2025 წელი დაიწყო და მასთან მიმართებით ანალიტიკოსებს შესანიშნავი მოლოდინები აქვთ. JPMorgan-ის და Deutsche Bank-ის პროგნოზით, წელს აშშ-ის მთავარი საფონდო ინდექსი (S&P 500) 10-15%-ის ფარგლებში გაიზრდება, რაც იმას ნიშნავს, რომ უმსხვილეს ამერიკულ კომპანიებს, სავარაუდოდ, გამორჩეულად კარგი შედეგები ექნებათ, რასაც რიგი ფაქტორების განაპირობებს, მათ შორისაა:
მონეტარული პოლიტიკა
აშშ-ის ფედერალური რეზერვისა და ევროპის ცენტრალური ბანკის გეგმის თანახმად, წელს დასავლეთის მასშტაბით მონეტარული პოლიტიკა საგრძნობლად შემსუბუქდება, ანუ საპროცენტო განაკვეთები შემცირდება, რაც კაპიტალზე ხელმისაწვდომობას გააუმჯობესებს, სესხებს გააიაფებს და საფონდო ბირჟის ზრდას შეუწყობს ხელს. ამასთან, საპროცენტო განაკვეთების შემცირება განსაკუთრებით დიდი სარგებლის მომტანი იქნება მცირე და საშუალო ზომის ბიზნესებისათვის, ამიტომ ანალიტიკოსებს Russell Small/Mid-Cap Index-თან მიმართებით განსაკუთრებით კარგი მოლოდინები აქვთ.
ტრამპის ადმინისტრაცია
ეკონომიკური მდგომარეობის გაუმჯობესების ფონზე, პრეზიდენტ დონალდ ტრამპის ადმინისტრაცია კორპორაციული სექტორის მხარდასაჭერი რეფორმების გატარებას, რეგულაციების გაუქმებას და რიგი გადასახადების შემსუბუქებას აანონსებს, რაც ამერიკულ ბიზნესს ხელს შეუწყობს. ამასთან, ტრამპი პირობას დებს, რომ ყველაფერს გააკეთებს ეროვნული წარმოების გასავითარებლად, რაც ინვესტორების განწყობაზე პოზიტიურად აისახება. ექსპერტების შეფასებით, ტრამპის მმართველობის პირობებში, აშშ-ის ენერგეტიკულ და მრეწველობა-წარმოების სექტორებს გამორჩეული შედეგები ექნებათ.
კონფლიქტების მოგვარება
ტრამპის ადმინისტრაციას გეოპოლიტიკურ საკითხებთან მიმართებითაც ამბიციური გეგმები აქვს. აშშ-ის 47-ე პრეზიდენტის განცხადებით, მისი გუნდი უახლოეს მომავალში რუსეთ-უკრაინისა და ახლო აღმოსავლეთის კონფლიქტების დასრულებას უზრუნველყოფს, რაც ასევე დადებით მოვლენად შეიძლება ჩაითვალოს საფონდო ბირჟისათვის, რადგან ინვესტორთათვის ყველაზე ხელსაყრელი მშვიდი და სტაბილური გარემოა.
AI-ის განვითარება
გეოპოლიტიკური და ეკონომიკური კლიმატის გაუმჯობესების გარდა, ინვესტორები განსაკუთრებით დიდ იმედებს ამყარებენ ხელოვნურ ინტელექტზე, რომელიც ათწლეულის ყველაზე მნიშვნელოვანი ინოვაციაა. მართალია, AI-ის გამოყენება ტექნოლოგიურმა გიგანტებმა უკვე დაიწყეს, თუმცა ხელოვნური ინტელექტის პოტენციალის სრულად ათვისებამდე ჯერაც დიდი გზა გვაშორებს. სავარაუდოდ, 2025 წელს მნიშვნელოვნად გაიზრდება იმ საშუალო და მცირე ზომის კომპანიების რაოდენობა, რომლებიც AI-ის ათვისებას დაიწყებენ და მის ხარჯზე შემოსავლებს გაზრდიან.
ასევე, არ უნდა დავივიწყოთ ის უმსხვილესი კომპანიები, რომლებიც აქტიურად მუშაობენ AI-ის განვითარებაზე და რევოლუციური პროდუქტების შექმნაზე, რადგან ბირჟაზე შარშან დაფიქსირებული კოლოსალური ზრდა, უმეტესწილად, სწორედ მათი დამსახურება იყო. ტექნოლოგიურ გიგანტებს შორის ანალიტიკოსებს განსაკუთრებით პოზიტიური მოლოდინები შემდეგ კომპანიებთან მიმართებით აქვთ: Nvidia, Google, Meta, Amazon, Apple, Microsoft და Tesla.
როგორი იყო გასული 2024 წელი?
რადგან გასული წელი ვახსენეთ, აქვე 2024 წლის შედეგებიც უნდა შევაჯამოთ, რომელიც საფონდო ბირჟის არსებობის ისტორიაში ერთ-ერთი საუკეთესო იყო. S&P 500 ინდექსი, რომელიც 500 უმსხვილეს ამერიკულ კომპანიას აერთიანებს, დაახლოებით 25%-ით გაიზარდა, ხოლო Nasdaq-ის ტექნოლოგიურ ინდექსს წლიურად თითქმის 30%-იანი ზრდა ჰქონდა, რაც AI-რევოლუციით, გაუმჯობესებული მოლოდინებით და აშშ-ის საპრეზიდენტო არჩევნებში ტრამპის გამარჯვებით იყო განპირობებული.
თუკი 2025 წელთან მიმართებით პოზიტიური მოლოდინები გაქვს და თან საფონდო ბირჟაზე ინვესტირების დაწყება გსურს, საქართველოს ბანკის მობილბანკში არსებული საინვესტიციო პლატფორმა უნდა გამოიყენო, რომელიც 6,000-მდე კომპანიასა და ETF-ს აერთიანებს.