სტუდენტური ცხოვრება მრავალფეროვანი, საინტერესო და დატვირთული პერიოდია, რომელსაც ანალოგი არ გააჩნია. მართალია, ცხოვრების ეს ეტაპი ძირითადად სწავლა-განათლების გარშემო ტრიალებს. ამის დასაბალანსებლად კი ყველაზე ეფექტური გზა, რომელსაც შეგიძლია მიმართო, სასწავლებლის მიღმა არსებულ სხვადასხვა ტიპის აქტივობებში მონაწილეობის მიღებაა.
საქართველოს ბანკი კორპორაციული სოციალური პასუხისმგებლობის ფარგლებში მუდმივად მხარს უჭერს მიზნებისკენ მიმავალი სტუდენტების და მოსწავლეების განათლებას; ქმნის და სთავაზობს ახალ და განსხვავებულ შესაძლებლობებს, აფინანსებს სწავლას, გასცემს სტიპენდიებს და ა.შ.
ასე რომ, სტუდენტებს ფინანსურ ინსტიტუტთან ერთად ყოველთვის შეუძლიათ იპოვონ ახალი გზები, რომლებითაც სრულყოფენ თავიანთ საჭიროებებს და მისწრაფებებს. ერთ-ერთი მიმდინარე პროექტი, რომელზეც რეგისტრაცია ჯერაც მიმდინარეობს, ჰარვარდის ბიზნეს სკოლის ქეისების კონკურსია, რომელიც განკუთვნილია ყველა იმ სტუდენტისთვის, ვისაც სურს გაიღრმაოს ცოდნა რეალურ ქეისებზე მუშაობით და დააგროვოს გამოცდილება ბიზნეს სფეროში.
რა არის ჰარვარდის ბიზნეს ქეისების კონკურსი?
საქართველოს ბანკისა და ბიზნეს საკონსულტაციო კომპანიის, TBSC Consulting-ის ერთობლივი თანამშრომლობით უკვე მეხუთედ იწყება სტუდენტური მასშტაბური ღონისძიება – ჰარვარდის ბიზნეს ქეისების კონკურსი. პროექტის მიზანია აღმოაჩინოს სხარტი, სიახლეებზე ორიენტირებული ახალგაზრდები, რომლებიც გუნდურად იმუშავებენ და ერთმანეთს შეეჯიბრებიან 3-ეტაპიან კონკურსში.
აღნიშნული პროექტი მიზნად ისახავს სტუდენტებისთვის ისეთი გარემოს შეთავაზებას, რომელშიც ისინი შეძლებენ გამოცადონ, თუ როგორია მენეჯერული პოზიციიდან მნიშვნელოვანი გადაწყვეტილებების მიღება. ინტერაქტიური ფორმატის კონკურსში მონაწილე ახალგაზრდები განივითარებენ ისეთ უნარ-ჩვევებს, როგორებიცაა ანალიტიკური აზროვნება, პრობლემის გადაჭრა, გუნდური მუშაობა, შემოქმედებითობა და სხვ.
შეჯიბრი მოიცავს 3 ეტაპს და ჩატარდება გარკვეული შუალედებით, სხვადასხვა დროს:
ღია რაუნდი – 15 ივნისი
ნახევარფინალური რაუნდი – 6-7 ივლისი
ფინალი – 20 ივლისი
ვის შეუძლია მონაწილეობის მიღება და როგორ?
ჰარვარდის ბიზნეს ქეისების კონკურსში მონაწილეობა შეუძლიათ საქართველოს აკრედიტებული უმაღლესი საგანმანათლებლო სასწავლებლების ბაკალავრიატისა და მაგისტრატურის სხვადასხვა მიმართულების და საფეხურის სტუდენტებს.
აღსანიშნავია, რომ აუცილებელი მოთხოვნაა, რომ თითოეული გუნდის ყველა მონაწილე იყოს ერთი და იმავე უნივერსიტეტიდან, რადგან პროექტში სწორედ უნივერსიტეტის სახელით იასპარეზებენ. ყოველი გუნდის შემადგენლობაში უნდა იყოს მინიმუმ 4 მონაწილე, მაქსიმუმ კი – 6.
რას მიიღებ გამარჯვების შემთხვევაში?
გარდა იმისა, რომ ამ მცირევადიანი კონკურსით გაიღრმავებ ან/და შეიძენ ცოდნას, გაიცნობ ამ სფეროს წარმატებულ და მნიშვნელოვან წარმომადგენლებს, ითანამშრომლებ თანატოლებთან, შესაძლებლობა გაქვს, რომ შენს გუნდელებთან ერთად გაიმარჯვო და დაჯილდოვდე 20 000 ლარიანი საპრიზო ფონდიდან, რომლის ბიუჯეტი შემდეგნაირად განაწილდება:
I ადგილი – 11 000 ლარი
II ადგილი – 6000 ლარი
III ადგილი – 3000 ლარი
თუ გსურს ჩაერთო საინტერესო პროექტში, თეორიული ცოდნა გარდაქმნა პრაქტიკულად, მოსინჯო შენი და თანაუნივერსიტეტელების ძალები, მაშინ, გაითვალისწინე, რომ ჰარვარდის ბიზნეს ქეისების კონკურსზე რეგისტრაცია 27 მაისს სრულდება. გუნდის რეგისტრაციისთვის საჭიროა, რომ მხოლოდ ლიდერმა შეავსოს აპლიკაცია.