კუბა, კარიბის ზღვის რეგიონის ისტორიული და კულტურული ცენტრი, მრავალფეროვნების და კონტრასტების ქვეყანაა. კუბის ისტორია მუსიკა, სამზარეული, ხელოვნება, ფესტივალები ევროპული, აფრიკული და კარიბიული ტრადიციების უნიკალური ნაზავია, რაც კუნძულზე მოგზაურობას გამორჩეულ კულტურულ და ტურისტულ გამოცდილებად აქცევს.
1. უკვდავი არქიტექტურა
კუბის კოლონიზაცია 1492 წელს დაიწყო და მე-19 საუკუნის ბოლომდე გაგრძელდა. ესპანელმა კოლონიზატორებმა შთამბეჭდავი არქიტექტურით გამორჩეული ქალაქების ასაშენებლად ძალები არ დაიშურეს. ამის საუკეთესო მაგალითი ყოფილი კოლონიური ცენტრი და თანამედროვე კუბის დედაქალაქი ჰავანაა – ციხესიმაგრეების, ფერადი ქუჩების, ესპანური სასახლეების, კლასიკური და თანამედროვე არტისტების, ღია კაფეების და მუსიკის ქალაქი. ძველი ჰავანა, რომელიც ათობით ვილას, ტაძრებსა და მე-17-მე-18 საუკუნის თითქმის უცვლელად შემონახულ მოედნებსა და ქუჩებს აერთიანებს, 500-წლიანი ისტორიის განმავლობაში კუბის პოლიტიკურ და კულტურულ ცენტრი იყო. აქვე მდებარეობს ქალაქის ერთ-ერთი მთავარი ღირსშესანიშნაობა – წმინდა კრისტოფერის საკათედრო ტაძარი, ესპანური ბაროკოს გამორჩეული ნიმუში. აღსანიშნავია, რომ კუბა იუნესკოს მსოფლიო მემკვიდრეობის ათამდე ძეგლის სამშობლოა. მათ შორისაა ძველი ჰავანაც.
ჰავანას შედარებით ახალ უბნებში კი გასული საუკუნის 50-იანი წლების მოდერნისტული არქიტექტურაც გვხვდება: მუზეუმები, სამთავრობო შენობები, ღია ტერასიანი რესტორნები, ფუტურისტულ სტილში გადაწყვეტილი „ნაყინის ტაძარიც“ კი.
ქვეყნის კოლონიურ წარსულში მოგზაურობა არც სხვა ქალაქებშია რთული, იქნება ეს შაქრის პლანტატორების მიერ აგებული ტრინიდადი, სანტიაგო დე კუბას ძველი პორტი თუ ფრანგების მიერ დაარსებული სიენფუეგო – „კარიბიული პარიზი“. კუბის ქალაქების ფერადი და ხმაურიანი ქუჩების ერთ-ერთი მთავარი ატრიბუტი 50-იანების ამერიკული მანქანებია, რომელთა სიმრავლეც კუბას ცოცხალ ავტომუზეუმად აქცევს.
2. გამორჩეული ბუნებრივი ლანდშაფტი
კუბის მომხიბვლელობა მხოლოდ უნიკალური არქიტექტურის დამსახურება არ არის, ტროპიკული კუნძულის სანაპიროები და ბუნებრივი ძეგლები მოგზაურებზე არანაკლებ შთაბეჭდილებას ახდენს. კუბაზე ყოფნისას ზღვიდან შორს არასდროს იქნებით, კუბის სანაპიროებს თეთრი ქვიშა, ლურჯი წყალი და მრავალფეროვანი წყალქვეშა სამყარო მსოფლიოში ერთ-ერთ ყველაზე მიმზიდველ პლაჟებად აქცევს. ჰავანას სანაპიროებთან ერთად ქვეყნის გამორჩეული პლაჟებია მატანზა, ვარადეროს რეზორტი, ლაგუნა გუანაროკა, რანჩო ლუნას სანაპირო და ა.შ.
კუბა არც მწვანე მთების, ხეობების და მღვიმეების მოყვარულებს გაუცრუებს იმედებს. იურული პერიოდით თარიღებული, მინი მთიანეთი გარშემორტყმული ვინალესის ხეობა იუნესკოს მსოფლიო მემკვიდრეობის ძეგლია და იდეალურია, როგორც – ფეხით ლაშქრობის, ისე – ცხენით მოგზაურობისთვის. ვინალესის გორებზე გვხვდება თამბაქოს ვრცელი პლანტაციებიც და აქვე შეიძლება ტრადიციული კუბური სიგარის დაგემოვნებაც. ტროპიკული ტყეებით დაფარული მთიანი რეგიონების ველური ბუნება ტრინიდადის და ზაპატას ეროვნულ პარკებშია დაცული, ვარიაქაკოს ეკოლოგიურ რეზერვაციის ღრმა მღვიმეები კი მინერალური წყლების ბუნებრივი აბაზანებითაა ცნობილი.
3. კულტურა: მუსიკა, ცეკვა და ფესტივალები
კუბური კულტურა წარმოუდგენელია ტრადიციული მუსიკის და რიტმული ცეკვების გარეშე. ესპანური მუსიკალური ტრადიციის და აფრიკული რიტმების შერწყმის შედეგად სწორედ კუბაზე დაიბადა სალსა, რუმბა, მამბო, ჩა-ჩა-ჩა. გარდა ამისა, კუბა ლათინოამერიკული ჯაზის სამშობლოცაა. კუბის ქალაქების, განსაკუთრებით კი ჰავანას, ქუჩები მთელი დღის განმავლობაში ცოცხალი მუსიკითა და ღია კაფეებსა თუ მოედნებზე მოცეკვავე წყვილებითაა სავსე. ჰავანაში ჩაეყარა საფუძველი ცნობილ მუსიკალურ ანსამბლს – Buena Vista Social Club-ს, რომელიც ვეტერანი კუბელი მუსიკოსებისგან შედგება და მეოცე საუკუნის 40-იანი წლების კუბურ მუსიკას აცოცხლებს.
მუსიკის და ცეკვის ფესტივალები კუბის ქალაქებში მთელი წლის განმავლობაში იმართება. ჰავანა ყოველი წლის ივლის-აგვისტოში ჯაზის საერთაშორისო ფესტივალს და კარნავალს მასპინძლობს. სანტიაგო დე კუბაში კი ქვეყნის მრავალფეროვანი ისტორია, კულტურა და ტრადიციები მაშტაბური კარნავლით აღინიშნება. რვადღიანი კარნავლის განმავლობაში ცეკვასა და მუსიკას თან ახლავს თეატრალური წარმოდგენები და ადგილობრივი კერძების ფესტივალი.
4. ტრადიციული სამზარეული და სიგარები
კუბური სამზარეულო იდეალურად აირეკლავს ქვეყნის კულტურის მრავალფეროვან ხასიათს. ზღვის პროდუქტები, ტროპიკული ხილი, ენდემური მცენარეები, ბრინჯი, სხვადასხვანაირი ხორცი – ტრადიციული სამზარეულოს მთავარი ინგრედიენტებია. კუბური გემოებისთვის ნიშნეულია მწარეს, ცხარესა და ტროპიკული არომატების ნაზავი. გარდა ამისა, საინტერესოა, რომ კუბაში ვერ იპოვით მაკდონალდსს ან სხვა დიდ ქსელურ რესტორანს – კუბას სურს, ტურისტებმა ადგილობრივი სამზარეულო დააგემოვნონ და ამით ბოლომდე ეზიარონ მის კულტურას.
რაღა თქმა უნდა, შეუძლებელია, კუბაზე საუბრისას არ ვახსენოთ რომი და ტრადიციული სიგარები. რომი ქვეყანაში ყველაზე ფართოდ გავრცელებული ალოჰოლური სასმელია. რომზე დაფუძნებული პოპულარული კოქტეილების (მოჰიტო, პინაკოლადა, კუბა ლიბრე) ავთენტური ვერსიების დაგემოვნებაც სწორედ კუბაზე შეიძლება. რომის სხვადასხვა ვერსია ხშირად კუბური სიგარების ბრენდებისთვის შთაგონებად იქცევა. სასმელის სიგარასთან დაწყვილებას თავისი წესები აქვს: მაგალითად, მუქი რომი მსხვილ, მოტკბო არომატის სიგარებს საუკეთესოდ ეხამება, ხოლო თეთრ რომს უფრო მსუბუქი ტონებით გაჯერებულ, მომცრო სიგარებთან აწყვილებენ. საინტერესოა, რომ სიგარის მოწევის ტრადიცია კუბის აბორიგენი ტომების რიტუალებიდან იღებს სათავეს და საუკუნეებს ითვლის.
5. ხელოვნება, მუზეუმები, რევოლუციის მოგონებები
დაბოლოს, კუბაზე არაერთი საინტერესო მუზეუმსა და ისტორიულ მემორიალს შეხვდებით. კუბელი ხელოვანების კლასიკური და ავანგარდული სტილის ნამუშევრების ნახვა ჰავანას ხელოვნების ეროვნულ მუზეუმსა და კოლონიური ხელოვნების მუზეუმშია შესაძლებელი. ჰავანაში არსებობს კუბური მუსიკის და ტრადიციული ცეკვის მუზეუმებიც. დედაქალაქში ფუნქციონირებს თანამედროვე სახვითი ხელოვნების ორი გალერეაც, რომლებიც ადგილობრივი არტისტების მუდმივ გამოფენებს მასპინძლობს. გარდა ამისა, ქვეყნის სხვადასხვა ქალაქში მოქმედი ისტორიის მუზეუმებსა და ღია ცის ქვეშ მოწყობილი საგამოფენო-მემორიალური სივრცეები კუბის უახლესი ისტორიის და რევოლუციის მეხსიერების ინახავენ. მათ შორისაა: რევოლუციის მუზეუმი, კოლონიური ისტორიის მუზეუმი, ჩე გევარას მუზეუმი და მოვზოლეუმი, ერნესტ ჰემინგუეის სახლ-მუზეუმი და ა.შ.
თეთრი ქვიშის სანაპიროები, ძველი სასახლეები, ციხესიმაგრეები, ფერადი და მზიანი ქუჩები, სამხრეთული რიტმები და ტროპიკული არომატები კუბას იმ მსუბუქ, ნოსტალგიურ და მაგიურ ხასიათს ანიჭებს, რომელიც ალბათ ყველაზე მეტად უხდება ზღვისპირეთს და ზაფხულს. კუბა კონტრასტების ქვეყანაა, სადაც ისტორია და თანამედროვეობა მუდმივად ერწყმის ერთმანეთს. სწორედ ამ ნიშნით შეირჩა ის VOYAGER-ისთვის, რომელიც ივნისში გამოიცა. შეგახსენებთ, რომ VOYAGER სამ თვეში ერთხელ გამოიცემა და ის უფასოდ ხელმისწვდომია SOLO Boutique-ში მხოლოდ SOLO მომხმარებლებისთვის.