დასრულდა ევროპის XVII ახალგაზრდული ოლიმპიური ფესტივალი, რომელიც სლოვენიის ქალაქ მარიბორში 23 ივლისიდან 29 ივლისის ჩათვლით იმართებოდა. სლოვენიაში ევროპის კონტინენტის 48 სახელმწიფოდან სლოვენიაში 14-დან 18 წლამდე 2419 სპორტსმენი ჩავიდა.
საქართველოს ახალგაზრდული ოლიმპიური ნაკრები, რომლის გენერალური სპონსორიც საქართველოს ბანკია, 31 სპორტსმენით იყო წარმოდგენილი სულ 9 სახეობაში: ძიუდო, ცურვა, მძლეოსნობა, ველოსპორტი – საგზატკეცილო და სამთო, ტანვარჯიში, კალათბურთი 3X3, ჩოგბურთი და სკეიტბორდი.
ასაკისა და ტურნირის დონის გათვალისწინებით, თითოეული ახალგაზრდა ქართველი სპორტსმენისთვის ეს იყო უდიდესი შესაძლებლობების ერთი კვირა, საუკეთესო სივრცე, სადაც გამოცდი საკუთარი შრომის შედეგებს, გაიმყარებ ძალებს და დამატებით მიიღებ უმთავრეს ჯილდოს – გამოცდილებას.
ამასთან ერთად ქართველი სპორტსმენები სამშობლოში პრიზიორები დაბრუნდნენ – ჯამში სულ რვა მედლის მოპოვება მოვახერხეთ სხვადასხვა კატეგორიაში. მათ შორის ლიდერობენ ახალგაზრდა ძიუდოისტები, რომლებმაც 6 მედალი მოიპოვეს:
🥇 შოთა ბაჩოშვილი (-50 კვ)
🥇 მერაბ სამადაშვილი (-55 კგ)
🥇 მათე გველესიანი (-66 კგ)
🥈 გიორგი ბენდელიანი (-81 კგ)
🥈 საბა გველესიანი (-90 კგ)
🥉 შოთიკო გოჩიაშვილი (+90 კგ)
სამი ოქრო, ორი ვერცხლი და ერთიც ბრინჯაო – ბრწყინვალე ინდივიდუალური შედეგები და ყველა ძიუდოისტის ღირსეული გამოსვლა ფესტივალზე. ცხადია, იყო ბევრი დასანანი მომენტი და მეტის მოგების, უფრო წინ გასვლის რეალური შესაძლებლობა და ძლიერი სურვილი, თუმცა ასეთია სპორტი, მით უფრო ასეთ ასაკში, მეტი წილი დატვირთვა მოდის ფსიქოლოგიურ და მენტალურ მზაობაზე – სწორედ ამ მზაობის გამომუშავებისთვის არსებობს მსგავსი ფესტივალები.
ქართულ ძიუდოს უდიდესი ისტორია აქვს, წარსულის ძალა და ინერცია შესაბამისად აისახება ზრდასრულ და ახალგაზრდა ძიუდოს ნაკრებებზეც, ეს გამოჩნდა მარიბორშიც და საქართველოს ძიუდოს ვაჟთა და გოგონათა შერეულმა ნაკრებმაც მოახერხა ბრინჯაოს მედლის მოპოვება:
🥉 ვაჟთა და გოგონათა შერეული ნაკრები – ძიუდო
ცალკე გამოსარჩევია ახალგაზრდა ქართველი ტანმოვარჯიშის, დაჩი დოლიძის შესანიშნავი ასპარეზობა და დამსახურებული ბრინჯაოს მედალიც:
🥉 დაჩი დოლიძე – ტანვარჯიში
ასე და ამგვარად, საერთო ჯამში საქართველომ ევროპის წლევანდელ ახალგაზრდულ ოლიმპიადაზე რვა მედლის მოპოვება შეძლო – 3 ოქრო, 2 ვერცხლი და 3 ბრინჯაო და 48 ქვეყნისგან შემდგარ საერთო გუნდურ ჩათვლაში მე-14 ადგილი დაიკავა.
რაც მთავარია, არ უნდა დაგვავიწყდეს, რომ მედლებთან ერთად საქართველოს ოლიმპიური დელეგაცია სლოვენიიდან სამშობლოში დაბრუნდა შეუფასებელი გამოცდილებით, რომელიც სამომავლოდ ევროპის თუ მსოფლიო პირველობებზე და დიდ ოლიმპიურ თამაშებზე აუცილებლად წაადგება თითოეულ სპორტსმენს და ქვეყნის საერთო წარმატებას, რასაც ეროვნული ნაკრების გენერალური სპონსორობით საქართველოს ბანკიც უჭერს მხარს აქტიურად.