რა ხდებოდა საიუბილეო Spotlight-ზე?

როდის ვხვდებით, ღონისძიება შედგა თუ არა? — ალბათ, როცა სტუმრები ახალ წლამდე დარჩენილ შაბათ-კვირას თმობენ და გამომსვლელების მოსასმენად მოდიან, დარბაზი სავსეა და აუდიტორიაც ზედმიწევნით ირეკლავს სპიკერების ემოციებსა და დინამიკას. ასეც მოხდა საიუბილეო, მეათე Spotlight-ზე, რომელმაც წელს 1200-მდე სტუმარი და 40-მდე სპიკერი გააერთიანა.

უკვე მეათე წელია, რაც საქართველოს ბანკის მხარდაჭერით, marketer.ge წლის ყველაზე მოთხოვნად ღონისძიებას, Spotlight-ს მართავს. ღონისძიების მასშტაბები წლიდან წლამდე გეომეტრიული პროგრესიით გაიზარდა და შედეგად, ის იქცა არა მხოლოდ მარკეტინგის სფეროს წარმომადგენლების შეკრებად, არამედ ბიზნესის, ხელოვნების, ტექნოლოგიის თუ განათლების საკითხებით დაინტერესებული ადამიანების ზეიმად.

წელსაც, გასული წლების მსგავსად, ბილეთები ელვის სისწრაფით გაიყიდა და საიუბილეო ღონისძიებისადმი დიდი მოლოდინებიც შეიქმნა. მოლოდინები კი, ვიტყოდი, რომ გადაჭარბებითაც შესრულდა — “მემკვიდრეობის” თემაზე ისაუბრეს როგორც სარეკლამო ინდუსტრიის, ისე კინოს, ფოტოგრაფიის, სპორტის, მეწარმეობის, ხელოვნების, გართობის და სხვა პერსპექტივებიდან.

შესრულდა Spotlight-ის მისიაც, რომელიც, როგორც მისი ორგანიზატორი, აკო ახალაია გვამცნობს, ბოლო ათი წელია უცვლელია.

“ჩვენი მისიაა, საინტერესო ისტორიებით შთავაგონოთ რაც შეიძლება მეტი ადამიანი და არ აქვს მნიშვნელობა, ამ შთაგონებას შემდეგ სად, რომელ სფეროში გამოიყენებენ”,— ამბობს ის.

და მაინც, რა მოხდა წლევანდელ Spotlight-ზე?

პირველი დღე

Spotlight მწერალმა ბექა ადამაშვილმა გახსნა და მისთვის ჩვეული სიტყვების თამაშით გვამცნო, რას ნიშნავს სიმარტივე სარეკლამო ინდუსტრიაში, “რისი თქმა სურდა ავტორს”.

კინოს დახმარებით დატოვებულ მემკვიდრეობაზე სალომე კუპრაშვილმა, კავეა+-ის ხელმძღვანელმა ისაუბრა და გვაჩვენა, თუ როგორ მისდევდა ფეხდაფეხ ქართული კინო მსოფლიო ტენდენციებს მეოცე საუკუნის დასაწყისიდანვე.

ღონისძიება პანელური დისკუსიების კუთხითაც საინტერესო იყო. სალომე გველესიანმა, გიორგი ტაბატაძემ და ვასკა ჩუბინიძემ ვისოლის ბრენდის განახლებაზე ისაუბრეს; კარლო კაჭარავას შთამბეჭდავი მემკვიდრეობა მიმოიხილეს ლიკა კაჭარავამ, ირინა პოპიაშვილმა და თათია ღვინერიამ; საკუთარი გამოცდილება გაგვიზიარა არტისტმა, მაქსიმე მაჩაიძემ, ბაბუასთან, ნოდარ სუმბაძესთან ერთად.

დიალოგი შედგა არჩილ გაჩეჩილაძესთან, საქართველოს ბანკის გენერალურ დირექტორთან. მან, აკო ახალაიასთან ერთად, აუდიტორიას საქართველოს ბანკის მხარდაჭერით გამოცემული წიგნის, “ბიზნესისტორიები საქართველოდან” შექმნის ამბავს მოჰყვა, ისაუბრა განათლების მნიშვნელობაზე და იმ პროექტებზე, რომლებსაც, ბანკთან ერთად თუ ინდივიდუალურად, ახალგაზრდების ხელშეწყობის მიზნით ახორციელებს.

მოგვიანებით აკო ახალაიასთან ერთად სცენა დაიკავა დათა ლაფაურმა, დედაენის ბარის დამფუძნებელმა, რომელმაც მოგვითხრო (პირდაპირი და გადატანითი მნიშვნელობით) საკუთარ მრავალწლიანი მოგზაურობაზე, დედაენის ბარის იდეის გაჩენაზე და გამოწვევებზე, რომლის გამო ამ ადგილმა გასულ წელს ბევრ ადამიანს დაამახსოვრა თავი.

გაცოცხლებული სვანური ტრადიცია გაგვაცნო რედ ბულის მარკეტინგის დირექტორმა, თამარა ბასილაიამ და გვაჩვენა, როგორ იქცა სვანური თამაში რედ ბულის ექსტრემალური და ენერგიული ღონისძიების შთაგონების წყაროდ.

არც პარალელურ რეჟიმში ჩატარებული მასტერკლასები უნდა გამოგვრჩეს. პირველ დღეს Galt&Tagart-ის ასოცირებულმა ბროკერმა, ნიკოლოზ მაზანაშვილმა ინვესტირების მარტივად დაწყების ხერხები გაგვიზიარა, ჩატარდა პირველადი სამედიცინო დახმარების ტრენინგი და თავისუფალი კონსულტაციები სხვადასხვა სპიკერთან. ნიკა გუჯეჯიანის სახელობის სტიპენდიის გამარჯვებულმა, ლიკა კეშელავამ კი აუდიტორიას არტ დირექტორივით ფიქრი ასწავლა.

რთულია, გამოარჩიო პირველი დღის რომელიმე სპიკერი (თანაც, ყველა მათგანის გამოსვლის მიმოხილვას კიდევ ბევრი გვერდი დასჭირდება), თუმცა უნდა ითქვას, რომ დღე შთამბეჭდავად დაასრულა დღე ქოფირაითერმა, გიორგი (ქუცა) რუხაძემ და გვიამბო, როგორ შეიძლება ვიპოვოთ შთაგონება რეკლამებისთვის ჩვენ გარშემო მყოფი, ერთი შეხედვით “ჩვეულებრივი” ადამიანების არაჩვეულებრივი გამონათქვამებიდან.

მეორე დღე

Spotlight-ის მეორე დღეს, თამამად შეიძლება ითქვას, რომ “ვარსკვლავთცვენა” იყო. დღე დიზაინ ინსტიტუტის დამფუძნებელმა, ნინო ეგაძემ გახსნა. შეხვედრა ბორჯომის გლობალური ბრენდის დირექტორის, ვახო ანთაძის გამოსვლით გაგრძელდა. სპორტსმენმა,  გოჯუ-რიუს სენსეიმ, ლევან როგავამ იმ მემკვიდრეობაზე ისაუბრა, რომელიც მას საბრძოლო ხელოვნებაში დახვდა და რომელსაც თვითონ შემდგომ დატოვებს. ქართული მუსიკალური მემკვიდრეობა გაიხსენეს ჯერონიმომ, ფრედომ და ნათია სართანიამ, ხოლო ლადო და ბაჩა მალაზონიებმა ქართული ფულის დიზაინზე მოგვითხრეს.

ამაღელვებელი იყო გურამ წიბახაშვილის, ცნობილი ფოტოგრაფის პანელური შეხვედრა, რომელსაც ანი ცაბაძე უძღვებოდა. ფოტოხელოვანმა ისაუბრა, როგორ ყალიბდებოდა საქართველოში ფოტოგრაფია, როგორც პროფესია, როგორ გადაიღო დმანისში აღმოჩენილი პირველი ევროპელები და სამოქალაქო ომის შემდეგ მშვიდობის პირველი დღე.

მთელი აუდიტორიის სახალისო პერფორმანსში ჩართვა მოახერხეს კაცებმა, რომელთა გამოსვლები გასული წლების Spotlight-ის ყველაზე დასამახსოვრებელ შეხვედრებად იქცა და არც წლევანდელი იყო გამონაკლისი. ჩვეული იუმორით მათ შეძლეს, რომ სტუმრები არ დარჩენილიყვნენ უბრალო მსმენელებად და სახალისო მუხტი ერთობლივად შეექმნათ.  მოგვიანებით კი კაცებმა ვორქშოპზე შოუს ტრანსფორმაციის გეგმები და იდეებიც გაანდეს შედარებით ვიწრო აუდიტორიას.

განსაკუთრებული ენერგია შემოიტანა ღონისძიებაში ბექა გოლეთიანმა, რომელიც რედ ბულის სპორტის რეგიონალური მენეჯერია ახლო აღმოსავლეთში. მან აუდიტორიას მოუყვა, როგორ იგეგმებოდა ყველაზე ექსტრემალური პერფორმანსები დუბაიში და რა ძალა აქვს პოზიტიურ ცნობიერებასა და ენერგიას.

საფინალო შეხვედრა დავით გოგიჩაიშვილთან შედგა. ამჯერად მის გამოსვლას “ყველაზე სუსტი” თავადვე უწოდა და აგვიხსნა, რომ ამ სათაურის შთაგონება გასული წლის Spotlight-ის ვიდეოზე ერთ-ერთი მომხმარებლის მიერ დატოვებული კომენტარისგან მიიღო და ეცადა დაემტკიცებინა, რომ ის კი არა, ეს გამოსვლა იქნებოდა ყველაზე სუსტი. თუმცა, ალბათ ამას ცოტა თუ დაეთანხმებოდა დარბაზიდან. ღონისძიება გოგიჩაიშვილისთვის მთელი დარბაზის მიერ ნამღერი Happy Birthday-ით დაიხურა და შეხვედრებმა After Party-ზე, შედარებით არაფორმალურ გარემოში გადაინაცვლა.

Spotlight-მა წელსაც დაამტკიცა, რომ ის გამოცდილების, ცოდნისა და დაკვირვებების გაზიარების გამორჩეული პლატფორმაა, სივრცე ახალი ადამიანების გასაცნობად, საკუთარი მიღწევებისა თუ გეგმების შესაჯამებლად და დატოვებული მემკვიდრეობის დასაფასებლად.

მომავალ შეხვედრამდე!

არ გაჩერდე, გააგრძელე კითხვა