“ფოტოგრაფია არის ვიზუალური მეხსიერება” — ინტერვიუ გურამ წიბახაშვილთან

2013 წელს პირველი Spotlight ჩატარდა. ღონისძიება მაშინ მხოლოდ მაკეტერებისთვის იყო, თუმცა წლების განმავლობაში ის ბიზნესის, ტექნოლოგიებისა და ინოვაციების დარგის პროფესიონალების ყოველწლიურ ზეიმად იქცა. წელს Spotlight მეათედ უთმობს სცენას კრეატიული ინდუსტრიის წამყვან მოთამაშეებს, გამოცდილ მარკეტერებს თუ ახალბედა სპეციალისტებს და მათ სამოტივაციო, შთამაგონებელ და საინტერესო ამბების გაზიარების შესაძლებლობას აძლევს.

Spotlight-ს Marketer.ge საქართველოს ბანკის მხარდაჭერით ატარებს. ყოველ წელს ღონისძიებას სხვადასხვა თემა აქვს. წელს ეს “მემკვიდრეობაა”, რომელზე სასაუბროდ, მარკეტინგის სპეციალისტებთან ერთად, ხელოვანებიც არიან მოწვეული. მათ შორისაა გურამ წიბახაშვილი, ფოტოხელოვანი, რომლის ნამუშევრები ისტორიული კონტექტსის აღქმის კუთხითა თუ მხატვრული ხერხების ორიგინალურობის თვალსაზრისით, აქტუალობას არასდროს კარგავს.

გურამ წიბახაშვილი ფოტოგრაფიით ჯერ კიდევ ბავშვობაში დაინტერესდა. “უბრალო ფოტოაპარატი მაჩუქეს მეოთხე კლასში და დავიწყე გადაღება, რომ როგორმე სურათი მიმეღო. პროფესიონალურად კი უკვე უნივერსიტეტის სტუდენტი ვიყავი, როცა გადავწყვიტე, ფოტოგრაფია შემესწავლა”, — იხსენებს ის.

ამ სტატიაში გურამ წიბახაშვილი რამდენიმე შეკითხვას პასუხობს Spotlight-ზე, ფოტოგრაფიაზე და არა მარტო.

მემკვიდრეობა არის მთავარი თემა, რომელზეც წლევანდელ Spotlight-ზე სპიკერები ისაუბრებენ. როგორ შეაფასებდით ფოტოგრაფიის როლს მემკვიდრეობის შემონახვის პროცესში, კულტურულ და ისტორიულ კონტექსტში.

ჩემი მოგონილი არ არის, რომ ფოტოგრაფია არის ვიზუალური მეხსიერება. მგონია, რომ ნებისმიერი ფოტო, იქნება ეს ფოტოგრაფის თუ სხვა ვინმეს გადაღებული, ტელეფონით თუ დიდი კამერით, ამ მეხსიერების ფუნქციას ატარებს. უბრალოდ, საჭიროა ადამიანი, რომელიც ამ მეხსიერებას რამეში გამოიყენებს, გაშიფრავს და თავის ადგილს მიუჩენს.

როგორი გავლენა მოახდინა საქართველოს უახლეს ისტორიაში მომხდარმა სოციალურ-პოლიტიკურმა მოვლენებმა თქვენს მიდგომებზე და ხედვებზე ფოტოგრაფიაში?

რა თქმა უნდა, [დიდი გავლენა მოახდინა]. ფოტოგრაფი არის ადამიანი, რომელიც ცხოვრობს კონკრეტულ სოციუმში, კონკრეტულ დროს. ეს მოვლენები კი დიდ გავლენას ახდენს მისი დამოკიდებულების ჩამოყალიბების, ანალიზის პროცესზე. ფოტოგრაფია არის კარგი საშუალება, რომ გააანალიზო, რა ხდება შენ გარშემო.

შეგიძლიათ გაიხსენოთ თქვენი პროექტები, რომლებიც განსაკუთრებით ეხმიანება “მემკვიდრეობის” შემონახვის იდეას? მათ შორის საინტერესოა ვიზუალური ბანკის შექმნის ისტორია.

როცა რაღაც რაოდენობის მასალა დაგიგროვდა, რამდენიმე ფოტოგრაფი შევიკრიბეთ და გადავწყვიტეთ, რომ ეს ბანკად გვექცია და ასეც მოვიქეცით. შესაძლოა, მაშინ ბანკმა კარგად ვერ იმუშავა, მაგრამ მოგვცა საშუალება, რომ ჩვენს თავში დაგველაგებინა, ის თუ რამდენად დიდი მნიშვნელობა ჰქონდა, რაც გავაკეთეთ. ეს არ ნიშნავს იმას, რომ ნარცისიზმით ხარ შეპყრობილი, არამედ ხვდები, რომ ის, რაც შექმენი, მარტო შენ არ გეკუთვნის და მარტო შენ არ ანიჭებ მნიშვნელობას. და რომ ის შეიძლება გახდეს ქვეყნისთვის მნიშვნელოვანი, რადგან ასახავს მოვლენებს, რომლებიც შენ გარშემო ხდებოდა.

რას ურჩევდით ფოტოგრაფებს, განსაკუთრებით მათ, ვინც დოკუმენტური ფოტოგრაფიის მიმართულებით ახლა იწყებს მუშაობას, რა უნდა გაითვალისწინონ მათ, რომ მომავლისთვის საინტერესო “მემკვიდრეობა” დატოვონ თავიანთი ნამუშევრების სახით?

ვურჩევდი, რომ არ იზარმაცონ. დააფიქსირონ ყველაფერი, რაც მათ გარშემო ხდება, დაფიქსირებამდე გააანალიზონ, რა ხდება მათ გარშემო, იყვნენ გულწრფელები და იცოდნენ, სად შეინახონ ეს. ფოტოგრაფისთვის ძალიან მნიშვნელოვანია, იცოდეს, ის, რაც გადაიღო, სად დევს, რადგან როცა დასჭირდება, ადვილად იპოვოს და გამოიყენოს.

ესწრებოდით გასულ წლებში Spotlight-ს? როგორია მოლოდინები ამჯერად, რამდენად საინტერესოა თქვენთვის საიუბილეო ღონისძიებაზე სპიკერის როლში ყოფნა?

მოგეხსენებათ, რომ 21-ე საუკუნეში დაჩქარდა ცხოვრების ტემპი, დროის დიდი დეფიციტია, ამიტომ, სამწუხაროდ მოუცლელობის გამო ვერ ვესწრებოდი. თუმცა,  ნებისმიერ დროს მზად ვარ, ჩემი გააზრება თუ გამოცდილება სხვებს გავუზიარო. ვფიქრობ, რომ ურთიერთობა ადამიანებს შორის, იმის გაზიარება, თუ რას განიცდიდი და პირიქით, მისი განცდილის მიღება, ყოველთვის გავსებს და გამდიდრებს. ამ დროს შენ იმას განიცდი, რაც შეიძლება, დროში ვერ მოგესწრო.

დაბოლოს, შეგიძლიათ გაგვიზიაროთ, რას საკითხებზე ისაუბრებთ Spotlight-ის აუდიტორიის წინაშე?

ვილაპარაკებ ფოტოგრაფიის მნიშვნელობაზე, თუ როგორ შეიძლება ფოტოგრაფია ასწავლო სხვას, ასევე — ფოტოგრაფებზე, რომლებმაც დიდი ნაბიჯები გადადგეს.

შეხვედრას ნებისმიერი ადამიანი შეიძლება დაესწროს და მიხვდეს, რამდენად დიდი მნიშვნელობა აქვს ფოტოგრაფიას ადამიანისთვის.

2023 წლის Spotight 23-24 დეკემბერს რადისონ ბლუ ივერიაში გაიმართება. ათი წლის განმავლობაში Spotlight-მა 300-ზე მეტ სპიკერს და ათასობით სტუმარს უმასპინძლა. ღონისძიება პოპულარულია სოციალურ მედიაშიც — ვიდეოებს, საერთო ჯამში, 10 მილიონზე მეტჯერ უყურეს.

ასე რომ, მოემზადეთ კიდევ ერთი დაუვიწყარი გამოცდილებისთვის და გაიგეთ, როგორ ესმით “მემკვიდრეობა” მარკეტერებს, ბიზნესმენებს, ხელოვანებს და სხვებს.

არ გაჩერდე, გააგრძელე კითხვა