საფონდო ბირჟა აღმასვლას დაუბრუნდა

გამოწვევებით აღსავსე ერთთვიანი პერიოდის შემდეგ, ამერიკული საფონდო ბირჟა აღმასვლას დაუბრუნდა. წინა სავაჭრო დღეს ძირითადი ინდექსების, მათ შორის, S&P 500-ის და Dow Jones-ის ღირებულება საშუალოდ 1.5%-ით გაიზარდა, ხოლო Nasdaq-ის ტექნოლოგიური ინდექსის შემთხვევაში ზრდის მაჩვენებელი 2.3%-ს აღწევს.

გასათვალისწინებელია, რომ ამ შედეგს წინ უძღოდა S&P 500-ის თითქმის 10%-იანი კლება, რაც მსოფლიოს მასშტაბით გეოპოლიტიკური რისკების ზრდით და სამომავლო პერსპექტივასთან დაკავშირებით გაურკვევლობით იყო განპირობებული. 

მოკლევადიანი რყევების მიუხედავად, გასათვალისწინებელია, რომ საფონდო ბირჟა ისტორიულად ყოველთვის აღმავალია, რაც პირდაპირ კავშირშია გლობალური ეკონომიკის ზრდასთან, სწორედ ამიტომ, გამოცდილი ინვესტორები მოკლევადიან კლებებს ერთგვარ “ფასდაკლებებად” განიხილავენ, რადგან ასეთ დროს კომპანიების აქციების შეძენა გაცილებით უფრო იაფადაა შესაძლებელი, ვიდრე სხვა პირობებში. 

ზრდის განმაპირობებელი ფაქტორები:

საფონდო ბირჟის ბოლოდროინდელი აღმასვლა აშშ-ის პრეზიდენტის გადაწყვეტილებებთანაა დაკავშირებული. მედიაში გავრცელებული ინფორმაციით, დონალდ ტრამპი სავაჭრო პარტნიორი სახელმწიფოების წინააღმდეგ დაწესებული ტარიფების შემსუბუქებას, გადავადებას და შეზღუდვების ნაწილის გაუქმებას განიხილავს. ბუნებრივია, ეს ინფორმაცია ინვესტორების განწყობაზე პოზიტიურად აისახება, რადგან გასული თვის განმავლობაში დაფიქსირებული ვარდნა გარკვეულწილად სავაჭრო ომის გაჩაღებასთან იყო დაკავშირებული, მისი დეესკალაცია და ბაზარზე პოზიტიურ მოლოდინებს აჩენს.

ამასთან, საუდის არაბეთში აშშ-ის, რუსეთის და უკრაინის დელეგაციებს შორის სამშვიდობო მოლაპარაკებები იმართება, რაც აჩენს მოლოდინს, რომ უახლოეს მომავალში მხარეები გარკვეული სახის შეთანხმებას მაინც მიაღწევენ, რაც კონფლიქტის დასრულების მიმართულებით გადადგმული მნიშვნელოვანი ნაბიჯი იქნება. ამ შემთხვევაში, ინვესტორები 30-დღიან ცეცხლის შეწყვეტას და შავი ზღვის რეგიონში უსაფრთხოების გარანტიებს ელიან, რაც რეალისტურ მიზნად შეიძლება ჩაითვალოს.  

გამორჩეული შედეგების მქონე კომპანიები:

ძირითადი საფონდო ინდექსების ზრდის ფონზე, ზოგიერთ კომპანიას გამორჩეულად პოზიტიური შედეგები აქვს, მათ შორის ერთ-ერთია ამერიკული Tesla (TSLA), რომელმაც ერთ კვირაში თითქმის 22%-იანი ზრდა დააფიქსირა და საბაზრო შეფასება $872 მილიარდამდე გაზარდა. Tesla-ს ბოლოდროინდელი აღმასვლა არა კომპანიის ფინანსური შედეგებით, არამედ ინვესტორების განწყობის ცვლილებით არის განპირობებული, რადგან დეკემბერში დაფიქსირებულ პიკურ მაჩვენებელთან შედარებით მის აქციების ღირებულება 54%-ით იყო შემცირებული, სწორედ ამიტომ, ინვესტორებმა ჩათვალეს, რომ ის ზედმეტად იყო გაუფასურებული და მისი აქციების შეძენა “ფასდაკლებით” დაიწყეს. ამასთან, გასათვალისწინებელია, რომ ბოლო დროს Tesla-ს მერყეობა არა უშუალოდ კომპანიის შედეგებით, არამედ მისი გენერალური დირექტორის, ილონ მასკის პოლიტიკური აქტივობით არის განპირობებული.

მიმდინარე კვირას გამორჩეული შედეგები აქვთ სხვა ტექნოლოგიურ გიგანტებსაც, მათ შორისაა:

Meta (META): +3.8%

Amazon (AMZN): +3.6%

Nvidia (NVDA): +3.2%

TSMC (TSM): +2.5%

Google (GOOG): +2.2%

საერთო ჯამში, შეიძლება ითქვას, რომ ინვესტორებს სამომავლო პერსპექტივასთან დაკავშირებით პოზიტიური მოლოდინები აქვთ და თუ შენც ასე ფიქრობ, მაშინ მობილბანკში შენს მიერ არჩეულ საინვესტიციო სტრატეგიას უნდა მიჰყვე და თვალი ადევნო საფონდო ბირჟაზე განვითარებულ მოვლენებს.

*მოცემული „ინფორმაცია“ არ წარმოადგენს და ამავდროულად არ შეიძლება აღქმულ იქნას როგორც საინვესტიციო რჩევა, ყიდვის/გაყიდვის ან შუამავლობის შეთავაზება ან რეკომენდაცია ფასიანი ქაღალდების შეძენასთან/ გაყიდვასთან დაკავშირებით.