რატომ არის AI ინდუსტრიაში ინვესტირება პერსპექტიული

2023 წელს Collins-ის ლექსიკონმა წლის ყველაზე მნიშვნელოვან სიტყვად AI, ანუ ხელოვნური ინტელექტი დაასახელა, რაც მორიგი დასტურია იმისა, რომ წელს კაცობრიობამ ამ რევოლუციური ტექნოლოგიის რეალური შესაძლებლობები საკუთარი თვალით პირველად იხილა.

დღეისათვის ხელოვნური ინტელექტის განვითარებაზე არაერთი მსხვილი ტექნოლოგიური კომპანია მუშაობს, მათ შორისაა: Microsoft, Google, Meta და Tesla. ყოველი მათგანი ხელოვნურ ინტელექტს პრიორიტეტულ მიმართულებად ასახელებს და მის განვითარებაზე ძალ-ღონეს არ იშურებს. ამ მიმართულებით განსაკუთრებით აქტიური Microsoft-ია, რომელიც ChatGPT-ის შემქმნელი კომპანიის, OpenAI-ის უმსხვილესი ინვესტორია.

ChatGPT-ის თვალისმომჭრელი წარმატების ფონზე, წელს Microsoft-ის აქციების ღირებულება 52%-ით გაიზარდა და მისმა საბაზრო კაპიტალიზაციამ 2 ტრილიონ 730 მილიარდ დოლარს მიაღწია.

ინვესტორები აცნობიერებენ, რომ ტექნოლოგიური გიგანტი მხოლოდ ჩატბოტის შექმნით არ შემოიფარგლება და ის ხელოვნურ ინტელექტს თითქმის ყველა პროდუქტსა და სერვისში ჩააშენებს. ამ პროგნოზის გასამყარებელ პირველ ნიშნებს უკვე ვხედავთ: Microsoft 365-ში შემავალ პროგრამებს, მათ შორის, Word-ს, Excel-სა და PowerPoint-ს ხელოვნური ინტელექტის მხარდაჭერა უკვე აქვთ, ახალი Windows-ი კი Copilot-ითაა აღჭურვილი, ანუ ხელოვნური ინტელექტით, რომელიც კომპიუტერით სარგებლობის პროცესში მუდამ თქვენ გვერდითაა და პირადი ასისტენტის ფუნქციას ასრულებს.  

ცხადია, ხელოვნური ინტელექტის შესაძლებლობების ათვისებას მხოლოდ Microsoft-ი არ გეგმავს. უფრო მეტიც, დღეს უკვე ფაქტობრივად აღარ არსებობს ისეთი მსხვილი ტექნოლოგიური კომპანია, რომელიც საკუთარი AI-ს შექმნაზე ან ბაზარზე არსებული ხელოვნური ინტელექტის ეფექტიანად ათვისებაზე არ ფიქრობდეს. ამ შემთხვევაში, პარალელი შეგვიძლია გავავლოთ ბაზარზე პირველი კომპიუტერების გამოჩენის პერიოდთან. ის კომპანიები, რომლებმაც ეს რესურსი აითვისეს, განვითარდნენ. იმ კომპანიებმა, რომლებმაც კომპიუტერის გამოყენებაზე უარი თქვეს, ტექნოლოგიურ პროგრესს ჩამორჩნენ და საბოლოოდ კრახიც განიცადეს. ბუნებრივია, ასეთი შეცდომის განმეორება არავის სურს, ამიტომ AI-ს განივისების და ათვისების მაჩვენებელი ყოველდღიურად იზრდება.

პროგნოზირებულია, რომ მომდევნო წლების განმავლობაში ხელოვნური ინტელექტის ინდუსტრია ყოველწლიურად საშუალოდ 30%-ით გაიზრდება, რაც იმას ნიშნავს, რომ ეს მსოფლიოს ერთ-ერთი ყველაზე სწრაფად მზარდი ტექნოლოგიაა.

რაც შეეხება AI-ს შესაძლებლობებს, მართალია, წელს ჩვენ გენერაციული ხელოვნური ინტელექტის პოტენციალი ვიხილეთ, ანუ ისეთი AI-ს, რომელსაც ტექსტის, აუდიოს ან ვიზუალის შექმნა შეუძლია, თუმცა ეს ყველაფერი ნამდვილად არ არის. ხელოვნურ ინტელექტს ფაქტობრივად ნებისმიერი სახის დავალების შესრულება შეუძლია ავტომობილის მართვით დაწყებული, საბავშვო ლიტერატურის შეთხზვით დამთავრებული.

სწორედ ავტომობილის მართვაა ის უნარი, რომლის განვითარებაზე კომპანია Tesla აქტიურად მუშაობს. მეცნიერებს ესმით, რომ საჭირო რაოდენობის მონაცემების დამუშავების შემდეგ, ხელოვნური ინტელექტი ადამიანზე უფრო ეფექტიანი მძღოლი გახდება, რომელიც არასოდეს მოადუნებს ყურადღებას და ურთულეს გადაწყვეტილებებსაც რაციონალურად, ემოციების გარეშე მიიღებს.  თუკი თავად ილონ მასკს დავუჯერებთ, Tesla, პირველ რიგში, ხელოვნური ინტელექტის კომპანიაა, რომელიც ამავდროულად ელექტრომობილებს აწარმოებს. მასკის შეფასებას განსაკუთრებულ დრამატულობას ის ფაქტი სძენს, რომ Tesla მსოფლიოს ყველაზე ძვირად ღირებული ავტომწარმოებელია, რომლის საბაზრო კაპიტალიზაცია $710 მილიარდს აჭარბებს.

უნდა აღინიშნოს, რომ ხელოვნური ინტელექტის განვითარებით სარგებელს მხოლოდ ის კომპანიები არ იღებენ, რომლებიც უშუალოდ პროგრამულ უზრუნველყოფას ქმნიან. AI-ს ოპერირებისათვის არანაკლებ მნიშვნელოვანია ფიზიკური ინფრასტრუქტურა, ანუ კომპიუტერთა ქსელი, რომელიც ხელოვნურ ინტელექტს გამოთვლით შესაძლებლობებს ანიჭებს. ამ ტიპის კომპიუტერებს ნახევარგამტარების მწარმოებელი უმსხვილესი კომპანიები, მათ შორის, Nvidia, Intel, Qualcomm და TSMC ქმნიან, შესაბამისად, AI-ტექნოლოგიის განვითარება ზემოხსენებული კომპანიების შემოსავლებზეც პოზიტიურად აისახება.

მაგალითად, მიმდინარე წელს Nvidia-ს აქციების ღირებულება 240%-ით გაიზარდა და კომპანიის საბაზრო კაპიტალიზაციამ $1.2 ტრილიონს მიაღწია, რაც იმ ფაქტითაა განპირობებული, რომ კომპანია ყველაზე მოთხოვნად AI-პროცესორებს და გამომთვლელ მოწყობილობებს ქმნის.

საქართველოს ბანკის საინვესტიციო პლატფორმა ხელოვნური ინტელექტის განვითარებით სარგებლის მიღების და იმ კომპანიების აქციების შეძენის საშუალებას გაძლევთ, რომლებიც AI-ს განვითარებაზე აქტიურად მუშაობენ. თუკი კონკრეტულ კომპანიაზე არ გსურთ არჩევანის შეჩერება, მაშინ შეგიძლიათ Global X Robotics & Artificial Intelligence ETF (BOTZ) შეიძინოთ, რომელიც სექტორში წარმოდგენილ ასამდე კომპანიას აერთიანებს.      

არ გაჩერდე, გააგრძელე კითხვა