“ესაა სივრცე გამოცდილების უანგაროდ გაზიარებისთვის” – ინტერვიუ ალექს ჩიქოვანთან

ალექს ჩიქოვანი სარეკლამო სააგენტო JWT Metro-ს ექაუნთ დირექტორია. უკვე რვა წელია, რაც სარეკლამო ინდუსტრიაში მუშაობს და მისი საქმიანობა სხვადასხვა კომპანიასა და კრეატიულ გუნდს შორის ურთიერთობების გაძლიერებას გულისხმობს. ალექსი წელს Spotlight-ის სპიკერია და საკუთარ დაკვირვებებს მარკეტინგის სფეროთი დაინტერესებულ ადამიანებს გაუზიარებს.

Spotlight 2013 წლიდან მარკეტინგის, ბიზნესის, ტექნოლოგიების და სხვა მომიჯნავე სფეროების სპეციალისტებისთვის წლის მთავარ ღონისძიებად იქცა. უკვე 10-წლიანი ისტორიით კი ამჯერად სპიკერებსა და აუდიტორიას “მემკვიდრეობის” თემის ირგვლივ აერთიანებს. Spotlight-ს, საქართველოს ბანკის მხარდაჭერით, Marketer.ge ატარებს და კვლავაც ყველაზე შთამაგონებელ და საინტერესო საღამოებს გვპირდება.

ამ სტატიაში კი ახლოს გაგაცნობთ ალექს ჩიქოვანს, რომელიც Spotlight-ის მნიშვნელობაზე გვესაუბრა.

რას ნიშნავს “მემკვიდრეობა” თქვენთვის, კრეატიულ ინდუსტრიაში მომუშავე სპეციალისტისთვის? და თუ შეგიძლიათ, გაგვიმხილოთ, როგორ ეხმაურება თქვენი გამოსვლა მთავარ თემას – “მემკვიდრეობას”?


რვა წლის წინ საქართველოში სარეკლამო ინდუსტრია შედარებით ახალგაზრდა იყო და არც ახლაა ძალიან ძველი. თუმცა, მაშინ მუშაობდნენ ადამიანები, რომლებმაც სფერო ისე გააძლიერეს, რომ ჩავთვალე, რომ ეს იყო ადგილი, სადაც ვიქნებოდი ბედნიერი და ბევრი რამის სწავლას შევძლებდი. მათ ეს მემკვიდრეობა დატოვეს, ზოგიერთი მათგანი ახლაც აგრძელებს მუშაობას და ვფიქრობ, რომ გვაქვს პასუხისმგებლობა, რომ წინ წავწიოთ ეს მემკვიდრეობა. ჩემი გამოსვლა კი პირდაპირ არ ეხმიანება ამ თემას, თუმცა ვისაუბრებ იმაზე, რაც შესაძლოა საინტერესო იყოს სხვებისთვისაც.

როგორ შეაფასებდით Spotlight-ს და რამდენად მნიშვნელოვანია თქვენთვის საიუბილეო ღონისძიებაზე სპიკერად ყოფნა?


საბოლოო ჯამში, კომუნიკაციას დიდი მნიშვნელობა აქვს ყველასთვის, განსაკუთრებით სამყაროში, სადაც ინფორმაცია ასე სწრაფად ახლდება. Spotlight ამ კუთხით მნიშვნელოვანი ღონისძიება მგონია. ადამიანებს, რომლებსაც ეს ინდუსტრია გვიყვარს, საშუალებას გვაძლევს, შევხდეთ, გავცვალოთ ინფორმაცია, ახალი რამ გავიგოთ, ვისწავლოთ, რაღაცაზე დავფიქრდეთ და კიდევ ერთხელ — გავაძლიეროთ ეს მემკვიდრეობა.

ათი წელი გავიდა მას შემდეგ, რაც პირველი Spotlight ჩატარდა. შეგიძლიათ, გაგვიზიაროთ თქვენი დაკვირვება, როგორ შეიცვალა ამ პერიოდში კრეატიული ინდუსტრია და მარკეტინგი საქართველოში? რა არის განვითარების მთავარი ნიშანი ამ სფეროში?


როგორც ბევრი სხვა დარგი, ვფიქრობ ჩვენც წინ წავედით. ბევრი ახალი შესაძლებლობა შემოვიდა ინდუსტრიაში. ვფიქრობ, კარგად ავუბით ფეხი ამ ყველაფერს. ჩემს წარმოდგენაში, 2000-იანებში და მანამდე, დიდი დაშორება იყო საქართველოსა და დანარჩენ სამყაროს შორის, დღეს კი მინიმუმამდე დავიყვანეთ ეს სხვაობა და ყოველ ჯერზე ვცდილობთ, რომ ახალ შესაძლებლობებს, ახალ ტექნოლოგიებს, ინოვაციებს დავეწიოთ და დავნერგოთ. საბოლოო ჯამში, 10 წელიწადში შევძელით, რომ ქართული კრეატიული ინდუსტრია გარკვეულწილად მსოფლიო დონემდე მიგვეყვანა. ბევრი გვაქვს სამუშაო, მაგრამ ვფიქრობ, რომ ვუახლოვდებით ამ მასშტაბებს.

თუ ესწრებოდით გასულ წლებში Spotlight-ს და რა იყო ყველაზე ღირებული რამ, რაც ამ შეხვედრებზე მიიღეთ?


ვესწრები თუ არა ღონისძიებას, მაინც ყოველთვის ვცდილობ, თვალი ვადევნო, ვინ არიან სპიკერები და მოვუსმინო მათ საუბრებს. ვფიქრობ, რომ გამოცდილება ყველაზე მნიშვნელოვანია, რომელსაც ეს ადამიანები უანგაროდ აზიარებენ სხვებთან. მნიშვნელოვანია, რომ სხვის შეცდომებზეც ისწავლო და საკუთარიც გააზიარო. ეს არის სივრცე, სადაც სააგენტოები ასევე, პირიქით, კლიენტების მხარე, თავისუფლად გრძნობს თავს. გამოცდილების და ინფორმაციის გაზიარება კი განვითარებაში გვეხმარება. შეუძლებელია, ვაკუუმში იყო და წინ წახვიდე.

შეგიძლიათ ჩამოთვალოთ 3 მიზეზი, რატომ უნდა დაესწრონ მარკეტერები (და არა მარტო) წლევანდელ Spotlight-ს?

Spotlight განსაკუთრებით ღირებულია ახალგაზრდა თაობისთვის. თუ გინდა ამ სფეროში მუშაობა, ეს კარგი საშუალებაა, რომ დაინახო, ისწავლო, რა როგორ მუშაობს და მიხვდე, რამდენად სწორ ადგილას მოხვდი.

ამ დარგში მომუშავეებისთვის დამატებითი საშუალებაა, რომ თვალსაწიერი გავაფართოოთ, ახალი გამოცდილება მივიღოთ.

და მესამე და მთავარი კი ურთიერთობებია. Spotlight საშუალებას გაძლევს, ბევრი ახალი ადამიანი გაიცნო, გამართო ღირებული საუბრები და გაამდიდრო სანაცნობო წრე.

Spotlight 23-24 დეკემბერს რადისონ ბლუ ივერიაში გაიმართება. ამ დრომდე ღონისძიებამ 300-ზე მეტ სპიკერს და ათასობით სტუმარს უმასპინძლა. სოციალურ ქსელებში კი ვიდეოებს, საერთო ჯამში, 10 მილიონზე მეტჯერ უყურეს.