თანამედროვე საერთაშორისო ბაზარზე ცოდნის დამადასტურებელი დოკუმენტები სულ უფრო სიმბოლური ხდება. მარტივად რომ ვთქვათ, ვერც დიპლომების რაოდენობით თუ მათი ხარისხით ვერ მოახდენ დამსაქმებელზე განსაკუთრებულ შთაბეჭდილებას, თუ საკუთარი შესაძლებლობების გამოვლენა ვერ შეძელი.
Miami Ad School Europe კი ის ადგილია, სადაც თეორიულად შეძენილი ცოდნის პრაქტიკაში გამოყენება უმთავრესი ღირებულებაა. აქ ისწავლი, როგორ შექმნა საკუთარი ქაოსური იდეებისგან პროდუქტი, რომელსაც შემდეგ დიდ კომპანიებს მიჰყიდი. მაღალი გადასახადის გამო მაიამის სარეკლამო სკოლა შეიძლება ირეალურ ზღაპარს ჰგავდეს, მაგრამ საქართველოს ბანკის ნიკა გუჯეჯიანის სახელობის სასტიპენდიო პროგრამა ნებისმიერ მოტივირებულ სტუდენტს შესაძლებლობას აძლევს, ეს შორეული ოცნება რეალობად აქციას.
და მაინც, რატომ უნდა ჩააბარო Miami Ad School Europe-ში? ამაზე ბევრნაირი დამარწმუნებელი პასუხი არსებობს, მაგრამ ქვემოთ ხუთ ყველაზე მნიშვნელოვანს გაგაცნობთ.
1. სარეკლამო ინდუსტრიის საუკეთესო სკოლაში სწავლის შესაძლებლობა
მაიამის სარეკლამო სკოლა 1993 წელს დაარსდა ფლორიდის შტატში, ქალაქ მაიამიში. მაიამი კომერციის, მედია-ხელოვნების სექტორში წამყვანი ქალაქია. მაიამის სკოლას მსოფლიოს გარშემო 15 კამპუსი აქვს სხვადასხვა ქალაქში, მათ შორის ბერლინში, რომლის კამპუსიც წლებია, საუკეთესო შედეგებს აჩვენებს და საქართველოს ბანკიც სწორედ მასთან თანამშრომლობს. სკოლა სტუდენტებს სთავაზობს გრძელვადიან და მოკლევადიან პროგრამებს სხვადასხვა მიმართულებით, მათ შორის საქართველოს ბანკის სტიპენდია შეგიძლია მოიპოვო Art Direction-ის, Copywriting-ისა თუ Creative Technology-ს 2-წლიან პორტფოლიო პროგრამებზე – ყველა იმ მიმართულებაზე, რომელიც თანამედროვე სამყაროში სულ უფრო მოთხოვნადი ხდება.
2. მთლიანად პრაქტიკაზე დაფუძნებული ცოდნის მიღება
სკოლაში, უნივერსიტეტში თუ თავისუფალ დროს არაერთი ,,how to” თეორია გვისწავლია, თუმცა სულ ბოლოს აღმოგვიჩენია, რომ ბევრი მაინც არაფერი ვიცით, თუ როგორ გავანაწილოთ დრო, ჩავატაროთ კვლევა ან გავხდეთ წარმატებულები. მაიამის სკოლის მთავარი ნიშა პრაქტიკულ და რეალურ ცოდნაზე ორიენტირებაა: აქ არ ისწავლი შაბლონურად 10 წესს იმის შესახებ, თუ როგორ იქმნება წარმატებული ბრენდი, არამედ პროფესიონალების დახმარებით თავად შექმნი კამპანიებსა და პროექტებს, რომლებიც ქმნიან ბრენდების იმიჯს. 2-წლიანი კურსის ბოლოს ყველა სტუდენტს აქვს სრულყოფილი პორტფოლიო, რომელიც კომერციულ ინდუსტრიაში ნებისმიერი დამსაქმებლისთვის კადრის შეფასების მთავარი ინდიკატორია.
3. მსოფლიოს წამყვან კომპანიებში დასაქმების შესაძლებლობა
მაიამის სარეკლამო სკოლა თანამშრომლობს მსოფლიოს წამყვან კომპანიებთან სხვადასხვა სფეროში, მათ შორის არიან მოდის სახლები (გუჩი, ჰერმესი, პრადა), ციფრული და მედია კომპანიები (ნეტფლიქსი, გუგლი, მეტა), არასამთავრობო ორგანიზაციები (UNICEF, World Wildlife Fund (WWF), Unitied nations), ავტოინდუსტრიის გიგანტები (Mercedes-Benz) და ა.შ სწავლის პერიოდში სტუდენტებს საშუალება აქვთ, პრაქტიკული გამოცდილება სწორედ ამ კომპანიებში მიიღონ და რეალურ პროექტებზე იმუშაონ. სკოლა საუკეთესო საშუალებას გაძლევს, რომ მაქსიმალურად გამოავლინო შენი შემოქმედებითი პოტენციალი.
კურსდამთავრებულთა 90%-ზე მეტი საქმიანობას პარტნიორ კომპანიებში აგრძელებს როგორც კრეატიული დირექტორი, ქოფირაითერი, ბრენდ მენეჯერი და ა.შ. ან კიდევ თავად ქმნის საკუთარ ბიზნესს.
4. საუკეთესოთა გვერდით სწავლა
მაიამის სარეკლამო სკოლას სხვადასხვა პროგრამაზე სხვადასხვა მოთხოვნა აქვს, თუმცა ყველა მიმართულებაზე მხოლოდ რჩეული სტუდენტები იყრიან თავს. აქ არაფერს აფასებენ ისე, როგორც მოტივაციას, ორიგინალურ იდეებსა და აზროვნებას. იქ მოხვედრისას კონკურენცია მაღალია, გადამწყვეტ როლს კი სამოტივაციო წერილი და ინდივიდუალური ნამუშევრები ასრულებს.
სწავლების ორწლიანი პროცესი შრომატევადი, მაგრამ მრავალფეროვანი და საინტერესოა. მაიამის სკოლაში იციან, რომ სწავლა და შრომა გართობის, დასვენების, სოციალიზაციის გარეშე პროდუქტიული არ არის, ამიტომ ხშირად აწყობს საინტერესო ღონისძიებებს სტუდენტებისთვის.
5. სრულად უფასოდ სწავლის შანსი
საქართველოს ბანკი Miami Ad School Europe-თან თანამშრომლობით გამორჩეულ სტუდენტებს აძლევს საშუალებას, 2 წლის განმავლობაში სრულიად უფასოდ ისწავლონ ბერლინის მაიამის სარეკლამო სკოლაში, სადაც ორწლიანი პროგრამების საშუალო გადასახადი 40-ათას დოლარამდე მერყეობს. სწავლასთან ერთად შესაძლებლობა გეძლევა, კულტურულად (თუ სუბკულტურულად) მსოფლიოს ერთ-ერთ გამორჩეულ ქვეყანაში იცხოვრო. ამისათვის კი ჯერ უნდა ჩაირიცხო მაიამის სკოლის გერმანული ფილიალის რომელიმე პროგრამაზე და შემდეგ სტიპენდიის აპლიკაცია შეავსო. გამარჯვებულს შეარჩევენ Miami Ad School Europe-ისა და საქართველოს ბანკის წარმომადგენლები.
ნიკა გუჯეჯიანის სახელობის სტიპენდია Miami Ad School Europe-ის და საქართველოს ბანკის თანამშრომლობით, 2019 წელს დაარსდა. ნიკა 2014-2016 წლებში თავად სწავლობდა Miami Ad School Europe-ში Art Direction-ის მიმართულებით. საქართველოს ბანკის დაფინანსებით უკვე 3 სტუდენტს მიეცა სრულიად უფასოდ სწავლის შესაძლებლობა და ვისაც სურს გახდეს შემდეგი, შეუძლია კონკურსში მიიღოს მონაწილეობა 25 ივლისამდე.