3 ოქტომბრიდან 8 ოქტომბრის ჩათვლით, იტალიის ქალაქ ტერნიში ეტლით მოფარიკავეთა მსოფლიო ჩემპიონატი გაიმართა. მსოფლიო პირველობაზე საქართველოდან 3 ქალი სპორტსმენი – ირმა ხეცურიანი, გვანცა ზადიშვილი და ნინა თიბილაშვილი მონაწილეობდნენ.
პარაფარიკაობის წლევანდელი მსოფლიო ჩემპიონატი საქართველოსთვის ნამდვილად წარმატებულად შეიძლება ჩაითვალოს. ქალმა სპორტსმენებმა ტერნიში 2 ბრინჯაოს მედლის მოპოვება შეძლეს:
ირმა ხეცურიანი 🥉
საქართველოს ნაკრების წევრმა, ირმა ხეცურიანმა ბრინჯაო ხმლით ინდივიდუალურ ასპარეზობაში მოიპოვა – მან ძალიან მძიმე და დაძაბულ ორთაბრძოლაში გერმანელი სპორტსმენი, ატერსი დაამარცხა ანგარიშით 15-7.
გვანცა ზადიშვილი 🥉
ირმას წარმატებული ბრძოლიდან რამდენიმე საათში იმავე სახეობაში, ხმლით ინდივიდუალურ ასპარეზობაში, ნაკრების კიდევ ერთმა წევრმა, გვანცა ზადიშვილმაც მოიპოვა ბრინჯაოს მედალი. გვანცას ორთაბრძოლა კიდევ უფრო დაძაბული გამოდგა და ამჯერად ქართველმა პარამოფარიკავემ უნგრელი მეტოქე ანგარიშით 15-13 დაამარცხა.
რაც შეეხება ნინა თიბილაშვილს, ის გვანცასთან ერთად ჩაება მედლისთვის ბრძოლაში, თუმცა საბოლოოდ მან საპატიო მეხუთე ადგილი დაიკავა.
ინდივიდუალური ასპარეზობიდან მეორე დღეს ჩვენმა ნაკრებმა გუნდურ სახეობაშიც მოსინჯა ძალები და ამჯერადაც ძალიან რთულ ბრძოლაში მეხუთე ადგილს დავჯერდით. ტრადიციულად, გამორჩეულები იყვნენ ჩინელი სპორტსმენები, რომელთაც მოიგეს კიდეც ოქრო გუნდურ შეჯიბრებაში და ინდივიდუალურადაც ბევრი მედლის მოპოვება მოახერხეს.
ტურნირი ძალიან კარგი გამოცდილება იყო ქართველი პარამოფარიკავეებისთვის და აუცილებლად წაადგებათ მათ სამომავლო კარიერას – სულ უფრო ახლოვდება 2024 წელი და პარიზში გასამართი პარაოლიმპიური თამაშები.
საქართველოს ბანკი საქართველოს ოლიმპიური ნაკრების მთავარი სპონსორია და არა მარტო – ყოველთვის და ყველგან მხარს უჭერს ადამიანებს, რომლებიც არ ჩერდებიან და საკუთარი წარმატებით უკეთეს საქართველოს ქმნიან.