როგორ აგროვებ თანხას სამომავლოდ?
ყულაბა ან საბანკო ანგარიში ალბათ ყველაზე გავრცელებული გზაა ფულის შესანახად. თუმცა, გიფიქრია იმაზე, რომ წლების შემდეგ შეიძლება მაინც არ გქონდეს მოგროვებული იმდენი, რამდენიც გსურდა? მიზეზი მარტივია — ინფლაცია ფულზე მუდმივად მოქმედებს და ხშირად აუფასურებს კიდეც მას.
სწორედ ამიტომ, ფინანსურ სფეროში თანხის დაგროვების ყველაზე კარგ საშუალებად ინვესტირება მიიჩნევა. ალბათ ეს სიტყვა გაბნევს, რადგან გგონია, რომ ინვესტორი მხოლოდ ძალიან მდიდარი ადამიანი შეიძლება იყოს. მაგრამ ასე სულაც არაა. მეტიც, ამ საქმეს დღესვე შეგიძლია ხელი მოკიდო და თანაც ნებისმიერი თანხით.
რა არის ინვესტირება და რატომ არის ის თანხის დაგროვების საუკეთესო გზა
მარტივად რომ ვთქვათ, ინვესტირება არის შენი ამჟამინდელი ფინანსების დაბანდება სამომავლოდ მეტი სარგებლის მისაღებად. ფინანსურ სფეროში ინვესტირების რამდენიმე გზა არსებობს, მაგრამ მათგან ყველაზე გავრცელებული საფონდო ბირჟებზე აქციებით ვაჭრობაა. აქცია კომპანიის მფლობელობის მცირე წილია — მისი შესყიდვით კი სწორედ ამ ბრენდის სამომავლო წარმატებაში აბანდებ თანხას. ამდენად, იზრდება კომპანიის სარგებელი — იზრდება შენი მოგება.
საფონდო ბირჟებზე თანხის ინვესტირებას რამდენიმე გამოკვეთილი უპირატესობა აქვს. გრძელვადიან პერსპექტივაში ეს ფულის დაგროვების საიმედო საშუალებაა, რადგან ასე შენს ქონებას ინფლაციისა და გადასახადებისგან იცავ, დღევანდელი შემოსავლიდან კი სამომავლოდ მაქსიმალურ სარგებელს მიიღებ.
გალტ & თაგარტის საბროკერო დეპარტამენტის უფროსი ანალიტიკოსი, ნიკოლოზ მაზანაშვილი, გვეუბნება, რომ წარსულში საფონდო ბირჟებზე ინვესტირება მხოლოდ დიდი ქონების მქონე ადამიანებს შეეძლოთ. თუმცა, ტექნოლოგიურმა განვითარებამ ყველას მისცა საშუალება, აქციებით ვაჭრობა დაეწყო. ამიტომ, ბოლო პერიოდში საფონდო ბირჟებზე ინვესტორების რაოდენობაც გაიზარდა.
“ჩემი აზრით, ინვესტირება ყველა ადამიანის ცხოვრების ნაწილი უნდა იყოს”, — ამბობს ნიკოლოზი, — “ამ გზით ჩვენთვის უკეთეს მომავალს ვიქმნით. ინვესტირება კაპიტალის გაზრდის, დაგროვებისა და ფინანსური დამოუკიდებლობის მოპოვების ძალიან კარგი საშუალებაა”.
რა სარგებელს იღებ აქციებით ვაჭრობით
როგორც უკვე ვთქვით, საფონდო ბირჟაზე აქციის სახით მისი მფლობელობის მცირე წილს ყიდულობ. ნებისმიერი კომპანიის მიზანია, თავის მფლობელს დოვლათი შეუქმნას. ამდენად, შენ, როგორც ბრენდის ერთგვარი მეწილე, მისი წარმატებით მოგებას ნახავ.
მოგება კი ორგვარი შეიძლება იყოს; თუკი კომპანია წარმატებას მიაღწევს და მიღებული მოგების რეინვესტირებას მოახდენს, აქციების ფასები გაიზრდება — შესაბამისად, გაიზრდება შენი სარგებელიც. თუმცა, ზოგიერთი კომპანია, ამასთან ერთად, აქციონერებზე გასცემს “დივიდენდს”, ანუ მოგების წილს. ნებისმიერ შემთხვევაში, გონივრულად დაბანდებული თანხა აუცილებლად მოგიტანს სარგებელს.