გიორგი კვერნაძე – განწყობა ჩრდ. მაკედოანისთან თამაშის წინ

საქართველოს U21 საფეხბურთო ნაკრები საკვალიფიკაციო ჯგუფის უკანასკნელ შეხვედრამდე ინარჩუნებს შანსს, იასპარეზოს ევროპის ახალგაზრდული ჩემპიონატის ფინალურ ეტაპზე. რამაზ სვანაძის გაწვრთნილი ნაკრები 5 მოგებით, 1 ფრით, 2 წაგებითა და შესაბამისი 16 ქულით C ჯგუფის მესამე ადგილზე იმყოფება, პირველი ადგილი განაღდებული აქვს ნიდერლანდების U21 ნაკრებს, ბოლო შეხვედრა კი ჩვენსა და შვედებს შორის ჯგუფის მეორეადგილოსანს გამოარკვევს:

საქართველო U21 VS ჩრდ. მაკედონია U21 – 15 ოქტომბერი, 20 საათი.

ჩვენი თავდასხმის ერთ-ერთი ლიდერია იტალიის ფროზინონეს გარემარბი – გიორგი კვერნაძე, რომელმაც 2 გოლის გატანაც მოახერხა – ჯერ გიბრალტარის U21 ნაკრებს გაუტანა თერთმეტმეტრიანი (2-0), მერე კი მოლდოვასთან მოახერხა მეტოქის დაცვის გარღვევა (3-0).

გიორგი გვიზიარებს თავის საფეხბურთო გამოცდილებას, ემოციებს ახალგაზრდული და ეროვნული ნაკრებების წარმატებებზე და, რაც მთავარია, მაკედონიასთან მატჩის წინ მოლოდინებსა და განწყობას:

ქართული ფეხბურთი დღეს

წარმატებულმა ფეხბურთელებმა თავისთავად შეცვალეს ქართული ფეხბურთი და გახადეს სანახაობრივი და შედეგიანი. ისინი არიან ჩვენთვის მაგალითი და თავდაჯერების მომცემნი, რომლითაც ახალგაზრდული ნაკრები იბრძვის ყოველ თამაშზე, რომ გააუმჯობესოს შედეგი და მსოფლიოს დაუმტკიცოს ქართული ფეხბურთის წარმატებული მომავალი.

წარმატებული ნაკრების ნაწილად ყოფნა რამდენადაც სასიამოვნოა, ორმაგად საპასუხისმგებლოა, რადგან შენი ქვეყნის ახალგაზრდული ნაკრების ფორმით თამაში სხვა მასშტაბია, უდიდესი მოტივაციაა, რომელიც კიდევ უფრო დიდ ძალას გაძლევს, რომ დადო შედეგი.

⁠საფეხბურთო კარიერა

ფეხბურთის თამაში ხუთი წლიდან დავიწყე. ფეხბურთისადმი უზომო სიყვარულის გამო, მშობლებმა მალევე გადაწყვიტეს საფეხბურთო სკოლაში შევეყვანე. მიუხედავად ბევრი დაბრკოლებისა, არასდროს წარმომედგინა ცხოვრება ფეხბურთის თამაშის გარეშე. ბავშვობის საყვარელი ფეხბურთელი რონალდოა, ყოველთვის თვალს ვადევნებდი და მომწონდა მისი ფეხბურთისადმი ასეთი თავდადება – თავდაუზოგავი შრომით მიღწეული თითოეული წარმატება. ამას ახლდა მისი საოცარი სათამაშო სტილი და ტექნიკა, რომელიც ჩემთვის სამაგალითო იყო.

U21-მდე მოხვედრას რთული გზა ახლდა წინ, სხვადასხვა ასაკობრივი ნაკრების გავლა, რამაც უდიდესი წვლილი შეიტანა ჩემს განვითარებაში. ჩემი საქმისადმი სიყვარულისა და შრომისმოყვარეობის დანახვამ განაპირობა ალბათ ის, რომ მომეცა საშუალება, ჩემი ქვეყნის ახალგაზრდული ნაკრების მაისურით მეთამაშა, რაც ერთდროულად ასე საპასუხისმგებლო და საამაყოა.

ევროპის ჩემპიონატის შესარჩევი

იმ შედეგების მერე, რაც ჩვენმა წინამორბედმა ახალგაზრდულმა ნაკრებმა დაგვიტოვა რამაზ სვანაძის ხელმძღვანელობით, ჩვენთვის ორმაგ პასუხისმგებლობას და სირთულეს წარმოადგენს, რომ გავაუმჯობესოთ ხარისხი, რადგან მათ მაღალ დონეზე გვაჩვენეს მათი შესაძლებლობები ევროპის ჩემპიონატზე. მიუხედავად ამისა,  ჩვენ მუდმივად ვმუშაობთ განვითარებაზე, როგორც ახლა, ამ შესარჩევზე. ბევრი სირთულე შეგვხვდა, მაგრამ ვთვლი, რომ კარგად გადავლახეთ ბევრი ბარიერი და მოვედით აქამდე. თითოეული ჩვენგანი ყოველდღიური შრომით ვცდილობთ, გავხდეთ საკუთარი თავის საუკეთესო ვერსია და ეს მოედანზე დავამტკიცოთ.

ალბათ ყველაზე რთული მატჩი ნიდერლანდებთან იყო, რადგან ძლიერი და სტაბილური გუნდია, თუმცაღა ვთვლი, რომ აქაც კარგად წარმოვადგინეთ საკუთარი შესაძლებლობები. ახალგაზრდული ნაკრების მაისურით ყოველი გამოსვლა მოედანზე დასამახსოვრებელი მომენტია ჩემთვის, თუმცა გამოვყოფდი ჩრდ. მაკედონიასთან მატჩს, რადგან რთული თამაში გამოვიარეთ, იყო ბევრი კარგი თუ ცუდი მომენტი, მაგრამ საბოლოოდ ამ ყველაფერმა დაგვანახა, რამდენად მნიშვნელოვანია გუნდის ერთიანობა და რამდენად დიდი შესაძლებლობები გვაქვს.

…

2025 წლის ევროპის ჩემპიონატს სლოვაკეთი უმასპინძლებს. საერთო ჯამში ფინალური ეტაპის 15 საგზური თამაშდება – 9 ჯგუფის გამარჯვებული ნაკრებები, 9 ჯგუფის 3 საუკეთესო მეორე ადგილოსანი და 3 საგზურს პლეი-ოფის პრინციპი გამოარკვევს, რომელსაც დარჩენილი 6 მეორეადგილოსანი გადაითამაშებს, შესაბამისად, ჩვენი შანსი ძალიან რეალურია.

ისღა დაგვრჩენია, ვუქომაგოთ გიორგი კვერნაძეს და საქართველოს U21 ნაკრებს დარჩენილ მნიშვნელოვან შეხვედრაში და გვჯეროდეს, რომ ზედიზედ მეორედ ვითამაშებთ ევროპის U21 ჩემპიონატის ფინალურ ეტაპზე! საუკეთესო წინ არის!