სტუდენტობა ადამიანის ცხოვრების ის საინტერესო ეტაპია, რომელიც ბავშვობასა და ზრდასრულობას შორის ზღვარზე გადის. უამრავ კარგ შესაძლებლობასთან ერთად, სტუდენტობა პასუხისმგებლობებსაც გვიჩენს. ამ ახლად აღმოჩენილ პასუხისმგებლობებს შორის კი ფინანსური ვალდებულებებიცაა, რომელთა მენეჯმენტი აუცილებელია და იმსახურებს ჩვენს ყურადღებას. გადასახდელია კომუნალურები, ბინის ქირა, სწავლის საფასური, ყოველდღიური ხარჯები. იმ შემთხვევაშიც კი, თუ მშობლები ან სხვა ადამიანები გეხმარებიან ფინანსურად, საკუთარი ბიუჯეტი თავად დაგეგმვას ყველაზე აქტიურად სწორედ ამ ეტაპზე იწყებ.
სამწუხაროდ, ადამიანების უმეტესობა ამ გამოწვევას მოუმზადებელი ხვდება. ფინანსურ განათლებას სკოლებში ჯერ კიდევ არ გვასწავლიან, თუმცა ამან არ უნდა დაგვაბრკოლოს. სჯობს გვიან, ვიდრე არასდროსო და სტუდენტობისას მაინც უნდა დავიწყოთ ფიქრი ისეთ საკითხებზე, როგორებიცაა თანხის გადანაწილება, დაზოგვა, ანაბარზე შეტანა და ა.შ.
ეს კონცეფციები შესაძლოა თავიდან ძალიან რთული იყოს, თუმცა თუ ჩვევად გავიხდით და ნაკლებად გამოვიყენებთ სიტყვას „შემომეხარჯა“, ნაბიჯ-ნაბიჯ გამოვიმუშავებთ საკუთარი ფულის სწორად განკარგვის უნარს.
დაიწყე ბიუჯეტის დაგეგმვით. გარკვეული პერიოდის დასაწყისში გამოთვალე, რა იქნება შენი შემოსავლები და ხარჯები შემდეგი თვის განმავლობაში. შემოსავლებში ჩათვალე ნებისმიერი თანხა, რომელსაც იღებ: ხელფასი, გრანტი, მშობლის მიერ მოცემული ფული თუ სხვა. შემდეგ ჩამოთვალე ხარჯები: ფიქსირებული და ცვლადი. ფიქსირებულია ის ხარჯები, რომელსაც ყოველთვიურად, ერთი და იმავე რაოდენობით ვიხდით, მაგალითად: ბინის ქირა. გამოაკელი შემოსავლებს ფიქსირებული ხარჯები და რაც დაგრჩება გადაანაწილე მთელ თვეზე, რათა ნახო, რა რაოდენობის თანხა შეგიძლია დახარჯო ყოველდღიურად.
ამისთვის ზედგამოჭრილია მობილბანკის ფუნქციონალი ფინანსური მენეჯერი, რომელიც ყველა ხარჯის აღრიცხვასა და ამასთანავე იმის კონტროლში დაგეხმარება, რომ დასახარჯი თანხის ლიმიტს არ გადააცილო.
სტუდენტობისას თანხის დაზოგვა მარტივი ნამდვილად არ არის, რადგან ბევრნაირი ხარჯისა და შედარებით ნაკლები შემოსავლების გამო ხშირად შეიძლება ყველაფერზე არც კი გვეყოს ფინანსები. მაგრამ დაზოგვის ერთ-ერთი მახასიათებელი ისაა, რომ სჯობს ახლავე დავიწყოთ და ცოტ-ცოტა დავზოგოთ, რადგან ფულს დროში ღირებულება აქვს და აწმყოში დაზოგილი თანხის ღირებულება მომავალში მეტია. დაზოგვის ბევრი მეთოდი არსებობს: 20/30/50-ის წესი, იაპონური მეთოდი, 3 დღის წესი და ა.შ. მათი ნახვა და შენთვის ოპტიმალურის ამორჩევა ინტერნეტში შეგიძლია. რაც მთავარია, ისწავლე „საჭირო“ და „სასურველი“ პროდუქტების გარჩევა. სანამ რამეს იყიდი, საკუთარ თავს გაუმხილე – ეს ნივთი მართლა გჭირდება თუ უბრალოდ გინდა? არაფერია ცუდი იმაში, რომ რაიმე გინდოდეს და იყიდო, მთავარია თანხის გადანაწილება შეძლო და აუცილებელ პროდუქტებზე არ დაგაკლდეს.
გაერკვიე საბანკო პროდუქტებში, ნახე, რა ტიპის დანაზოგის გაკეთება გირჩევნია, გამოიკვლიე რომელი ანაბარია შენთვის შესაფერისი, ხომ არ არის შენთვის მომხიბლავი სტუდენტური ან სეზონური შეთავაზებები და ა.შ. მინიმალური ყოველდღიური დანაზოგითაც შეგიძლია ისეთი თანხის მოგროვება, რომელიც გაუთვალისწინებელი ხარჯის გამოჩენისას ძალიან დაგეხმარება.
ფინანსური მენეჯმენტის ამ მოგზაურობაში თანმხლები პირიც მოძებნე, შენი კურსელი ან მეგობარი, რომელიც ასევე ცდილობს ფინანსური ცოდნის მიღებასა და ჩვევების შეძენას. თანამოაზრის პოვნა მოტივაციას შეგძენს და გაგამხნევებს, რადგან ეს მოგზაურობა ადვილი ნამდვილად არ არის. იმ შემთხვევაშიც კი არ შეგეშინდეს, თუ თავიდან არაფერი გამოგივა, გახსოვდეს, რომ ყველაფერი აგურ-აგურ შენდება.