მაინც რა გვაძლევს მოტივაციას — თვითმოტივაციისა და თანამშრომლების მოტივაციის თემაზე ჩატარებული სემინარების შედეგები

რამდენჯერ მოგვისმენია ფრაზა — “ბევრი საქმე მაქვს, მაგრამ მოტივაციას ვერ ვპოულობ, რომ დავიწყო”. რას ნიშნავს მუშაობის მოტივაცია და საკმარისია თუ არა კონკრეტული საქმის სიყვარული იმისთვის, რომ მუდმივად მოტივირებული ვიყოთ? ხშირად გვესმის, რომ პრემია, საბონუსე სისტემა ან ხელფასის ყოველწლიური სტაბილური ზრდა წამახალისებელია და მოტივაციის მთავარი წყარო ეს არის. სინამდვილეში როგორც მოტივაციის, ასევე დემოტივაციის მიზეზი სულ სხვაგან არის მოსაძებნი. 

5-6 ოქტომბერს საქართველოს ბანკისა და BPN Georgia-ს პარტნიორობით ბიზნეს წარმომადგენლებისთვის ჩატარდა სემინარი, რომელსაც BPN -ის მმართველი საბჭოს წევრი და BPN Georgia-ს დირექტორი, დანიელ მათერი უძღვებოდა. სემინარს მეტწილად, მმართველ და მენეჯერულ პოზიციებზე დასაქმებული ადამიანები ესწრებოდნენ.

მცირე და საშუალო ბიზნესის ყველაზე დიდი გამოწვევა თანამშრომლების პრობლემაა — ვერ პოულობენ, ან შენარჩუნება უჭირთ და თუ შეინარჩუნეს, ეფექტურ შედეგებს ვერ იღებენ. ამ ყველაფრის გამომწვევი მიზეზი კი მოტივაციის ნაკლებობაა. ჩატარებული სემინარის მიზანი პრობლემის გაანალიზება, თემების გამოკვეთა და დამსწრე საზოგადოებისთვის გადაჭრის გზების ჩვენება იყო.

სემინარი მოიცავდა როგორც თეორიულ, ისე პრაქტიკულ სამუშაოებს. პირველი ეტაპი დაეთმო ინფორმაციის გაზიარებას იმის შესახებ, თუ რა პრინციპებს უნდა ემყარებოდეს გუნდის მართვა. წარმოდგენილი იყო მოტივაციის შესახებ მსოფლიოში აღიარებული მიდგომები. შემდეგი ეტაპი მოიცავდა გუნდურ სამუშაოებს. დიდი ყურადღება დაეთმო თვითმოტივაციის ნაწილსაც — მაგალითად, როგორ ახერხებენ მეწარმეები/ბიზნესმენები თვითმოტივაციას მიზნების დასახვით. როგორ შეიძლება მივიღოთ სირთულეები, როგორც გამოწვევა და მამოტივირებელი ფაქტორი.

“სემინარის მთავარი პრინციპია, რომ მონაწილემ საკუთარ კითხვებს თვითონვე გასცეს პასუხი. გვქონდა ბევრი თვითშემეცნებითი ტესტი. მაგალითად,  როგორ უნდა ამოიცნო შენი თანამშრომელი, ან რა არის ქართულ კომპანიებში ყველაზე დიდი უკმაყოფილების გამომწვევი მიზეზი. რაც არ უნდა გასაოცარი იყოს, მთავარი მიზეზი არ არის ხელფასი. დემოტივაციის წყარო ადამიანური ფაქტორები აღმოჩნდა, როგორიცაა მაგ. დაუფასებლობა, მადლიერების არქონა, არასწორი ვალდებულებების დაკისრება და უნდობლობა თანამშრომლებისადმი. პრობლემების გამოკვეთის შემდეგ გაიმართა დისკუსია — ამ საკითხების მოგვარების რა მეთოდები არსებობს”. 

ჩვეულებრივ, ყველამ იცის, რომ როცა თანამშრომელს დავალებას აძლევს, შესრულების თავისუფლება უნდა მისცეს. თუმცა, მმართველებს რეალობაში ამის გაკეთება უჭირთ, რადგან ფიქრობენ, მათსავით კარგად საქმეს ვერავინ გაართმევს თავს. შედეგად, თავადაც სტრესულ გარემოში არიან და თანამშრომელიც დემოტივირებულია. სემინარის განმავლობაში მონაწილეებმა აღმოაჩინეს, რომ პრობლემას კი ხედავდნენ, მაგრამ ვერ აღიქვამდნენ. 

შეცდომის ან პრობლემის აღმოჩენა ერთია, მაგრამ ბუნებრივია, რთულია ცვლილების პროცესი, განსაკუთრებით მაშინ, როცა საკუთარი მიდგომები აქამდე სწორი გეგონა. ამ სემინარების მიზანი არა ერთბაშად შეცვლა, არამედ მარცვლის ჩაგდება და ადამიანებისთვის დაფიქრების საშუალების მიცემა იყო, რაც წარმატებით შესრულდა.

აღსანიშნავია ის ფაქტიც, რომ ამ შეხვედრის შემდეგ რამდენიმე მონაწილემ გრძელვადიან პროგრამაში ჩართვის სურვილი გამოთქვა. BPN Georigia-ს 3-წლიანი პროგრამა მცირე და საშუალო ბიზნესის განვითარება-მხარდაჭერისთვის შეიქმნა და ახლა უკვე საქართველოს ბანკის ბიზნეს მომხმარებლებისთვისაც ხელმისაწვდომია. 

“ჩვენი და საქართველოს ბანკის ერთობლივი პირველი ნაბიჯი ძალიან ნაყოფიერი გამოდგა. სემინარის რამდენიმე მონაწილე უკვე შემოგვიერთდა ბიზნეს გეგმის ვორქშოპზე  და გრძელვადიან პროგრამაში ჩართვის სურვილიც გამოთქვა. გარდა ამისა, შეთავაზების მეშვეობით, რომელიც საქართველოს ბანკის გვერდზეა განთავსებული, კიდევ შემოდის განაცხადები, გვკიავშირდებიან, რომ პროგრამით არიან დაინტერესებული. გვიხარია, რომ საქართველოს ბანკის დახმარებით მეტ ადამიანს მივაწვდინეთ ხმა”, — აღნიშნა BPN Georgia-ს რეგიონულმა მენეჯერმა, მეგი მაისურაძემ. 

3-წლიანი პროგრამა მოიცავს საგანმანათლებლო მიმართულებას, ბიზნეს სემინარებს (ბიზნეს გეგმის დამუშავება, ბიზნეს ადმინისტრირება, მარკეტინგი, ფინანსური მენეჯმენტი, კადრების მართვა და ა.შ.)და ქართველ და შვეიცარიელ ექსპერტებთან ინდივიდუალურ ქოუჩინგ შეხვედრებს. თუ საქართველოს ბანკის ბიზნეს მომხმარებლებს რაიმე გამოწვევა ან სიახლე ექნებათ, რომლის განხილვაც კომპეტენტურ პირებთან დასჭირდებათ, ისინი  მიიღებენ ინდივიდუალურ შეხვედრებს. ბიზნესის განვითარების პროგრამა სხვა საჭირო სერვისებთან ერთად მოიცავს ტექნიკურ მხარდაჭერასაც. ეს კი იმას ნიშნავს, რომ თუკი მონაწილე კონკრეტული გამოწვევის წინაშე დგას, შვეიცარიელი ექსპერტი განსაზღვრული დროით ადგილზე ჩაერთვება კომპანიის ან საწარმოს სამუშაო პროცესებში და გამოწვევასთან გამკლავებასა თუ სიახლის დანერგვაში დაეხმარება მეწარმეს. 

ამ პროგრამის ფარგლებში მცირე და საშუალო ბიზნესის წარმომადგენლებს საშუალება ექნებათ:

  • შეისწავლონ ბიზნეს გეგმისა და ფინანსური გეგმის შედგენის პრიცნიპები;
  • ბიზნეს გეგმის დამუშავების პროცესში მიიღონ ექსპერტების მხარდაჭერა;
  • დაინახონ საკუთარი უპირატესობა, ძლიერი და სუსტი მხარეები, შეაფასონ რისკები;
  • შეიმუშაონ და დროში გაწერონ სტრატეგიები;
  • ისწავლონ ფინანსური აღრიცხვის პრინციპები და ინსტრუმენტები;
  • გაეცნონ ბიზნეს გეგმისა და ფინანსური გეგმის შევსებულ ნიმუშებს.

რაც ასევე ძალიან მნიშვნელოვანია, BPN Georgia-ს ეს შეთავაზება საქართველოს ბანკის ბიზნეს მომხმარებლებს თავიანთი ბიზნესის ცნობადობის გაზრდასა და საჭირო კონტაქტების დამყარებაშიც დაეხმარება. ასევე მნიშვნელოვანი ფაქტორია, რომ პროგრამის 95% პროცენტი თანადაფინანსებულია BPN Gerogia-ს ფონდის მიერ. თქვენ  მხოლოდ განვითარებისთვის მზაობა და ცოდნისა და სიახლეების მიღების სურვილი გჭირდებათ. 

შეთავაზების მისაღებად შეავსეთ რეგისტრაციის ფორმა

არ გაჩერდე, გააგრძელე კითხვა