ერთა ლიგის პლეი ოფის მატჩებამდე რამდენიმე დღე რჩება – 20 და 23 მარტს საქართველოს ეროვნული ნაკრები ორმატჩიან დუელში სომხეთის ნაკრებს შეხვდება. იმ შემთხვევაში, თუკი ფრანგი სპეციალისტის, ვილი სანიოლის გაწვრთნილი გუნდი მოახერხებს სომხეთის დამარცხებას, B დივიზიონში შეინარჩუნებს ადგილს.
⚽სომხეთი VS საქართველო – 20 მარტი, 21:00 საათი;
⚽საქართველო VS სომხეთი – 23 მარტი, 18:00 საათი.
ვილი სანიოლმა მნიშვნელოვანი მატჩების წინ უკვე დაასახელა რჩეული 25 ფეხბურთელი:
მეკარე: გიორგი მამარდაშვილი (ვალენსია), გიორგი ლორია (ომონია არადიპუ), ლუკა გუგეშაშვილი (პანსერაიკოსი).
დაცვა: გურამ კაშია (სლოვანი), ოთარ კაკაბაძე (კრაკოვია), ლაშა დვალი (აპოელ-ი), ლუკა ლოჩოშვილი (სალერნიტანა), გიორგი გოჩოლეიშვილი (კოპენჰაგენი), საბა გოგლიჩიძე (ემპოლი), ირაკლი აზაროვი (შახტარი), ლუკა ლაცაბიძე (ჩერნომორეცი).
ნახევარდაცვა: ოთარ კიტეიშვილი (შტურმი), გიორგი ქოჩორაშვილი (ლევანტე), ნიკა კვეკვესკირი (ნირეჰაზა), ანზორ მექვაბიშვილი (კრაიოვა), ლევან შენგელია (ოფი კრეტა), გიორგი წიტაიშვილი (გრანადა), გიორგი ჩაკვეტაძე (უოტფორდი), შოთა ნონიკაშვილი (ჩერკასი), გიორგი ზარია (ქაირათი), ზურიკო დავითაშვილი (სენტ-ეტიენი).
თავდასხმა: ხვიჩა კვარაცხელია (პარი სენ-ჟერმენი), ბუდუ ზივზივაძე (კარლსრუე), გიორგი მიქაუტაძე (ლიონი), გიორგი გულიაშვილი (სარაევო).
აღსანიშნავია, რომ 25-კაციან შემადგენლობაში 4 წლის შემდეგ დაბრუნდა გიორგი ზარია, ალმათის ქაირათის ფეხბურთელი. მან ეროვნულ ნაკრებში ერთადერთი შეხვედრა გამართა 2021 წელს ესპანელების წინააღმდეგ.
გვყავს ერთი დებიუტანტიც – ლუკა ლაცაბიძე, 20 წლის მცველი, რომელიც ამჟამად ოდესის ჩერნომორეცის ღირსებას იცავს და მის შესაძლებლობებს უკვე კარგად ვიცნობთ ასაკობრივი ნაკრებებიდანაც.
მართალია, სარაევოს ლიდერი, გიორგი გულიაშვილი აქამდეც ყოფილა გაფართოებულ შემადგენლობაში, თუმცა ბოსნია და ჰერცოგოვინას ჩემპიონატის ერთპიროვნულ ბომბარდირს (14 გოლი, 4 საგოლე გადაცემა) ეროვნული ნაკრების მაისურით ჯერ არ უთამაშია.
ვილი სანიოლის რჩეული ფეხბურთელები სანაკრებო თუ საკლუბო დონეზე საკმაოდ გამოცდილები არიან – უცვლელია როგორც დაცვის, ისე ნახევარდაცვისა და თავდასხმის ძირითადი ბირთვი. საერთო ჯამში ქართველ ფეხბურთელებს კარგი საკლუბო სეზონი აქვთ. აქვე უნდა ვთქვათ ისიც, რომ ყვითელი ბარათების დისკვალიფიკაციის გამო პირველ შეხვედრაში ვერ დაგვეხმარებიან გუნდის კაპიტანი, გურამ კაშია და გუნდის უდავო ლიდერი, ხვიჩა კვარაცხელია, თუმცა მათ გარდა ვილის ჰყავს რამდენიმე ბრწყინვალე ფეხბურთელი, რომლებიც კარგად შეცვლიან მათ და დააბალანსებენ ამ მძიმე დანაკლისს.
ბოლოს ჩვენს მეზობლებს 2020 წლის ნოემბერში ვეთამაშეთ ერთა ლიგის C ჯგუფის შეხვედრაში, სადაც მინიმალური სხვაობით (1-2) დავმარცხდით. შესაბამისად, ორმაგი მნიშვნელობა ენიჭება მარტის თამაშებს. ჯერ გასვლითი შეხვედრით ვიწყებთ – 20 მარტს ჩვენი გუნდი ვაზგენ სარგსიანის სახელობის რესპუბლიკურ სტადიონზე გამართავს მატჩს, 3 დღის შემდეგ კი დედაქალაქში, დინამო არენაზე იქნება საშინაო შეხვედრას, თანაც გურამ კაშია და ხვიჩა კვარაცხელიაც დაუბრუნდებიან გუნდს.
ისღა დაგვრჩენია, დაველოდოთ ორმატჩიანი თამაშების სტარტს, ვიმედოვნოთ, რომ ფეხბურთელები კარგ სამატჩო კონდიციაში იქნებიან და ვუგულშემატკივროთ ჩვენს საყვარელ ნაკრებს. საქართველოს ნაკრები აუცილებლად დარჩება ერთა ლიგის B დივიზიონში, ანუ იქ, სადაც მათი ადგილია! საუკეთესო წინ არის!
საქართველოს ბანკი საქართველოს ეროვნული საფეხბურთო ნაკრების მთავარი სპონსორია და არა მარტო – ყოველთვის და ყველგან მხარს უჭერს ადამიანებს, რომლებიც არ ჩერდებიან და საკუთარი წარმატებით უკეთეს საქართველოს ქმნიან.