საქართველო B დივიზიონში რჩება!
ერთა ლიგის სარელეგაციო პლეი ოფის განმეორებით შეხვედრაში საქართველოს ეროვნულმა ნაკრებმა სომხეთი 6-1 დაამარცხა. პირველ შეხვედრაში დამაჯერებელი გამარჯვების (0-3) შემდეგ თბილისურ მატჩშიც არ დავკარგეთ კონცენტრაცია, გავიტანეთ ბევრი გოლი და რაც ყველაზე მთავარია, გაუმჯობესებული ფეხბურთი ვაჩვენეთ – შედეგიანი და სანახაობრივი თამაშით შევინარჩუნეთ ადგილი B დივიზიონში.
საქართველო VS სომხეთი 6-1
1:0 ჰაროიანი (4’ ავტოგოლი), 2:0 მიქაუტაძე (14’ ქოჩორაშვილის ასისტი), 3:0 ჩაკვეტაძე (23’ მიქაუტაძის ასისტი), 4:0 კიტეიშვილი (27’ კვარაცხელიას ასისტი), 5:0 მიქაუტაძე (35’), 5:1 სევიკიანი (48’ ბიჩახჩიანის ასისტი), 6:1 კვარაცხელია (63’ მექვაბიშვილის ასისტი).
ფრანგი სპეციალისტის, ვილი სანიოლის გაწვრთნილმა გუნმდა ამჯერადაც ლამაზი და სისტემური ფეხბურთი უჩვენა დინამო არენაზე შეკრებილ გულშემატკივარს და ორ მატჩში ჯამში 9 გოლი გაიტანა, გაუშვა მხოლოდ ერთი.
ვილიმ პირველ მატჩში გატესტილი სათამაშო ფორმაცია და ტაქტიკა შეინარჩუნა (4-2-3-1), თუმცა იყო რამდენიმე ცვლილება ძირითად შემადგენლობაში:
მამარდაშვილი – კაკაბაძე, კაშია, გოგლიჩიძე, წიტაიშვილი – ქოჩორაშვილი, მექვაბიშვილი, კიტეიშვილი – ჩაკვეტაძე, კვარაცხელია – მიქაუტაძე.
შენგელია (46’), დვალი (69’), გულიაშვილი(70’), ზარია(77’), ზივზივაძე (77’).
პირველი შეხვედრა გუნდის კაპიტანმა, გურამ კაშიამ და გუნდის ლიდერმა, ხვიჩა კვარაცხელიამ ყვითელი ბარათების დისკვალიფიკაციის გამო გამოტოვეს, თბილისურ მატჩში კი ორივე მათგანი ძირითად შემადგენლობას დაუბრუნდა. ძირითადში იყვნენ ასევე გიორგი წიტაიშვილი, რომელმაც ამჯერად მარცხენა მცველად ითამაშა და ანზორ მექვაბიშვილი, რომელმაც ნიკა კვეკვესკირი ჩაანაცვლა ჩვენი გუნდის საყრდენის პოზიციაზე.
თბილისურ შეხვედრაშიც შესანიშნავები ვიყავით პრესინგზე და უამრავ ეპიზოდში იყოჩაღეს ჩვენმა ნახევარმცველებმა – გიორგი ქოჩორაშვილმა და ოთარ კიტეიშვილმა. მინიმუმამდე იყო შეცდომები დაყვანილი ბურთის გათამაშებისას დაცვასა და ნახევარდაცვაში და პირიქით – ბევრი ისეთი მომენტის გახსენება შეგვიძლია, როცა მეტოქეს ვაიძულეთ და შეცდომა დავაშვებინეთ გადამწყვეტ ეპიზოდებში.
მე-4 წუთზე გატანილმა სწრაფმა გოლმა თამაშის სურათი თავიდანვე გამოკვეთა და აშკარა იყო, რომ მოშლილ მეტოქეს სწრაფადვე გავუტანდით კიდევ არაერთ გოლს და ასეც მოხდა: საქართველოს ნაკრებმა ისტორიაში პირველად მოახერხა და ოფიციალური შეხვედრის პირველ ტაიმში ხუთი გოლი გაიტანა. აღსანიშნავია, რომ კვლავ დუბლით გამოიჩინა თავი გიორგი მიქაუტაძემ, რომელსაც 37 სანაკრებო მატჩში უკვე 20 გოლი დაუგროვდა და ყველა დროის ბომბარდირთა სიაში მხოლოდ ლეგენდარულ შოთა არველაძეს ჩამორჩება სულ რაღაც 6 გოლით. თავისი გოლი ხვიჩა კვარაცხელიამაც შეაგდო და 18 სანაკრებო გოლს მოუყარა თავი. გაიტანა გიორგი ჩაკვეტაძემაც (მე-10 გოლი ნაკრების მაისურით) და დაეწია ქართული ფეხბურთის კიდევ ერთ ლეგენდას, ჯაბა კანკავას.
ცალკე უნდა ვახსენოთ კიდევ ერთი სტატისტიკური ნიუანსი, რომელიც მთლიანი შეხვედრისა და, ზოგადად, ჩვენი ნაკრების სათამაშო სტილსა და ფორმას კარგად წარმოაჩენს: შეხვედრის პირველ ნახევარში გიორგი ქოჩორაშვილმა 37 მცდელობიდან 37 ზუსტი გადაცემის გაკეთება მოახერხა; 100-პროცენტიანი შედეგი ჰქონდა გიორგი ჩაკვეტაძესაც (19-დან 19).
აშკარაა, რომ ოთხმცველიან ტაქტიქაზე გადაწყობის შემდეგ კიდევ უფრო თვალსაჩინო გახდა ვილი სანიოლის ჩანაფიქრი, რომ კომბინირებული ფეხბურთით მაიღწიოს შედეგს.
ჩვენთვის წარმატებით დასრულდა გაზაფხულის სანაკრებო პაუზა, ქართველი ფეხბურთელები დაუბრუნდებიან საკუთარ კლუბებს და იქ შეგვიძლია გავაგრძელოთ მათი გულშემატკივრობა. რაც შეეხება ეროვნულ ნაკრებს, წინ მომდევნო სანაკრებო პაუზა და რამდენიმე ამხანაგური მატჩია დაგეგმილი. სექტემბერში დაიწყება მსოფლიო ჩემპიონატის საკვალიფიკაციო ეტაპი, სადაც ჩვენი მეტოქეები თურქეთი, ბულგარეთი და ესპანეთი იქნებიან.
⚽საქართველო – თურქეთი 4 სექტემბერი
⚽საქართველო – ბულგარეთი 7 სექტემბერი
⚽ესპნეთი – საქართველო 11 ოქტომბერი
⚽თურქეთი – საქართველო 14 ოქტომბერი
⚽საქართველო – ესპანეთი 15 ნოემბერი
⚽ბულგარეთი – საქართველო 18 ნოემბერი
საქართველოს ბანკი საქართველოს ეროვნული საფეხბურთო ნაკრების მთავარი სპონსორია და არა მარტო – ყოველთვის და ყველგან მხარს უჭერს ადამიანებს, რომლებიც არ ჩერდებიან და საკუთარი წარმატებით უკეთეს საქართველოს ქმნიან.