მზადება ერთა ლიგისთვის: ქალთა ეროვნული ნაკრების მატჩების მიმოხილვა

ისრაელელი სპეციალისტის, ირის ანტმანის გაწვრთნილი საქართველოს ქალთა ნაკრები ერთა ლიგის 2025 წლის გათამაშებისთვის ემზადება – წლის პირველი ოფიციალური მატჩი 21 თებერვალს, დედაქალაქ თბილისში გაიმართება და ჩვენი მეტოქე ანდორის ქალთა ნაკრები იქნება; 25 თებერვალს კი კვიპროსთან გასვლით შეხვედრაზე გაირკვევა 3 ქულის ბედი

⚽საქართველო VS ანდორა – 21 თებერვალი, 19:00 საათი;

⚽კვიპროსი VS საქართველო – 25 თებერვალი, 21:00 საათი.

ირისმა გასული წლის ბოლოს საქართველოს ფეხბურთის ფედერაციასთან ახალი ხელშეკრულებაც გააფორმა. ახალი კონტრაქტის თანახმად, ის ჩვენს ქალთა ნაკრებს 2026 წლის ჩათვლით გაწვრთნის. ირის ანტმანი 13 წლის განმავლობაში თამაშობდა ისრაელის ქალთა ნაკრებში მეკარის პოზიციაზე და კაპიტნობდა კიდეც გუნდს. საფეხბურთო კარიერის დასრულების შემდეგ 5 წელი მუშაობდა ისრაელის ნაკრების მწვრთნელის ასისტენტად; წვრთნიდა ისრაელის 17 და 19 წლამდე ქალთა ნაკრებებსაც.

დიდი საფეხბურთო და სამწვრთნელო გამოცდილების შემდეგ ანტმანი საქართველოში 2023 წლის აპრილში ჩამოვიდა სამუშაოდ და კარგი და ახალი პერსპექტივებიც გააჩინა ჩვენთან.

საქართველოს ქალთა ნაკრების თბილისური მატჩი „მიხეილ მესხი 2“-ის სტადიონზე გაიმართება. ირის ანტმანმა გუნდი თბილისში, სფფ-ს საწვრთნელი ცენტრის, ბასას მოედანზე შეკრიბა და რჩეულ ფეხბურთელებსაც უხმო:

მეკარე: თათია გაბუნია (ლანჩხუთი), ეკა თაბაგარი (სამეგრელო, ჩხოროწყუ), სვეტლანა გაბელაია (ნიკე-ლუსო, თბილისი);

დაცვა: გვანცა ქადაგიშვილი (ნიკე-ლუსო, თბილისი), მარიამ კალანდაძე (ლანჩხუთი), სოფო ნარსია (ნიკე-ლუსო, თბილისი), სალომე გასვიანი (ნიკე-ლუსო, თბილისი), თამარ ქველიძე (ეტლინგვაიერი, გერმანია), ნინო ჩხარტიშვილი (ლანჩხუთი), ელენე ბოლქვაძე (ბათუმი);

ნახევარდაცვა/თავდასხმა: ირინა ხაბურზანია (ნიკე-ლუსო, თბილისი), ნინო პასიკაშვილი (კვარტალი, თბილისი), ნათია დანელია (სარაევო, ბოსნია და ჰერცეგოვინა), ლიზი მწყერაშვილი (ნიკე-ლუსო, თბილისი), ტატიანა მატვეევა (ლანჩხუთი), ანი აკობიძე (ლანჩხუთი), ანანო წიქარიძე (ლანჩხუთი), კესო მეტონიძე (რაჭა, ამბროლაური) მაიკო ბებია (იუქსექოვასპორი, თურქეთი), ლიზი კანკია (კვარტალი, თბილისი), თინათინ ამბალია (კვარტალი, თბილისი), ნინი ბუხრიკიძე (ნიკე-ლუსო, თბილისი), თეონა ბაქრაძე (ნიკე-ლუსო, თბილისი).

საქართველოს ნაკრები C ლიგის მეორე ჯგუფში იასპარეზებს და ანდორისა და კვიპროსის ნაკრებების გარდა ჩვენი მეტოქე მალტის ქალთა ნაკრები იქნება. C ლიგა ჯამში ექვსი ჯგუფისგან შედგება და თამაშდება B ლიგის საგზურები. ჯგუფის ლიდერი თავისთავად იგებს დაწინაურების უფლებას, ხოლო ორი საუკეთესო მეორეადგილოსანი ნაკრები დამატებით შანსს მიიღებს და B ლიგის მესამეადგილოსნებთან პლეი-ოფის პრინციპით გამართულ შეხვედრებში გაარკვევს საგზურის ამბავს.

„როგორც წელს ვნახეთ, გვყავს ბევრი ახალგაზრდა ფეხბურთელი, რომლებსაც აქვთ როგორც პირადი, ისე გუნდური მიზნები. ვიმედოვნებ, მომავალ წელს ავისრულებთ ოცნებას. გვსურს, რომ B ლიგაში დავწინაურდეთ, ვიყოთ საუკეთესო გუნდი ჩვენს ჯგუფში.“ – ირის ანტმანმა ეს სიტყვები ჯერ კიდევ გასული წლის ბოლოს თქვა და აშკარაა, რომ მასთან ერთად ჩვენს ნაკრებს მართლაც აქვს პერსპექტივა და უკეთეს ლიგაში დაწინაურებისა და, ზოგადად, უკეთეს გუნდად ქცევის რეალური შანსი.

ისღა დაგვრჩენია, ჩვენც დავეხმაროთ მათ ამ პროცესში და 21 თებერვალს, 21:00 საათზე გავავსოთ მიხეილ მესხი 2-ის სტადიონი, სადაც დასწრება თავისუფალი იქნება. გულმხურვალედ ვუგულშემატკივროთ ჩვენს ქალთა ნაკრებს! საუკეთესო წინ არის!