ძველი შენობის ახალი ისტორია  – სასტუმრო „ტელეგრაფი“ გაიხსნა

თბილისის ცენტრალური ფოსტისა და ტელეგრაფის რეკონსტრუქცია დასრულდა. ისტორიული შენობის  კონცეფციურ, დახვეწილი დიზაინის სასტუმროდ გარდაქმნა საქართველოს ბანკისა და სილქ როუდ ჯგუფის თანამშრომლობით მოხერხდა.

სილქ როუდ ჯგუფმა  პროექტზე მსოფლიოს გამორჩეულ არქიტექტორულ სტუდია Neri&Hu-სთან  ერთად იმუშავა და უფუნქციოდ დარჩენილ შენობას ახალი შინაარსი შესძინა, სადაც ძველი შენობის ავთენტურობა არის შენარჩუნებული. სასტუმრო „ტელეგრაფი“  რესპუბლიკის მოედნის განვითარების კონცეფციის ერთ-ერთი მნიშვნელოვანი ნაწილია. ამის შესახებ სილქ როუდ ჯგუფის დამფუძნებელი, გიორგი რამიშვილი, გვიყვება:

„რესპუბლიკის მოედნის განახლების იდეა 2006 წელს გაჩნდა. მოედნის განვითარება სასტუმრო „ივერიის“ რეკონსტრუქციით დაიწყო. მაშინ იქ არსებული შენობები სავალალო მდგომარეობაში იყო და სრულიად ცვლიდა მოედნის იერსახეს. ეტაპობრივად შევიძინეთ ეს შენობები, ჩავუტარეთ რეკონსტრუქცია და შედეგად მივიღეთ განახლებული რესპუბლიკის მოედანი,რომელიც თბილისის ურბანულ ესთეტიკას ავსებს და  ხიბლს მატებს.

„ტელეგრაფის“ შენობა 1978 წელს აშენდა და ის ლადო ალექსი-მესხიშვილისა და თეიმურაზ მიქაშავიძის საბჭოთა მოდერნისტული არქიტექტურის ერთ-ერთ ბოლო და ღირსშესანიშნავ ნიმუშს წარმოადგენს. ბრუტალისტური ელემენტები, ბოლნისის ტუფით ნაკვეთი სვეტები შენობის განსაკუთრებულ არქიტექტორულ ესთეტიკას ქმნის. თუმცა, შენობამ საქართველოს ისტორიაში ფუნქციურადაც გარდამტეხი როლი შეასრულა, სწორედ აქედან დაიწყო საქართველოსა და სხვადასხვა ქვეყნებისა თუ ქალაქების ვირტუალური კავშირები და ტელეკომუნიკაციის განვითარება. პროექტის კონცეფციაზე მუშაობისას სილქ როუდ ჯგუფის მთავარი ამოცანა ისტორიული მემკვიდრეობის და ვიზუალური და შინაარსობრივი ავთენტურობის შენარჩუნება იყო.

„ბევრი ვიფიქრეთ თუ როგორ შეგვენარჩუნებინა შენობის უნიკალურობა, როგორ გარდაგვექმნა სასტუმროდ, გვქონდა ბევრი მცდელობა. საბოლოოდ, იდეის განხორციელებაში მსოფლიოს ერთ-ერთი საუკეთესო არქიტექტორული სტუდია Neri&Hu დაგვეხმარა, რომელიც ისტორიული შენობების რეკონსტრუქციით, წარსულისა და აწმყოს ბალანსით გამოირჩევა და ამ მიმართულებით მრავალი პრესტიჟული საერთაშორისო ჯილდოს მფლობელია. სასტუმროში შემოსვლისას სტუმარს ექმნება შთაბეჭდილება, რომ ქალაქის ქუჩაში დადის. გზად ხვდება სხვადასხვა კონცეფციის რესტორნები, საუკეთესო შეფების საავტორო მენიუთი, ბარები და მრავალფუნქციური სივრცეები. მიმაჩნია, რომ ეს იქნება ახალი მიზიდულობის ცენტრი ქალაქში და საუკეთესო შეხვედრების ადგილი უცხოელი და ადგილობრივი სტუმრებისთვის.“, – გიორგი რამიშვილი

სასტუმრო ტელეგრაფმა უკვე საერთაშორისო დონის აღიარებაც მოიპოვა. ის პირველი სასტუმროა რეგიონში, რომელიც პრესტიჟული საერთაშორისო ორგანიზაციის –  The Leading Hotels of the World კოლექციას შეუერთდა.

„მსოფლიოში ერთ-ერთი ყველაზე პრესტიჟული სასტუმროების ორგანიზაციის წევრობა, ვფიქრობთ, ქვეყნის ტურიზმისა და სტუმარმასპინძლობის სექტორის განვითარებაში წინ გადადგმული ნაბიჯია. The Leading Hotels of the World მხოლოდ მსოფლიოს საუკეთესო სასტუმროებს აერთიანებს. აქ მოსახვედრად უმაღლეს ხარისხთან ერთად, უნდა შექმნა საინტერესო შინაარსი, კულტურული ღირებულება, განსხვავებული იდეა და ინდივიდუალური ხიბლი. აქ სხვადასხვა ქვეყნის კულინარული და ესთეტიკური კონცეფცია და ქართული სტუმართმოყვარეობის საუკეთესო ტრადიციები გაერთიანდა.  გავხსენით ლეგენდარული თამაზ ყურაშვილის სახელობის ჯაზკლუბი. ის იყო ადამიანი, რომელმაც საქართველოში პირველმა შემოიტანა ჯაზის კულტურა. ბოლო სართულზე კი Rolling Stone-ის ბარი დაგხვდებათ. მინდა აღვნიშნო, რომ პირველად საქართველოში, ჩვენმა გუნდმა ჟურნალ „როლინგ სტოუნის“ ლიცენზია შეიძინა და ჟურნალი ხშირად დაწერს ჩვენი სასტუმროსა და ბარის შესახებ რაც, ვფიქრობთ, დიდი საერთაშორისო წარმატებაა“, – გიორგი რამიშვილი

ასე შეიქმნა ამ შენობის ახალი ისტორია. ადგილი, საიდანაც დაიწყო კავშირები, ურთიერთობები, დღეს გახდება შეხვედრების ადგილი, რომელიც განახლებული ფორმითა და შინაარსით დააკავშირებს ადამიანებს  მსოფლიოს სხვადასხვა ქვეყნებიდან.

საქართველოს ბანკისთვის სტუმარმასპინძლობის სექტორის გაძლიერება და ქვეყანაში ტურიზმის განვითარების ხელშეწყობა უცვლელი პრიორიტეტია.  ბანკი წლების განმავლობაში ქვეყნისთვის და ქალაქისთვის არაერთი მნიშვნელოვანი პროექტის მხარდამჭერი იყო და ეს ტენდენცია კვლავ აქტიურად გრძელდება. ძველი ცენტრალური ფოსტის და ტელეგრაფის ისტორიული შენობის აღდგენა-რეკონსტრუქცია და მისი მაღალი კლასის სასტუმროდ გარდაქმნა ბანკისთვის ერთ-ერთი გამორჩეული და საამაყო პროექტია. კომპანია მომავალშიც განაგრძობს პარტნიორ ბიზნესებთან ერთად საინტერესო და ქვეყნისთვის მნიშვნელოვანი პროექტების განხორციელებას.