ბოლო წლებში, გლობალური შრომითი ბაზარი მნიშვნელოვნად შეიცვალა, რაც რამდენიმე ფაქტორს უკავშირდება, მათ შორის პანდემიას და ხელოვნურ ინტელექტს. პანდემიის დროს, კომპანიები მუშაობის დისტანციურ ან ჰიბრიდულ მოდელზე გადავიდნენ, რამაც “ციფრული ნომადის” ცნება შექმნა და ოფისში არსებული დინამიკა შეცვალა. პანდემიის შემდეგ, კომპანიების დიდი ნაწილისთვის ნათელი გახდა, რომ თანამშრომელი, შესაძლოა, სხვა ქალაქში ან სულაც სხვა ქვეყანაში ცხოვრობდეს, მაგრამ საქმეს მაინც ასრულებდეს. თუმცა კიდევ უფრო დიდი ცვლილება ხელოვნური ინტელექტის ყოველდღიურობაში გამოჩენამ გამოიწვია, რამაც ადამიანების ეფექტიანობა და პროდუქტიულობა მნიშვნელოვნად გაზარდა.
თანამედროვე ტექნოლოგიებს შრომითი ბაზრის ორივე მხარეს იყენებენ, რაც იმითაც დასტურდება, რომ სხვადასხვა დათვლებით, მიმდინარე დეკადის ბოლომდე, HR-ტექნოლოგიების გლობალური ბაზრის ზომა $100 მილიარდამდე გაიზრდება. გლობალური სამუშაო ძალის ფუნდამენტური ცვლილების შედეგად, გადაიხედა ის მეთოდები, რომელთაც რეკრუტერები კადრების შესარჩევად იყენებენ, ხოლო პროცესში ხელოვნური ინტელექტი ჩაერთო. შედეგად, ბაზარზე არაერთი სტარტაპი გამოჩნდა, რომელთა მიზანს სწორედ HR-პროცესების ოპტიმიზება წარმოადგენს.
ამ ტენდენციას არც საქართველო ჩამორჩა, რომლისთვისაც ხელოვნური ინტელექტის განვითარება ერთ-ერთი პრიორიტეტად იქცა. ნახევარი წლის წინ, საქართველოში Helio.AI გამოჩნდა – რეკრუტინგის ინოვაციური სისტემა, რომელიც კომპანიებს საუკეთესო კანდიდატების სწრაფად შერჩევაში ეხმარება. როგორც კომპანიის თანადამფუძნებელი, ნინი მოსიაშვილი ამბობს, ხელოვნური ინტელექტი პროცესის სრული ციკლის ავტომატიზაციაში არის ჩართული და კომპანიას კანდიდატების რეზიუმეების, გამოცდილებისა და რბილი უნარების ანალიზში ეხმარება.
“დღეს, რეკრუტერები იკვლევენ, როგორც კანდიდატის გამოცდილებას, ასევე მის უნარებს და გუნდთან შესაბამისობას, რის საფუძველზეც პროფილს ადგენენ. თანამშრომლების შერჩევის ტრადიციული პროცესი ეფექტიანი აღარ არის, ხოლო რეკრუტერები დროის 70%-ზე მეტს რუტინულ დავალებებს უთმობენ და კანდიდატების შერჩევა იწელება, რის გამოც, თითქმის ყოველი მეორე შერჩევა – წარუმატებელია. ამ პრობლემამ გვიბიძგა შეგვექმნა ნეირომეცნიერული თამაში, რომლითაც რეკრუტერს კანდიდატის უნარების განსაზღვრა და გამოცდილების შეფასება შეუძლია, რაც ობიექტური და კომპანიისთვის სასარგებლო გადაწყვეტილების მიღების საშუალებას აძლევს”, – აღნიშნავს ნინი მოსიაშვილი.
როგორც Helio.AI-ში ამბობენ, სისტემა, რომელიც ქართულმა სტარტაპმა განავითარა, არ საჭიროებს ინტეგრაციას, ანუ მისი გამოყენება მომენტალურად შეიძლება, ხოლო თავად თამაში შვიდწუთიანია, რაც მისაღებია, როგორც რეკრუტერისთვის, ასევე კანდიდატისთვის. ამ დროისთვის, Helio.AI-ის სერვისებს 50-ზე მეტი კომპანია იყენებს, რომლებიც სერვისის საფასურს ყოველთვიურად იხდიან, რითაც ბიუჯეტს ზოგავენ. ქართული ნეირომეცნიერული თამაშის გამოყენების ღირებულება კომპანიის ზომაზე და რეკრუტინგული დავალებების მოცულობაზე არის დამოკიდებული, მაგრამ როგორც ნინი მოსიაშვილი ამბობს, მოთხოვნა ფაქტობრივად ყველა სექტორიდან შეინიშნება. თანაც, აქტიურობენ, როგორც დიდი, ანუ ბევრთანამშრომლიანი კომპანიები, ასევე ისეთებიც, რომლებიც თვის განმავლობაში მხოლოდ ორ-სამ ვაკანსიას აქვეყნებენ.
“რეკრუტინგის პროცესში Helio.AI-ის ინტეგრირებით, კომპანიებს შეუძლიათ, როგორც პროცესების აჩქარება და გამარტივება, ასევე ბიუჯეტისა და დროის დაზოგვა. თუ Helio.AI-ის გარეშე, ვაკანსიების დასახურად კომპანიებს ორი თვე სჭირდებათ, ჩვენი თამაშის ინტეგრაციის შემდეგ, თანამშრომლის აყვანა ორ-სამ კვირაში შეუძლიათ. თანაც, ჩვენთან ინტეგრაციით, რეკრუტერებს ე.წ. “შავი”, ანუ მანუალური საქმის გაკეთება აღარ უწევთ, რითაც დროის 60%-მდე უთავისუფლდებათ. Helio.AI-ის არხებისა და რესურსების ანალიზის ახლებური მეთოდების გამოყენებით, კომპანიებს ბიუჯეტის 50%-მდე დაზოგვაც შეუძლიათ”, – აღნიშნავს ნინი მოსიაშვილი.
როგორც Helio.AI-ის თანადამფუძნებლები ამბობენ, კომპანიის მისია – შერჩევის კომპლექსური და რთული პროცესის გამარტივება და გამოთავისუფლებული დროის ხარჯზე ადამიანების პროდუქტიულობის გაზრდაა. “Helio.AI-ის გუნდის მთავარი ღირებულება – მუდმივი განვითარებაა და გვჯერა, რომ მნიშვნელოვანი ცვლილებები, მხოლოდ ასე მიიღწევა. ჩვენი მიზანია, შევცვალოთ რეკრუტინგი არამხოლოდ საქართველოში და რეგიონში, არამედ მსოფლიოში. პარტნიორი კომპანიებისგან უკუკავშირს ვიღებთ, რომლის საფუძველზე პროდუქტს ვავითარებთ და სულ მალე, საქართველოს საზღვრებს გავცდებით და ჩვენს სერვისს რამდენიმე სხვა ქვეყანაში, მათ შორის უზბეკეთში და არაბთა გაერთიანებულ საამიროებში ავამოქმედებთ”, – ამბობს ნინი მოსიაშვილი.
აღნიშნულმა ხედვამ და მიზანმა, Helio.AI-ის ოთხი თანადამფუძნებელი 500 Global in Eurasia-მდე მოიყვანა – საერთაშორისო სტარტაპ-აქსელერატორამდე, რომელიც დამფუძნებლებს სტრატეგიული კავშირების დამყარებისა და დასახულ მიზნამდე მდგრადად მისვლის შესაძლებლობას აძლევს. “Helio.AI-ის თანადამფუძნებლებს ქართულ და საერთაშორისო კომპანიებში მუშაობის მრავალწლიანი გამოცდილება გვაქვს, მაგრამ მას შემდეგ, რაც სტარტაპ-ეკოსისტემაში შევაბიჯეთ, მივხვდით, რომ წინ გრძელი და, რაც მთავარია, ყველაფრისგან განსხვავებული თავგადასავალი გველოდა. 500 Global in Eurasia-ში მონაწილეობა ჩვენთვის დიდი შესაძლებლობაა, ხოლო მენტორების რჩევები ბიზნესის მასშტაბირებაში გვეხმარება”, – აღნიშნავს Helio.AI-ის თანადამფუძნებელი, ნინი მოსიაშვილი.
საქართველოში მსოფლიოს ერთ–ერთი წამყვანი სტარტაპ–აქსელერატორის, კალიფორნიული 500 Global-ის სააქსელერაციო პროგრამა გრძელდება. “საქართველოს ბანკთან” და GITA-სთან პარტნიორობით შექმნილი რეგიონული სააქსელერაციო პროგრამის, 500 Global in Eurasia-ს მეექვსე ნაკადისთვის მენტორებმა ცხრა სტარტაპი შეარჩიეს, რომელთა დასახასიათებლად ყველაზე კარგად, სიტყვა “მრავალფეროვნება” გამოდგება. 500 Global in Eurasia–ს მეექვსე ნაკადის მონაწილე კომპანიები შვიდ სექტორსა და ექვს ქვეყანას წარმოადგენენ და, რაც ყველაზე საინტერესოა, კავკასიისა და ცენტრალური აზიის რეგიონის ქვეყნებთან ერთად, ქართულ სააქსელერაციო პროგრამაში ევროპული სტარტაპებიც მოხვდნენ.
გაიცანით 500 Global in Eurasia-ს მეექვსე ნაკადის სხვა მონაწილეები:
• გაიცანით Optimyzee – სტარტაპი, რომელიც კომპანიებს AI-მარკეტინგულ ხელსაწყოებს სთავაზობს;
• გაიცანით YAYA – აპლიკაცია, რომელიც ბავშვების აქტივობებს დაგიგეგმავთ;
• როგორ ვაქციოთ ტექსტი ვიდეოდ ერთ წუთზე ნაკლებ დროში Katalist-ის გამოყენებით?;
• გაიცანით 500 Global in Eurasia-ს მეექვსე ნაკადის მონაწილე სტარტაპები;
• გაიცანით 500 Global in Eurasia-ს მეექვსე ნაკადის მენტორები.