რამაზ სვანაძის გაწვრთნილი საქართველოს U21 საფეხბურთო ნაკრები საკვალიფიკაციო ჯგუფის უკანასკნელ ორ შეხვედრამდე ინარჩუნებს შანსს, იასპარეზოს ევროპის ახალგაზრდული ჩემპიონატის ფინალურ ეტაპზე. ჩვენი ნაკრები 5 მოგებით, 1 ფრით, ორი წაგებითა და შესაბამისი 16 ქულით C ჯგუფის მეორე ადგილზე იმყოფება, პირველი ადგილზე ნიდერლანდების U21 ნაკრები გადის, ხოლო დარჩენილი ორი შეხვედრა კი ჩვენსა და შვედებს შორის ჯგუფის მეორეადგილოსანს გამოარკვევს:
შვედეთი U21 VS საქართველო U21 – 10 ოქტომბერი, 20:00 საათი.
საქართველო U21 VS ჩრდ. მაკედონია U21 – 15 ოქტომბერი, 20:00 საათი.
ახალგაზრდული ნაკრების ერთ-ერთი ერთ-ერთი ლიდერი და კაპიტანია თბილისის დინამოს ცენტრალური მცველი – საბა ხვადაგიანი. საბა 2023 წელს საქართველოში ჩატარებული ევროპის ახალგაზრდული ჩემპიონატის მონაწილეა, და ახლა აქვს შანსი, ზედიზედ მეორედ ითამაშოს ფინალურ ეტაპზე.
საბა გვიზიარებს თავის საფეხბურთო გამოცდილებას, ემოციებს ახალგაზრდული და ეროვნული ნაკრებების წარმატებებზე და, რაც მთავარია, ფინალის ტოლფასი მატჩის წინ მოლოდინებსა და განწყობას:
ქართული ფეხბურთი ახლა
ახალგაზრდულის თუ ეროვნული ნაკრებების წარმატებების მთავარი მიზეზი მენტალიტეტია, მნიშვნელოვანია პროფესიონალიზმიც, რომელიც დღეს უკვე სხვა დონეზეა ჩვენში. წარმატებულ ნაკრებში ყოფნა ეს ძალიან დიდი მუხტს იწვევს ჩვენში და დღითიდღე ვვითარდებით, რადგანაც ჩვენ ვიცით, თუ რამხელა პასუხისმგებლობა გვაქვს აღებული და ასეც გავაგრძელებთ, რომ გავახაროთ ჩვენი გულშემატკივრები და მთლიანად საქართველო.
საფეხბურთო კარიერა
ფეხბურთის თამაში დავიწყე 10 წლის ასაკში. ჩემი ბავშობის საყვარელი ფეხბურთელი ჩემივე პოზიციის მქონე, სერხიო რამოსი იყო. ძალიან რთული გზა გამოვიარე – ყოველდღიურმა შრომამ და რწმენამ მომიყვანა აქამდე. დღეს თბილისის დინამოს შეუცვლელი წევრი და საქართველოს U21 ნაკრების კაპიტანი ვარ.
შვედეთთან მატჩის წინ
ჩვენმა ნაკრებმა რთული გზა გაიარა – ბევრი ვიშრომეთ, რომ აქამდე მოვსულიყავით. ძალიან რთულ და უხერხულ მეტოქეებთან მოგვიწია თამაში. ყველაზე რთული მეტოქე, რა თქმა უნდა, ნიდერლანდების ნაკრები იყო, ორივე შეხვედრაში დავმარცხდით, თუმცა დიდი გამოცდილებაც მივიღეთ.
რაც შეეხება შვედეთის ნაკრებს, პირველი თამაში ძალიან კარგი იყო, ბევრი მომენტი გვქონდა, თუმცა ვერ გამოვიყენეთ. თითქმის ყველა ასპექტში ჩვენ ვჯობნიდით მეტოქეს. ჩვენს ნაკრებზე კი იმის თქმა შეგვიძლია, რომ კარგად ვემზადებით, გვინდა, იდეალურ ფორმაში შევხვდეთ დარჩენილ ორ თამაშს. ყველაზე რთული თამაშები გველოდება წინ. ჩვენ ყველაფერს გავაკეთებთ, რომ გავიდეთ ჯგუფიდან. პირადად მე ძალიან მინდა ჯგუფიდან გასვლა და არ მინდა, ამდენი ხნის შრომა წყალში ჩაგვეყაროს, ამიტომაც ყველაფერს გავაკეთებ, რომ გავიდეთ ჯგუფიდან.
2025 წლის ევროპის ჩემპიონატს სლოვაკეთი უმასპინძლებს. საერთო ჯამში ფინალური ეტაპის 15 საგზური თამაშდება – 9 ჯგუფის გამარჯვებული ნაკრებები, 9 ჯგუფის 3 საუკეთესო მეორე ადგილოსანი და 3 საგზურს პლეი-ოფის პრინციპი გამოარკვევს, რომელსაც დარჩენილი 6 მეორეადგილოსანი გადაითამაშებს, შესაბამისად, ევროპის ჩემპიონატზე გასვლის შანსი საკმაოდ დიდია.
ისღა დაგვრჩენია, ვუქომაგოთ ჩვენი გუნდის კაპიტანს, საბა ხვადაგიანს და საქართველოს U21 ნაკრებს დარჩენილ მნიშვნელოვან შეხვედრებში და გვჯეროდეს, რომ ზედიზედ მეორედ ვითამაშებთ ევროპის U21 ჩემპიონატის ფინალურ ეტაპზე! საუკეთესო წინ არის!