩემპიონობა, უამრავი დრიბლინგი, გოლები, საგოლე გადაცემები და უდიდესი საკლუბო ჩემპიონატის ფინალი – მთელი ეს ემოციათა ნაკრები სულ რაღაც ხუთ თვეში!
მთელი საქართველო კვარას ფეხდაფეხ, ხან მარცხენა ფლანგზე, ხან მარჯვნივ, ხანაც კი – მოედნის შუაში, მიჰყვება კვარას და არავინ იცის, რა იქნება მისი შემდეგი ცრუმოძრაობა, მაგრამ ჩვენი გულშემატკივრობა გრძელდება ნებისმიერ შემთხვევაში, ახალი გზა ახალ ინერციას აჩენს, და სწორედ ამ გულშემატკივრობის, ემოციისა და ინერციის ძალითა გავიდა ხვიჩა კვარაცხელია და მთელი საქართველო ჩემპიონთა ლიგის ფინალში.